Aniversáriu Komponente Navál FALINTIL-FDTL ba dala 17

by Mídia PR Posted on

“Hosi pontu-de-vista jeográfiku, ita rona beibeik katak Timor-Leste nasaun ki’ik ida. Maibé ida-ne’e laloos, tanba ita-nia plataforma kontinentál boot tebtebes. Timor-Leste nia pozisaun jeoestratéjika sei nafatin rekursu boot no metin ida, la’ós de’it tanba ninia pozisaun rasik maibé mós tanba ninia rikusoin minerál sira, iha tasi-kidun, iha folin boot (…) Estadu Timor-Leste tenke proteje tasi no kria kondisaun hirak ne’ebé presiza, atu tasi bele mós kontribui ba nasaun nia dezenvolvimentu sósiu-ekonómiku, liuliu ba vida komunidade- sira-nian, ne’ebé hela besik tasi-ninin”.

– FRANCISCO GUTERRES LÚ OLO
Prezidente RDTL
———————————–
Tétun-Português-Inglês

Diskursu hosi Sua Exelénsia
Prezidente Repúblika, Dr. Francisco Guterres Lú Olo
Iha komemorasaun Aniversáriu Komponente Navál FALINTIL-FDTL ba dala 17
Baze Navál Hera, 12 Janeiru, 2019

Senór Xefe Estadu-Maiór Jenerál FALINTIL-Forsa Defeza Timor-Leste, Majór Jenerál Lere Anan Timur
Señór Komandante Komponente Navál, Kapitaun Fragata Adão Brito
Distintu konvidadu sira
Militár sira
Señora no señor-sira

Ohin ita selebra Aniversáriu Komponente Navál FALINTIL-Forsa Defeza Timor-Leste ba dala sanulu resin-hitu. Loron-ohin iha signifikadu boot tebes ba hothotu ne’ebé defende interese Timor-Leste nian iha Tasi no nune’e, serve mós rai ida ne’e. Loron-ohin ne’e importante tebes mós ba sidadaun hothotu nasaun ida-ne’e nian, no mós ba ema hotu ne’ebé tulun ita, atu haree ba Tasi, nu’udar objetivu nasionál no estratéjiku ida, nu’udar ita-nia prioridade nasionál ida.

Ha’u aproveita okaziaun ida-ne’e atu, nu’udar Prezidente Repúblika no Komandante Supremu Forsas Armadas, husik hela ha’u-nia rekoñesimentu ba sira-ne’ebé serve Timor-Leste, ho esforsu no dedikasaun, liuhosi Komponente Navál, no mós ba nasaun-belun sira-ne’ebé kontribui ba harii no habelar Komponente ida ne’e, iha tinan sanulu-resin-hitu nia laran.

La’ós fásil hakfila “asuua’in funu-na’in” sira, ne’ebé toman luta ba sobrevivénsia, atu sai Forsa Armada konvensionál. Susar liután bainhira ita hakarak nakfila “asua’in funu-na’in” sira ba fali mariñeiru ho kbiit atu hala’o knaar iha Tasi. Maibé, biar Timor-Leste la iha tradisaun tasi-nian, ita konsege nakfila dadaun ona ita-nia mentalidade kona-ba tasi.

La’ós fásil hakfila “asuua’in funu-na’in” sira, ne’ebé toman luta ba sobrevivénsia, atu sai Forsa Armada konvensionál. Susar liután bainhira ita hakarak nakfila “asua’in funu-na’in” sira ba fali mariñeiru ho kbiit atu hala’o knaar iha Tasi. Maibé, biar Timor-Leste la iha tradisaun tasi-nian, ita konsege nakfila dadaun ona ita-nia mentalidade kona-ba tasi.

Militár sira
Ilustre konvidadu sira
Liuhosi tasi mak negosiante portugés, árabe, xinés no europeu sira tau ain iha Timor-Leste. Sira mai tanba ai-kameli buras iha rai Timor-Leste tomak.

Tasi mak loke odamatan ba rai sira seluk tama-mai no nune’e, Timor-Leste sai duni rai ida ba komersializasaun internasionál ai-kameli nian, rikusoin ida ne’ebé apresiadu tebtebes, iha tempu ne’ebá, iha Índia, Xina no Europa.

Ohinloron, ita ladún hanoin-hetan katak Tasi mós halo parte Timor-Leste, tasi mós ita-nian. Hosi pontu-de-vista jeográfiku, ita rona beibeik katak Timor-Leste nasaun ki’ik ida. Maibé ida-ne’e laloos, tanba ita-nia plataforma kontinentál boot tebtebes. Timor-Leste nia pozisaun jeoestratéjika sei nafatin rekursu boot no metin ida, la’ós de’it tanba ninia pozisaun rasik maibé mós tanba ninia rikusoin minerál sira, iha tasi-kidun, iha folin boot.

Tanba Timor-Leste iha liña kosteira ida liu kilómetru atus hitu no Zona Ekonómika Eskluziva Marítima ida ho milla náutika atus rua, ita-nia área rekursu peska nian luan tebtebes. Estudu ne’ebé hala’o iha Timor-Leste nia meti-ulun-ahu-ruin, identifika espésie ikan rihun ida resin no espésie ahu-ruin hamutuk atus haat no tanba ne’e, ita-nia tasi sai rekoñesidu mós ohin-loron hanesan sentru biodiversidade tasi-tropikál boot ida.

Ne’e duni, Estadu Timor-Leste tenke proteje tasi no kria kondisaun hirak ne’ebé presiza, atu tasi bele mós kontribui ba nasaun nia dezenvolvimentu sósiu-ekonómiku, liuliu ba vida komunidade- sira-nian, ne’ebé hela besik tasi-ninin.

Militár sira hosi Komponente Navál,
Liuhosi komemorasaun ba Loron Komponente Navál nian, ita mós afirma tasi nia importánsia estratéjika. Dezafiu boot tebes ida, ne’ebé ita hasoru mós ohinloron, mak oinsá ita haree ita-nia relasaun ho tasi.

Problema ida hosi horiuluk kedas to’o agora mak Timor-Leste la ezerse ninia direitu soberania ba tasi. Tan ne’e importante okupa espasu mamuk sira ne’ebé tama iha ita-nia soberania no jurizdisaun nasionál atu hasees risku okupasaun husi raiseluk.

Timor-Leste nu’udar Estadu independente no soberanu ida, ho asesu no área-boot ida see ba tasi, labele fila kotuk ba tasi no ba ameasa hirak ne’ebé mai hosi tasi, hanesan pirataria, transporte ba sasán perigozu, poluisaun, esplorasaun ilegál ba rekursus, tráfiku oioin, terrorizmu, imigrasaun ilegál nsst.

Ita harii Komponente Navál hodi hatán ba dezafiu ida-ne’e, hodi serve Timor-Leste nia interese no direitu sira.
Haree ba dezafiu oioin seguransa nian no mós ba nesesidade atu kontrola fronteira sira no rekursus tasi-nian, mak iha 2002, ukun-na’in sira foti desizaun estratéjika harii Komponente Navál ida ba Forsa Defeza Territóriu nian, tuir Timor-Leste nia kondisaun rasik.
Ita-nia parseiru estratéjiku sira fó kontribuisaun makaas ba objetivu ida ne’e: Uluk liu, husi Portugál ne’ebé fó ró-lanxa rua ba fiskalizasaun no hala’o kapasitasaun ba ita-nia ema, no tuirmai, husi Xina, Koreia Súl, Indonézia, Austrália no Estadus Unidus.

Ba ita-nia ema ne’ebé opera iha tasi, importante tebtebes hetan esperiénsia no hatene téknika. Nune’e, Komponente Navál tenke kontribui ho nia esperiénsia, matenek no meius ba hala’o vijilánsia no fiskalizasaun iha área–tasi ne’ebé boot no tama iha ita-nia soberania no jurizdisaun nasionál.

Komponente Navál nia prezensa iha tasi importante tebtebes ba Timor-Leste nia seguransa no atividade tasi-nian. Maski Komponente ne’e hasoru limitasaun operasionál ne’ebé relasiona ho manutensaun no kondisaun iha rai-maran, ninia unidade navál sira hala‘o ona knaar importante balun hanesan kaptura ró sira ne’ebé halo atividade ilegál, prende ró ilegál no hala’o operasaun buka no salva ema.

Nu’udar ezemplu, ha’u hakarak fó-hanoin ohin katak, iha tinan 2014, Komponente Navál konsege salva ema na’in-23, inklui feto no labarik, bainhira ró ida hosi Tailándia hasoru problema entre Baucau no Illa Wetar, Indonézia.

Tanba ne’e mak ita presiza hadi’a kondisaun manutensaun ba frota navál iha rai-maran no hasa’e liután kapasidade vijilánsia no fiskalizasaun ba área tasi nian ne’ebé tama iha soberania no jurizdisaun Estadu Timor-Leste nian.

Dezafiu boot ida ne’e ezije Estadu atu fó prioridade loloos ba tasi ho governasaun di’ak.
Estadu gasta osan barak ho forsa mariña maibé ita presiza duni halo investimentu ida ne’e. Se ita la tao matan didiak, fásil lakon forsa ne’e. Ita labele duplika meius. Tanba ne’e, importante hetan finansiamentu loloos hodi investe iha Komponente Navál, atu sosa ró ne’ebé bele hala’o misaun oioin no iha ne’ebé de’it. Ita presiza mós hetan finansiamentu ba servisus manutensaun ró sira-nian hodi garante ró sira prontu atu hala’o servisu, iha momentu ne’ebé de’it.

Haree ba ita-nia rekursus oituan de’ it, importante harii modelu ida ba Sistema Nasionál Autoridade Marítima tuir realidade Timor-Leste nian no ne’ebé hetan beibeik kolaborasaun hosi entidade hothotu no instituisaun sivíl sira, miilitár no polisiál, públiku ka privadu, ne’ebé bele kontribui ba hametin seguransa marítima.

Nune’e, Lei sira-ne’ebé vigora iha Timor-Leste hatuur modelu “duplu uzu”, katak Komponente Navál iha devér atu hala’o knaar militár no mós knaar la’ós militár ne’ebé liga ho seguransa tasi-nian no ezersísiu autoridade públika nian, iha tasi.

Militares hosi Komponente Naval


Maluk sira mak erdeiru fiél ba sira ne’ ebé luta no hetan-mate iha kampu batalla, ba ita maluk sira ne’ ebé mate hodi defende ita-nia Pátria!

Hafoin luta durante períodu naruk no susar ida atu ukun-an, ita Timoroan bele sente hikas orgullu tanba ita-nia soberania nasionál no Estadu nia autoridade ba tasi, hetan ona rekoñesimentu, tuir direitu internasionál, liuhosi dalan-hakmatek, bainhira Timor-Leste asina akordu harii fronteira-tasi permanente ho nasaun viziñu Austrália.

Akordu ida ne’e loke liután dalan ba Timor-Leste no Indonézia hatutan negosiasaun no harii loloos fronteira tasi no rai-maran nian entre rai rua ne’e. Bainhira ita iha ona fronteira hothotu loos ona, ita-bele ezerse ita-nia soberania nu’udar Estadu independente ida.

Bainhira ita-nia fronteira-tasi ho Austrália hatuur loos ona, Timor-Leste bele tama mós ba Programa Seguransa Marítima Pasífiku nian ne’ebé promove hosi Governu Austrália liuhosi doasaun ró-patrulla husi Austrália ba ita, iha tinan 2023, hodi haforsa ita-nia kapasidade fiskalizasaun ba ita-nia fronteira no vijilánsia ba ita-nia tasi.

Militár sira hosi Komponente Navál,
Iha serimónia ohin nian, ha’u hakarak mós bolu militár sira-nia atensaun katak importante tau matan ba natureza atu ita bele moris nafatin iha ambiente saudável. Proteje natureza sai mós kompromisu ida ba ha’u, ne’ebé ha’ u fó-sai iha loron tomada-de-pose, nu’udar Prezidente Repúblika,

Ohin ita sei kuda simbolikamente ai-oan sanulu. Iha tinan balun nia laran, ai-hun sira ne’e sei proteje ambiente iha área ida-ne’e. Ohin ka aban maluk sira sei kuda ai-oan atus rua ne’ebé fornese hosi Ministériu Agrikultura no Peskas. Imi bele kuda iha ne’e ka iha imi-nia kintál. Ha‘u husu ba maluk sira atu tau matan ba ai-oan sira ne’e, atu nune’e sira bele moris no fó benefísiu ne’ebé ita hein iha tempu tuirmai.

Militár-sira hosi Komponente Navál,
Ha’u rekoñese katak ita sei lori tempu naruk atu haburas Mariña ida-ne’ebé ita hotu presiza no hakarak.
Nune’e ho votu esperansa iha futuru mak ha’u, nu’ udar imi-nia Komandante Supremu, apela ba imi hotu atu kontinua serve nafatin ita-nia Pátria, hanesan imi halo durante ita-nia luta libertasaun nasionál.
Obrigadu!