RAMOS HORTA SEI LORI MENSAJEN PR KONVIDA PAPA VIZITA TIMOR-LESTE

by Mídia PR Posted on

Palásiu Prezidensiál Nicolau Lobato, Bairro Pite, 6 dezembru 2018
Prezidente Repúblika Francisco Guterres Lú Olo hasoru malu ho eis Xefe Estadu José Ramos Horta.

Iha enkontru ho Prezidente Francisco Guterres Lú Olo, Ramos Horta haktuir, sira ko’alia asuntu tolu mak hanesan: konvite Prezidente Repúblika ba Papa Francisco atu vizita Timor-Leste, Komemorasaun Tinan-20 loron-Konsulta Popular ka Referendum no Prosesu adezaun Timor-Leste ba organizasaun rejionál nasaun Sudeste Azíatiku, ASEAN.
Relasiona ho konvite Prezidente Repúblika ba Papa Francisco, Ramos Horta afirma, nia hetan konvite husi senadu italianu atu vizita kapital Italia, Roma, husi 11 to’o 13 Fevereiru tinan oin. Iha ne’e, Ramos Horta sei lori mós mensajen husi Prezidente Francisco Guterres Lú Olo atu entrega ba Papa Francisco.

“Ha’u haree tok, koko tok, wainhira ha’u ba iha Roma, ho konvite senadu italianu, bele lori mensajen rumatan husi Señor Prezidente-da-Repúblika ba Sua Santidade, ba Vatikanu para insiste, konvite ba Sua Santidade atu mai vizita”, Ramos Horta hateten.

Kona-ba komemorasaun tinan-20 loron-Konsulta popular, Ramos Horta husu se Estadu hakarak komemora loron ne’e hodi konvida Xefe Estadu husi nasaun seluk, presiza halo preparasaun ho antesedénsia iha tempu naruk.
Nia hatete ho eventus oioin ba komemorasaun loron ne’e, Timor-Leste bele tau fali nia-an iha mapa-mundu, liuliu hodi promove turizmu.

Ramos Horta sujere atu Estadu bele halo desizaun loloos no tau orsamentu ba realizasaun eventu ida ne’e. Nia mós informa Prezidente Repúblika konkorda no sei ko’alia ho Governu kona-ba kestaun ida ne’e.

Relasiona ho adezaun ba ASEAN, Ramos Horta hatete nia no Prezidente Repúblika mós preokupa tanba maske Timor-Leste hatama aplikasaun dezde 2011, atu adere ba organizasaun rejionál ne’e, maibé to’o oras ne’e, tuir nia observasaun, seidauk iha atividades intensu ruma atu aselera lalais prosesu adezaun ba ASEAN. Prezidente Repúblika, tuir Ramos Horta , sei konsulta mós ho Governu kona-ba asuntu ida ne’e.

Mídia PR