KAMPAÑA NASIONAL “SIDADAUN IDA, AI-OAN IDA”

by Mídia PR Posted on

“Ita hahú kampaña ne’e, nu’udar inisiativa hosi Prezidente Repúblika maibé ho hanoin katak ita sei hatutan babeibeik nu’udar responsabilidade koletiva ida, atu salva ita-nia rain hosi udan sobu, atu ita bele hetan bee-moos babeibeik no kaer-metin rai-bokur ne’ebé ita prezisa ba agrikultura”.


Dili, 25 Janeiru 2019
Señores Membrus Governu
Señores Membrus Korpu Diplomátiku
Señores Responsáveis hosi Igreja Católika no Konfisaun Relijioza sira seluk
Señores membrus Organizasaun Naun-Governamental sira
Señores Membrus Lideransa Komunitária
Eskuteirus
Populasaun iha Tasi-Tolu, área Estátua Papa João Paulo II, Golgota no Marabia
Povu doben Timor-Leste,
Ho laran ksolok tebetebes mak ha’u lansa ohin, 25 Janeiru 2019, kampaña nasional “sidadaun ida, ai-oan ida” ho apoiu hosi Reverendísimu Bispo Dili, Dom Virgílio do Carmo da Silva, pároku Comoro, Administrador Postu D. Aleixo no Vera Cruz, Diresaun Nasional Florestas, eskuteirus, lideransa komunitária no populasaun lokál.
Kampaña Nasional ne’e hahú iha área tolu, iha Munisípiu Dili: área Estátua Amu Papa João Paulo II nian, área Golgota no área Marabia nian.

Área ida-idak iha ninia signifikadu espesiál. Área ho Estátua Amu Papa João Paulo II nian no área Golgota, ho gruta Nossa Senhora nian, nu’udar área ho interese relijiozu ba maioria povu Timor-Leste, tama ona iha roteiru baibain ba turista lokál no estranjeiru sira. Maibé, área rua ne’e tama ona iha risku lakon ninia furak naturál. Rai mamuk dadaun no monu dadaun ona hosi foho-leten mai kraik tanba maluk sira tesi beibeik ai ba nesesidades loron-loron nian.

Marabia tanbasá? Tanba iha fatin ne’e mak ita-nia asu’ain sira fó fali sinál katak ita-nia luta libertasaun nasional sei moris hela. Sinál dahuluk ne’e fó iha 10 Juñu 1980 ho atake ida iha Marabia, molok Konferénsia dahuluk hala’o iha Maubai, Rejiaun Militar Sentral, iha 1981, atu reorganiza fila fali Rezisténsia Nasionál. Nune’e, ita presiza tau atensaun espesiál ba fatin istóriku ida ne’e. Iha ne’ebá mós rai monu dadaun tanba populasaun tesi ai arbiru. Ita presiza hamatak no hafurak fila fali Marabia hanesan horiuluk. Marabia sei tama abanbairua iha roteiru turismu istóriku nian.

Juventude Timor-Leste
Ha’u-nia laran haksolok tebetebes tanba kampaña nasional ne’e hahú iha área Estátua Amu Papa João Paulo II, ho kedas múzika hosi grupu joven ida hanaran KRAKEN, ho hananu “Hadomi Natureza”. Iha mós grupu joven sira seluk hanaran: Estudante Hadomi Natureza, ho esperiénsia tinan sanulu ona, Akadémika Hadomi Natureza, ho esperiénsia tinan neen, Assosiasaun Nasional Juventude Hadomi Natureza, ho esperiénsia tinan neen, Jerasaun Hadomi Natureza, Adventure Timor-Leste no Juventude Mahein Ramelau. Ho partisipasaun hosi grupu joven sira ne’e hotu, ne’ebé hadomi nanis natureza, ha’u fiar katak ita-nia kampaña nasional ida ne’e, sei hetan susesu.

Povu doben Timor-Leste
Tanbasá ha’u hanaran Kampaña Nasional ida ne’e nu’udar “Sidadaun ida, ai-oan ida”?

Tanba ha’u hakarak dada atensaun hothotu nian atu haree ba sidadaun ida-idak, nu’udar forsa-metin ida ne’ebé bele kaer metin ita-nia hakarak koletivu: hamatak ita-nia rain atu garante ambiente furak no saudável ba jerasaun ohinloron no tuir mai.

Iha rai ne’ebé de’it iha mundu, futuru di’ak no saudável signifika moris beibeik iha ambiente-matak ho espésie oioin buras iha fatin hothotu: iha foho-leten no iha rai-tetuk, iha bee-dalan no debu-ninin no mós iha tasi-ibun.

 

Bainhira ai-hun barbarak buras hamutuk, ninia abut kaer metin rai no ninia sanak ho tahan-buras tanen udan-been no hamenus forsa udan-been nian bainhira monu iha rai-leten. Neineik-neneik udan-been tun ba rai okos, no bee iha rai-okos ne’e mak ita dada-sai fali mai ita, bainhira ita baku-bee ka halo bee matan. Ita bele hetan beibeik bee-moos hosi ita-nia rai-okos bainhira ita la tesi ai arbiru, iha foho-leten no iha bee nia-dalan. Foho-matak no bee-dalan-matak garante funsaun basia hidrográfika nian – área ne’ebé iha funsaun kapta udan-been no garante bee ne’e tun beibeik ba mota boot sira, debun sira no ba rai-okos. Bee mota nian no hosi rai-okos ne’e mak garante ita-nia moris no dezenvolvimentu ekonómiku.

Bainhira ita la tesi ai arbiru, iha foho-leten, ita sei hetan bee-moos babeibeik. Rai sei la halai no ita sei la lakon rai-bokur ne’ebé ita presiza ba agrikultura. Konservasaun ba rai no bee sei hamoris seguransa alimentár.

Ai-hun sira iha funsaun seluk importante mós. Iha ita-nia ambiente iha dióxidu karbonu, gás ne’ebé ai-hun sira presiza ba sira-nia moris. Ai-hun sira dada-tama gás ne’e ba sira-nia isin lolon no hamutuk ho bee no enerjia husi loron, sira prodús sira-nia hahán rasik. Iha prosesu ne’e, ai-hun sira husik-sai oxijéniu ba ambiente – gás ne’ebé importante ba ita-nia vida.

Hosi haklaken ida ne’e, ita hotu bele haree katak ita ema presiza duni hamaus natureza ne’ébé hadulas ita. Ita presiza ai-laran sira, ho ai-hun bot no ai-kiik sira, atu ita bele iha saúde di’ak.

Hosi ohin ba oin, ita hein katak sidadaun ida-idak sei haforsa ninia-an liután, atu kaer metin kompromisu boot ida ne’e: Kuda ai-oan ida, no haree oinsá tau matan ba ai-oan ida ne’e to’o nia abut kaer metin rai no ninia sanak buras babeibeik, tinan ba tinan.

Ho kampaña “sidadaun ida, ai-oan ida”, ita hakarak eduka ita-nia ema atu haburas no hametin domin ho responsabilidade hosi sidadaun ida-idak ba ai-hun ida.
Domin ho responsabilidade husu atensaun espesiál no ita tenke hatutan kampaña ida ne’e ba knua hotuhotu.
Sidadaun ida, ho otas kiik ka boot, feto ka mane, bele kuda iha fatin ida ne’ebé fásil liu ba nia, atu tau matan babeibeik.

Ita sei haforsa kampaña ida ne’e ho esforsu koletivu hosi familia ida-idak, hosi komunidade ida-idak, hosi entidade no organizasaun ida- idak, hosi konfisaun relijioza ida-idak, hosi eskola, aldeia, suku, sub-distritu no munisípiu ida-idak. Esforsu sira ne’e hotu sei kontribui ba hamatak, lalais liu, ita-nia rai doben ida ne’e.

Ai-hun sira ne’ebé ita kuda iha área Estátua Amu Papa João Paulo II, Tasitolu no Golgota sei hetan domin espesiál hosi ita-nia alin eskuteiru sira, lideransa komunitária no populasaun lokál. Sira ne’ebé ita kuda iha Marabia sei hetan domin hosi lideransa komunitária no populasaun lokál. Nune’e, ha’u fiar katak ai-oan sira ne’ebé ita kuda ohin no iha loron tuir mai, sei buras babeibeik. Diresaun Nasional Florestas hato’o ba área tolu ne’e ai-horis rihun tolu atus neen, ne’ebé sei kuda ohin no iha loron tuir mai.

Maluk sira,
Ikus liu ha’u hakarak hatete katak Kampaña Nasional “sidadaun ida, ai-oan ida” la’ós atu promove ema ida, personalidade ka entidade ruma. Ita hahú kampaña ne’e, nu’udar inisiativa hosi Prezidente Repúblika maibé ho hanoin katak ita sei hatutan babeibeik nu’udar responsabilidade koletiva ida, atu salva ita-nia rain hosi udan sobu, atu ita bele hetan bee-moos babeibeik no kaer-metin rai-bokur ne’ebé ita prezisa ba agrikultura.

Estadu Timor-Leste hatudu kedas nia kompromisu atu proteje natureza bainhira ita hahú ukun-an, liuhosi lei, polítika, planu nasional espesífiku atu tanen biodiversidade, kombate degradasaun no alterasaun klimátika.

Iha ona insiativa oioin iha nível nasional hosi organizasaun naun-governamentál sira no hosi Diresaun Nasional Florestas, hodi hamatak Timor-Leste tomak.
Proteje ambiente tama iha ha’u-nia lista kompromisus, nu’udar Prezidente Repúblika.

Ho kampaña nasional ida ne’e, ita sei ajuda hamatak ita-nia rai doben, pelu menus, ho ai-hun millaun ida.

Obrigada ba hothotu nia apoiu, liuliu ba Diresaun Nasional Florestas, ne’ebé fornese ai-horis ba kampaña ida ne’e.
Parabéns ba Komisaun Organizadora Kampaña ne’e nian.
Viva Timor-Leste matak, malirin no furak ba ita hotu no ba ita-nia oan no beioan sira, iha tempu tuir mai!
Obrigadu.