MENSÁJEN HUSI S.E. PREZIDENTE REPÚBLIKA BA V KONGRESU AMTL

by Mídia PR Posted on

“Ha’u husu ba imi atu Kumpre imi-nia dever ho onestidade no dedikasaun hodi imi bele dignifika juramentu ne’ebé imi halo hodi serví Povu no Nasaun”

Señor Vice-Ministro Saúde

Señora Presidente AMTL

Señor Reprezentante OMS

Señores Membrus AMTL

Señoras  no Señores

Ilustres Konvidadus,

Loron ksolok no hako’ak boot ba maluk sira hotu.

Ho onra no orgullu mak ha’u simu konvite husi Prezidente AMTL (Associação dos Médicos de Timor-Leste) hodi fó liafuan ruma iha abertura  V Kongresu AMTL nian ho tema ‘Partisipasaun Médikus iha Prosesu Dezenvolvimentu Nasional’.

Ha’u hein katak, durante loron rua nia laran, imi konsegue halo diskusaun  klean kona-ba knaar importante médiku sira-nian iha prosesu dezenvolvimentu nasional, no hadi’a mós imi-nia estrutura hodi kontinua hala’o imi-nia kna’ar nu’udar organizasaun ida ne’ebé halibur médiku profisionál sira hotu, hodi defende direitus ne’ebé iha relasaun ho  imi-nia profisaun no kontribui ba polítika saúde ne’ebé di’ak liu ba ita-nia rain.

Ita-nia Konstituisaun dehan katak kuidadu médiku hanesan direitu fundamentál ida ba sidadaun hotu-hotu no, nune’e, Governu tenke promove no hari’i sistema nasional saúde ida ne’ebé universál, jerál, gratuitu (katak la selu), desentralizadu no partisipativu.

Tanba ne’e, Médiku sira, iha Timor-Leste tomak, iha responsabilidade boot atu serve ita-nia populasaun tomak no Estadu tenke  garante katak sidadaun hotu-hotu iha asesu ba servisus saúde ho kualidade.

Saúde mak kondisaun fundamentál ida ne’ebé sustenta dezenvolvimentu iha nasaun ne’ebé de’it. Dezenvolvimentu sustentável tenke hari’i ho respeitu ba direitus fundamentais sidadaun sira-nian tanba motór ba dezenvolvimentu mak Ema. Dezenvolvimentu  bele halo de’it bainhira ita iha sidadaun saudável.

Médiku sira

Ohin imi halibur malu iha salaun ida ne’e hodi halo imi-nia kongresu, hodi hadi’a imi-nia estrutura, hodi organiza imi-nia hanoin no hahalok.

Molok médiku ida  hahú nia responsabilidade, nia halo juramentu, hanaran  juramentu- de-Hipócrates. Médiku ida-idak jura katak nia sei ‘pratika medisina ho onestidade’ no sei kumpre dever  ‘servi ema’.

Nune’e, Prezidente Repúblika iha konfiansa iha imi-nia sentidu responsabilidade, nu’udar profisionál, nu‘udar ajentes ba mudansa iha área ida ne’ebé importante ba ita-nia rain.

Iha ita-nia ukun-an to’o ohinloron,  ita hakaat ona pasu lubun ida ne’ebé importante hodi garante saúde no bein-estar ba ita-nia Povu. Númeru médikus iha ita-nia rai-laran aumenta babeibeik no, ohinloron, ita iha ona maisoumenus médiku totál rihun ida, koloka to’o  nível suku, besik liu ba populasaun.

Timor-Leste hetan susesu ida ne’e tanba hetan apoiu husi nasaun sira seluk. Nune’e, Prezidente Repúblika hakarak hato’o liafuan  espesiál tebes ba Cuba, país ne’ebé ajuda fó formasaun ba ita-nia médiku sira, liuhusi kursu hala’o iha Cuba no iha Timor-Leste, ho tulun husi médiku kubanu

sira. La haluha mós kooperasaun internasionál tomak ne’ebé Timor-Leste simu, iha área saúde, husi nasaun sira seluk, liuhusi governu ba governu,   programa voluntáriu sira,  vizita husi ró -ospital sira no seluk-seluk tan.

Ita-boot sira mak iha kbi’it no responsabilidade boot liu atu halo diagnóstiku loloos kona-ba estadu saúde iha ita-nia rain. Dadus estatístikus husi Ministériu Saúde hatudu katak ita hetan ona susesu lubun ida iha áreas balun, hanesan  kuidadus pré-natal ba ita-nia feton-isin rua sira no ba kosok-oan sira, persentájen labarik sira tuir programa imunizasaun aumenta no seluk-seluk tan. Maibé ita hotu-hotu hatene katak  ita sei lori tempu naruk atu  hadi’a sektor saúde iha ita-nia rain.

Ohinloron moras hanesan tuberkuloze no HIV  sai preokupasaun boot tebetebes.  Númeru ema mate  husi moras rua ne’e aas tebetebes ohinloron. Situasaun ida ne’e ezije resposta efisiente no lalais husi Estadu Timor-Leste. Moras mentál mós sai ona preokupasaun boot ida ba Prezidente Republika.  Ita-nia ema barak mak hetan moras mentál maibé ita seidauk iha infraestrutura, ekipamentu médiku no rekursus umanus  espesializadus natón hodi bele tau matan ba sira ho efisiénsia.

Foin lalais ne’e, Prezidente Repúblika veta Orsamentu Geral du Estadu ba tinan 2019.  Foti desizaun ida ne’e tanba haree katak iha dezekilíbriu orsamentál aas tebtebes no  alokasaun osan ladún fó benefísiu ba sidadaun sira. Pursentu sanulu de’it mak fahe ba edukasaun no formasaun profisionál, saúde, agrikultura no turismu. Valór ida ne’ebé kiik no labele satisfáz nesesidades iha áreas servisus sosiais no la fó dalan ba kreximentu ekonómiku iha área sira ne’e, inklui área saúde nian, ne’ebé hetan de’it 3% husi total 10% ne’e.  Prezidente Repúblika haree katak OGE 2019  la hatuir Programa Governu ne’ebé aprova husi Parlamentu Nasional kona-ba investe iha kapitál sosiál no,  iha ita-nia ema,  nu’udar ita-nia rekursu boot liu.

Iha tinan kotuk, 2018, ita-nia Estadu gasta millaun 7.8  tanba haruka pasiente sira ba halo tratamentu iha rai-liur. Ida ne’e akontese  tanba ita seidauk iha rekursus umanus kualifikadus no ita seidauk iha infraestrutura no ekipamentu loloos  hodi  trata ita-nia pasiente sira iha rai-laran.

 

Médiku sira

Liuhusi AMTL,  imi iha obrigasaun no potensiál atu halibur médiku sira hotu, atu dezempeña imi-nia funsaun no aplika imi-nia juramentu atu  serví Nasaun no  Povu. Imi tenke kontribui ho dalan ida ne’ebé efetivu liu hodi valoriza profisaun médika no, nune’e, kontribui ho  prestasaun servisus  saúde ho kualidade  ba populasaun.

Hanesan ajentes ba mudansa,  imi sei fó  kontribuisaun atu halo diagnóstiku loos ida kona-ba estadu saúde iha ita-nia rai-laran. Prioridade saída mak  governu no instituisaun relevante sira tenke tau atensaun no sá orsamentu no meius mak presiza. Imi-nia lian bele salva ema barak ne’ebé ohinloron hetan moras maibé bele hetan fali saúde di’ak.

 

Estadu tenke investe iha formasaun rekursus umanus kualifikadus iha área sira ne’ebé afeta liuliu ita-nia populasaun. Ita tenke aposta iha medisina preventiva.   Aposta ida ne’e hasees ita-nia ema husi moras  no hamenus  kustus ba Estadu abanbairua,  iha área saúde nian. Médiku sira koloka iha suku hotu-hotu iha rai laran. Imi iha kondisaun atu hala’o servisu besik ho komunidade sira no responsável lokál-sira hodi halo mudansa ba atitudes no ábitus. Iha fulan Outubru liubá Associação Farmacêuticos husi Países Língua Portuguesa, hasoru malu iha Cidade  Praia, iha Cabo Verde, no sira fahe sira-nia  preokupasaun boot kona-ba ‘rezisténsia anti-mikrobiana’ ne’ebé akontese tanba pasiente sira la halo sira-nia tratamentu to’o rohan. Bainhira pasiente sente katak nia di’ak ona, nia para ninia tratamentu. Ida ne’e hanesan ezemplu ida ne’ebé afekta mós ita-nia ema barak. Médiku sira, ne’ebé hela besik populasaun, bele ajuda halo mudansa.

Preokupasaun seluk mak ita-nia labarik sira moris ho má-nutrisaun jerál no grave tebetebes. Médiku sira tenke servisu hamutuk ho instituisaun sira seluk hanesan edukasaun, solidariedade sosiál, agrikultura, hodi kombate má-nutrisaun liuhosi fahe informasaun no muda ábitu alimentár sira iha komunidade nia leet. Hamutuk hadi’a ementa ba merenda eskolar iha eskola hotu-hotu iha rai-laran, hodi garante alimentasaun ida ne’ebé saudável no nutritivu liu ba ita-nia labarik sira.

Ita tenke sosa lalais ekipamentu ba ospitál no klínika sira, liuliu ba nesesidade urjente sira  ne’ebé afeta maioria pasiente sira. Ekipamentu barak mak sosa ona maibé la funsiona ohinloron.  Nune’e, importante tebebetes prepara uluk tékniku espesializadu atu uza ekipamentu ida-idak ho di’ak no  halo manutensaun regulár. Liuhusi dalan ida ne’e mak ita bele garante prestasaun servisus di’ak iha rai-laran no  hamenus kustus tratamentu saúde.

Infraestruturas mós importante tebes atu hadi’a área saúde nian. Médiku timoroan sira koloka ona to’o iha suku maibé postu saúde seidauk kompletu iha suku hotu-hotu. Ita-nia inan no feton sira, atu tur-ahi, susar tebes atu hetan asesu ba ospitál!

Médiku sira hotu

Dala ida tan ha’u deseja katak imi-nia kongresu durante loron rua nia laran sei lao ho di’ak no susesu. Tanba imi-nia organizasaun halo kongresu, ne’e momentu di’ak ida hodi imi halo refleksaun hamutuk kona-ba saída mak imi halo ona, saída mak imi sei bele halo liután hodi kumpre imi-nia responsabilidade nu’udar ajentes mudansa no transformasaun iha prosesu dezenvolvimentu umanu. Ha’u fiar katak imi iha potensiál boot ida hodi sai parseiru ida ne’ebé efetivu no ativu iha ita-nia rain.

Kumpre imi-nia dever ho onestidade no dedikasaun hodi imi bele dignifika juramentu ne’ebé imi halo hodi serví Povu no Nasaun!

Susesu ba V Kongresu!

Obrigadu barak.