PREZIDENTE REPÚBLIKA PROMULGA DEKRETU N°3 / V HOSI PARLAMENTU NASIONÁL

by Mídia PR Posted on

DEKLARASAUN BA IMPRENSA

PREZIDENTE REPÚBLIKA PROMULGA DEKRETU N°3 / V HOSI PARLAMENTU NASIONÁL

Iha 13 dezembru 2018, Sua Exelénsia Prezidente Repúblika uza vetu polítiku hodi haruka-fila ba Parlamentu Nasionál “Dekretu Parlamentu Nasionál ne’ebé halo alterasaun dahuluk ba Lei n° 13/2005, 2 Setembru, Lei Atividades Petrolíferas”, tuir kbiit ne’ebé Konstituisaun Repúblika fó ba Prezidente Repúblika, liuhosi artigu 85°,alínea a), no artigu 88, n°1.

Sua Exelénsia Prezidente Repúblika veta Dekretu Parlamentu Nasionál nº 3/V no haruka-fila ho Mensájen ida, ho data 13 dezembru 2018. Iha mensájen ne’e, ho kbiit husi artigu 88, númeru 1, Prezidente Repúblika husu ba Parlamentu Nasionál atu tetu fila fali Diploma ne’e.

Parlamentu Nasionál aprova fila fali Dekretu nº 3/V ho 41 ho 41 votus a-favor no votu 1 kontra no nune’e, tuir artigu 88, n° 2, konfirma ho maioria absoluta Diploma ne’ebé hetan vetu husi Prezidente Repúblika. Parlamentu Nasionál hato’o Dekretu konfirmadu ne’e ba Prezidente Repúblika liuhosi karta ho data 10 Janeiru 2019 no Prezidénsia Repúblika simu iha loron tuir kedas.

Prezidente Repúblika haree fila fali Dekretu ne’ebé Parlamentu Nasionál konfirma no katak la muda buat ida molok haruka-fila ba Prezidente Repúblika atu promulga.

Nune’e, Prezidente Repúblika tenke promulga Dekretu Parlamentu Nasionál nº 3/V, iha loron ualo nia laran, hahú sura husi loron simu Dekretu ne’e, tuir parte finál n°2, artigu 88°, Konstituisaun Repúblika.

Nune’e, iha loron hanesan Deklarasaun ba Imprensa ida ne’e nian, Sua Exelénsia Prezidente Repúblika promulga Dekretu Parlamentu Nasionál nº 3/V, – ne’ebé aprova primeira alterasaun ba Lei nº 13/2005, 2 setembru, Lei Atividades Petrolíferas. Ho promulgasaun hosi Prezidente Repúblika, Dekretu Parlamentu Nasionál ne’e nakfila ba Lei.

Dekretu nº 3/V husi Parlamentu Nasionál, hetan vetu polítiku husi Prezidente Repúblika maibé Parlamentu Nasional aprova fila fali no nune’e, Prezidente Repúblika tenke promulga Dekretu ida ne’e tuir parte finál n°2, artigu 88° Konstituisaun haruka. Maibé la signifika katak Prezidente Repúblika hanoin hanesan ka konkorda ho sentidu polítiku ka jurídiku husi Dekretu ne’e. Nune’e:

Promulgasaun ida ne’e sei la taka dalan ba fiskalizasaun abstrata konstitusionalidade no legalidade ba Diploma ida ne’e. Pedidu fiskalizasaun abstrata konstitusionalidade no legalidade bele halo tuir artigo 150° Konstituisaun Repúblika.

Palásiu Prezidensiál Nicolau Lobato, Dili, 17 janeiru 2019