PREZIDÉNSIA-da-REPÚBLIKA SELEBRA LORON-MATEBIAN IHA JARDIM DOS HEROIS

by Mídia PR Posted on

Jardim dos Herois Metinaro, loron-2 fulan-Novembru 2018 – Xefe Casa Civil, Francisco Maria de Vasconcelos, Xefe Casa Militar, Koronél António Soares da Silva “Maucalo” no Espoza Prezidente-da-Repúblika, Cidalia Lopes Nobre Mouzinho Guterres, selebra loron-matebian ho tau ai-funan ba rate erói sira nasaun nian.

Iha loron-matebian ne’e, Xefe Casa Civil, Francisco Maria de Vasconcelos, fó hanoin ba timoroan hotu atu fó ónra ba hirak ne’ebé lakon sira-nia moris ba independénsia Timor-Leste nian ho hadomi malu no servisu hamutuk hodi dezenvolve nasaun.

“Ohin, ita mai iha ne’e fó hanoin hikas ba ita-nia erói sira-nia sakrifísiu ba libertasaun ita-nia rain nomós atu lori nafatin ba populasaun tomak no jerasaun tomak katak, sira ne’ebé maka sira-nia ruin tau iha fatin ida ne’e, tamba sira husik sira-nia isin hodi hetan ita-nia soberania ida ne’e. Prezidente-da-Repúblika mós fó hanoin ba povu tomak iha loron matebian, maka ba vizita rate. Hatudu ita-nia domin. Tamba ne’e, sira ne’ebé mate ona ita fó ita-nia omenajen nafatin. Ba ita sira ne’ebé mak sei moris, katuas no ferik, joven sira, labarik sira, moris iha hakmatek, moris iha pás, hadomi malu nafatin. Kuandu ita hadomi malu, ita-nia rai ne’e bele hakmatek, lori dezenvolvimentu ba ita-nia rain”, afirma Xefe Casa Civil, Francisco Maria de Vasconcelos.

Mídia PR