PRÉMIU DIREITUS UMANUS “SÉRGIO VIEIRA DE MELLO”

by Mídia PR Posted on

“Timor-Leste hatene saída mak violasaun ba direitus umanus. Durante tinan rua nulu resin haat (24) Timor-Leste la hetan direitu ba autodeterminasaun. Konsekuénsia husi ida ne’e mak ita enfrenta violasaun direitus tomak nu’udar ema. Timor-Leste hetan Ukun Rasik-An liuhusi prosesu naruk ida, ne’ebé ita-nia Povu hasoru violasaun grave no sériu liu ba dignidade umana. Ita restaura ita-nia Ukun Rasik-An ho raan!
Tanba ida ne’e duni, mak espesiál tebes ba Timoroan tomak, atu selebra tinan hitu-nulu Deklarasaun Universal ba Direitus Umanus.
Prémiu ne’ebé ita atribui ohin, reflete kompromisu, kriatividade, empeñu, dedikasaun, sakrifísiu, vizaun no persisténsia husi sidadaun sira, atu promove, defende no promulga Direitus Umanus iha Timor-Leste, ho sira-nia atividade loroloron nian,”

Francisco Guterres Lú Olo
PREZIDENTE RDTL
——————————
Tetun – Portugues
DISKURSU HUSI SUA EXELÉNSIA
PREZIDENTE REPÚBLIKA DR. FRANCISCO GUTERRES
LÚ OLO IHA SERIMÓNIA FÓ PRÉMIU DIREITUS UMANUS “SÉRGIO VIEIRA DE MELLO”
Palásiu Prezidensial Nicolau Lobato
Dili, 10 Dezembru 2018

Ohin ita hotu halibur malu iha Palásiu Prezidensial iha loron ida ne’ebé importante tebes ba Mundu tomak, loron sanulu fulan dezembru, Loron Internasional ba Direitus Umanus, hodi fó-hanoin ba malu katak ema hothotu moris livre no hanesan, iha nia dignidade no mós iha nia direitu.
Líder ka governante hothotu iha responsabilidade atu asegura igualdade ba sidadaun hothotu, direitu ba moris ho dignidade, direitu atu hetan servisu no seguransa, direitu atu iha asesu ba saúde no ba edukasaun, respeitu ba diferensa no ba dignidade ema seluk nian.

Ohin, ita selebra tinan hitu-nulu ne’ebé Organizasaun Nasoens Unidas adota Deklarasaun Universal Direitus Umanus-nian hodi afirma ita-nia fiar iha direitus umanus, iha dignidade no mós iha valór umanu ema hothotu-nian. Deklarasaun Universal Direitus Umanus-nian promove respeitu universal no tau matan ba direitus umanus no liberdades fundamentais ba ema hothotu,la haree ba ida-idaknia rasa, seksu, lian ka relijiaun.

Ohin, mós, ita distingue sidadaun na’in tolu no entidade tolu ho Prémiu Direitus Umanus Sérgio Vieira de Mello.

Atribuisaun ba Prémiu ida ne’e inisiativa husi Ex-Prezidente Repúblika no PrémiuNobel ba Paz, Dr. José Ramos-Horta, no hanesan ita hotu nia omenajem ba saudozu Sérgio Vieira de Mello, Diplomata husi ONU ne’ebélideraAdministrasaun ba Tranzisaun ONU-nian, iha Timor-Leste, hosi novembru 1999 to’o Maio 2002. Sérgio Vieira de Mello kaer knaar ida ne’e ho vizaun ne’ebé inovativu tebes, tanba maski nia tenke tuir regras no prosedimentus ONU-nian, Sérgio Vieira de Mello hatene kompreende kontextu Timor-Leste-nian no hatene respeita tradisaun funu nian no kombatente sira hotu.
Sérgio Vieira de Mello-nia karáter umanista, hamutuk ho nia kapasidade diálogu, nia talentu atu halo negosiasaun no nia defeza ba direitus umanus no valores demokrátikus sai hanesan ezemplu no inspirasaun ba ita hotu no ba mundu tomak!

Ilustres konvidadus
Timor-Leste hatene saída mak violasaun ba direitus umanus. Durante tinan rua nulu resin haat (24) Timor-Leste la hetan direitu ba autodeterminasaun.
Konsekuénsia husi ida ne’e mak ita enfrenta violasaun direitus tomak nu’udar ema. Timor-Leste hetan Ukun Rasik-An liuhusi prosesu naruk ida, ne’ebé ita-nia Povu hasoru violasaun grave no sériu liu ba dignidade umana. Ita restaura ita-nia Ukun Rasik-An ho raan!

Tanba ida ne’e duni, mak espesiál tebes ba Timoroan tomak, atu selebra tinan hitu-nulu Deklarasaun Universal ba Direitus Umanus.

Prémiu ne’ebé ita atribui ohin, reflete kompromisu, kriatividade, empeñu, dedikasaun, sakrifísiu, vizaun no persisténsia husi sidadaun sira, atu promove, defende no promulga Direitus Umanus iha Timor-Leste, ho sira-nia atividade loroloron nian.

Gracinda Assunção, iha distinsaun tanba uza experiénsia ne’ebé nia hetan hodi fila, husi Dili, baTutuala, ho kompromisu ida hodi kontribui ba labarik sira-nia formasaun,hahú kedas husi pré-eskola. Gracinda ho nia kriatividade, dedikasaun no persisténsia konsege lori labarik kiik sira bá eskola hodi aprende no halimar, hodi evita labarik sira tuir inan-aman bá to’os.

Mateus Xavier, nu’udar Mestre ida iha Nedere, iha Uatulari, fatin ida ne’ebé izoladu tebes. Mateus Xavier tenke la’o oras haat nia laran hodi bá hanorin labarik sira iha Nedere, knua ida ne’ebé izoladu tebes, no eskola laiha. Ho karáter voluntáriu,nia hatudu nia teimozia ka “ulun toos”, nia fiar no nia persisténsia to’o nia konsege duni, ho apoiu husi komunidade, harii eskola ida iha knua Nedere no hetan rekoñesimentu nu’udar profesór kontratadu. Maibé, importante liu mak nia konsege mantein prosesu aprendizajen ba labarik sira.

Eugenio Lemos, sidadaun ida ne’ebéintroduz konseitu permakultura iha Timor-Leste, liuhusi harii organizasaun Permakultura Timor-Leste (PERMATIL). Ho nia experiénsia, dedikasaun no servisu hamutuk ho komunidade sira, Ego Lemos konsege hamoris fila fali bee-matan rua nulu (20) iha Timor-Leste laran tomak. Ho bee-matan sira ne’e, ohinloron, komunidade sira bele utiliza no haburas sira-nia ambiente. Hamutuk ho nia kolega sira, Ego Lemos harii mós to’os eskolar atus ida lima nulu (150), iha Timor-Leste tomak.Ohinloron, iha eskola balu, to’os eskolár kontribui ba merenda eskolár, la presiza sosa ai-han husi fatin seluk.

Uniaun Nasionál Agrikultór Ermera (UNAER), ho nia membru hamutuk xefe família rihun rua nulu resin haat, atus tolu ualu nulu resin haat (24.384), fasilita agrikultór sira no, iha tinan 2003-2006 mosu hanoin atu unifika to’os-na’in sira, iha munisípiu Ermera. UNAER nia servisu restaura agrikultór sira-nia konfiansa no hakbiit direitu traballadór nian, hodi bele kontribui ba prátika agrikultura sustentável liuhusi agroflorestál, promove komérsiu justu ho konsumidór kafé iha Japaun, harii eskola ba organizadór komunidade no eskola pré-eskolár ida no tarabandu.

Fundasaun Fórum Komunikasaun Oratóriu Don Bosco, iha Dili, dedika ba tarefa difísil hodi tau matan ba vítima violénsia doméstika no violasaun seksuál. Fundasaun ida ne’e ajuda duni defende no promove direitu sidadaun sira-nian no ajuda atu restaura vítima sira-nia dignidade.
Atividade seluk ne’ebé organizasaun ne’e halo mak fasilita membru komunidade, iha Tibar, ne’ebé moris husi halibur lixu. Lixu sira husi kapitál Dili no soe iha Tibar sai fonte rendimentu ba membru komunidade ne’ebé hela besik iha área ne’e.

Fundasaun AHISAUN, tau matan atu defende direitu ba ema ho defisiénsia tanba dalabarak hetan diskriminasaun husi komunidade. Komunidade dalabarak diskrimina sira no konsidera nu’udar ema inválidu. Ho servisu ida ne’e, Fundasaun AHISAUN kontribui hodi halakon diskriminasaun hasoru grupu vulnerável ida, no kontribui ba sosiedade ida ne’ebéinklusiva no solidária.

Ilustres konvidadus
Timor-Leste ohin hamrik nu’udar Estadu-de-Direitu-Demokrátiku ida ne’ebé sidadaun sira-nia direitus hothotu hetan protesaun jurídika no garante husi Estadu, liuhusi Governu.

Iha tinan ida ne’e ita selebra loron mundial ba direitus umanus hamutuk ho Provedoria dos Direitus Umanus no Justisa, instituisaun independente ida, ne’ebé nia objetivu mak tuir mai: proteje direitus umanus, hametin integridade no promove boa-governasaun iha Timor-Leste. Iha oportunidade ida ne’e, ha’u halo apelu ida ba PDHJ, hodi habelar koñesimentu jerál husi sidadaun hothotu kona-ba Deklarasaun Universal ba Direitus Umanus. Ho nune’e, sidadaun hothotu bele iha konxiénsia ba ida-idak-nia direitu rasik no mós katak iha instituisoens, hanesan PDHJ rasik, ne’ebé sira bele buka wainhira sira hetan violasaun ruma ba sira-nia direitu.

Ilustres Konvidadus sira
Ita labele hanoin de’it no selebra Direitus Umanus tinan ida dala ida. Governu no instituisoens relevantes tomak tenke buka nafatin atu adota polítikas públikas ne’ebé promove no proteje direitus umanus, hanesan:

• hatún kiak. Kiak hanesan kauza no produtu husi violasaun direitus umanus. Kiak mak problema boot liu no fator determinante ba direitus umanus. Wainhira ita la hatún kiak, ita la garante direitu báziku sidadaun sira-nian;

• halakon diskriminasaun hasoru feto no grupu vulnerável hothotu;

• halakon violénsia doméstika, ne’ebé sei aas iha ita-nia rai;

• prevene tráfiku oioin ne’ebé mosu dadauk iha ita-nia rai;

• kombate korrupsaun. Horisehik, loron sia (9) fulan dezembru, Loron Internasional Kombate Korrupsaun. Prezidente Repúblika bolu atensaun beibeik katak korrupsaun kontribui atu hasa’e kiak. Ne’eduni korrupsaun mós kontribui ba violasaun direitus umanus;

• halakon dezigualdades sosiais no

• diferensa entre kapital Dili no munisípiu sira seluk.

Sidadaun hothotu tenke iha asesu ba justisa, no ita-nia sistema judisial tenke independente, rigorozu no justu. Instituisaun prizional sira tenke garante mós direitus bázikus elementares ba dadur sira.

Sidadaun sira iha konfiansa no respeitu ba forsas defeza no seguransa! Ne’eduni, ita tenke iha forsas defeza no seguransa ne’ebé profisionál, no iha sira-nia ezersísiu, iha respeitu ba dignidade no direitus fundamentais sidadaun sira-nian. Forsas defeza no seguransa tenke respeita ema!

Mai, ita hotu hateke ba ezemplu di’ak husi Premiadu sira ne’ebé hatudu ba ita katak, ita-nia direitu mai mós ho dever no responsabilidade!Sidadaun na’in tolu no instituisaun tolu ne’ebé ohin simu Prémiu Direitus Umanus “Sérgio Vieira de Mello” la hein atu simu prémiu, maibé sira hola inisiativa rasik, hodi harii sosiedade ida ne’ebé inklusiva, solidária no justa. Ho sira-nia ezersísiu Sidadania,sira kontribui ba moris-di’ak Povu nian! Sira sai erói foun ba ita-nia Estadu. Ita-nia rai sei buras liután, no ita-nia sidadaun sei ksolok liután ho sira-nia moris, wainhira, iha ita-nia atividade loroloron, ita hotu kontribui ba sidadaun hothotu nia moris-di’ak.

Hamutuk ita hotu tenke harii ponte hodi liga ba malu, hodi habelar liután diálogu permanente no konstrutivu, hodi defende no proteje direitus ema hotu-nian, hanesan direitu sosiál, polítiku, sivíl, ekonómiku no kulturál, hodi Timor-Leste buras liután hanesan rai ida ne’ebé prósperu no inkluzivu.
Obrigadu.