PREZIDENTE REPÚBLIKA FÓ TOMADA POSSE BA ADJUNTU PROKURADÓR-JERÁL REPÚBLIKA

by Mídia PR Posted on

Palásiu Prezidensiál Nicolau Lobato, Bairro Pite, 4 dezembru 2018
Prezidente Repúblika Francisco Guterres Lú Olo fó tomada posse ba Adjuntu Prokuradór Jerál Repúblika Alfonso Lopez ohin iha palásiu Prezidensiál Repúblika hodi troka Zelia Trindade ne’ebé nia mandatu remata tiha ona.

Prezidente Repúblika husu atu Adjuntu Prokuradór-Jerál Repúblika foun bele hahú ezerse nia funsaun hodi kontribui ba hametin ekipa traballu iha Prokuradória nia laran.

Molok Prezidente halo nomeasaun ba Alfonso Lopez, Konsellu Superior Ministériu Públiku propoin kandidatu prokuradór na’in-tolu husi primeira no segunda klase ba Prezidente-da-Repúblika hodi halo nomeasaun. Bazeia ba proposta husi Konsellu Superior Ministériu Públiku, Prezidente-da-Repúblika nomea Afonso Lopes nu’udar Adjuntu Prokuradór Jerál Repúblika Demokrátika Timor-Leste liuhusi Dekretu Prezidente-da-Repúblika no 34/2018 iha 5 Setembru 2018.

Prezidente-da-Repúblika uza nia kompeténsia tuir konstituisaun artigu 86 no 133 atu nomea, demiti no exonera Adjuntu Prokuradór-Jerál hafoin rona Konsellu Superior Ministériu Públiku. Hafoin rona husi Konsellu Superior Ministériu Públiku no tetu tuir realidade no nesesidade, Prezidente Repúblika nomea Afonso Lopez okupa kargu Adjuntu Prokuradór-Jerál Repúblika
Molok simu kargu nu’udar Adjuntu Prokuradór-Jerál Repúblika, Alfonso Lopes hala’o nia knaar nu’udar prokuradór durante tinan 9 nia laran iha Timor-Leste.

Iha serimónia ne’e, Prezidente Repúblika louva serbisu Prokuradória-Jerál Repúblika ne’ebé durante ne’e funsiona iha teritóriu nasionál no husu atu hotu-hotu halo esforsu ba hetan progresu iha justisa formál ba Timor-Leste ida ne’ebé justu no justisa ba ema hotu.
Prezidente Repúblika sei nomea tan Adjuntu Prokuradór ida iha tinan-2019, tuir proposta husi Konsellu Superior Ministériu Públiku atu iha adjuntu na’in-rua. Nomeasaun ba Adjuntu Prokuradór ida tan sei mai husi kategoria primeira klase.

Agora dadaun, iha prokuradór na’in-tolu de’it mak ho kategoria primeira klase: atuál Prokuradór Jerál Repúblika José da Costa, atuál Inspetora ba Ministériu Públiku Angelina Joanina Saldanha no Eis Adjunta Prokuradór-Jerál Repúblika Zelia Trindade. Zelia Trindade asume kargu nu’udar Adjunta Prokuradór Jerál Repúblika durante mandatu dala-rua tutuir malu no tuir lei labele estende tan.

Mídia PR