PREZIDENTE REPÚBLIKA HUSU PARLAMENTU NASIONÁL NO GOVERNU ATU HADI’AK EKONÓMIA NO FINANSEIRU NASAUN

by Mídia PR Posted on

KOMUNIKADU IMPRENSA

PREZIDENTE REPÚBLIKA HUSU PARLAMENTU NASIONÁL NO GOVERNU ATU HADI’AK EKONÓMIA NO FINANSEIRU NASAUN

Palásiu Prezidensiál Nicolau Lobato, Dili, 11 fevereiru 2019

Iha 7 fevereiru 2019, Prezidente Repúblika uza nia kbiit Konstitusionál hodi promulga Dekretu hosi Parlamentu Nasionál N.° 5/V – Orsamentu Jerál Estadu 2019.

Ho promulgasaun ne’e, fó ona kondisaun ba VIII Governu Konsitusionál atu promove no hadi’ak kondisaun esensiál ba povu nia moris. Promulgasaun ne’e sei tulun idozus, veteranus, maluk sira ne’ebé simu Bolsa-de-Mãe, ita-nia labarik sira-nia merenda eskolár no sidadaun sira ne’ebé simu benefísiu husi transferénsia públiku, pagamentu ba setór privadu ba dívidas ne’ebé Estadu halo.

Dekretu foun kona-ba Orsamentu Jerál Estadu 2019 iha alterasaun ne’ebé bele konsidera ba kurtu prazu ninian, ba períodu 2019. Alterasaun ne’e hatudu redusaun valór total Orsamentu, husi bilioens $ 2.132 ba bilioens 1.482. Ida ne ‘e signifika sei hasai hosi Fundu Minarai biliaun ida resin ( $ 1.196,4). Maibé tuir loloos foti de’it hosi Fundu minarai $ 529 milloens, korresponde ba Rendimentu Sustentável Estimadu (RSE, katak osan ne’ebé bele hasai tinan ida ne’e hosi Fundu Minarai ba Orsamentu Jerál Estadu 2019.

Maski hasai menus hosi Orsamentu Jerál Estadu, sukat ho Dekretu uluk ( 249% liu RSE) levantamentu osan husi Fundu Petrolíferu iha Dekretu foun ne’e liu nafatin RSE 126,2 %.

Tuir previzaun Governu, iha 2023, saldu finál Fundu Petrolíferu sei tun ba bilioens $12.

Ho hanoin sira iha leten Governu presiza uza reseita Fundu Petrolíferu ne’ebé fó benefísiu liu ba povu. Governu presiza prepara no realiza polítika sira ne’ebé hamenus risku sustentabilidade fiskál ba tempu naruk ninian tanba esplorasaun minarai iha Kampu Bayu Undan sei remata iha 2022.

Prezidente Repúblika husu Parlamentu Nasionál no Governu hadi’ak situasaun ekonómika no finanseiru nasaun nian tuir nafatin kritériu sira ne’ebé estabelese iha Lei Fundu Minarai. Investimentu husi fundu públiku sira tenke ho hanoin atu proteje Fundu Minarai ne’ebé aplika liuhusi Orsamentu Jerál Estadu. Prezidente Repúblika husu atu Estadu asegura unidade no espesifikasaun Orsamentu. Estadu mós tenke asegura transparénsia no promove fiskalizasaun jurídika administrativu ba gastus no investimentu husi Fundu Minarai.

Prezidente Repúblika husu atu Orsamentu Jerál Estadu ba 2020 mai ho orientasaun ida ne’ebé lori sustentabilidade ho rekursus renováveis no diversifikasaun ekonomia, ekilíbriu orsamentál, distribuisaun liu ba dezenvolvimentu umanu duké dezenvolvimentu fíziku, investimentu husi Fundu Petrolíferu lori retornu sosiál no ekonómiku ho prioridade ba kapitál umanu, edukasaun, saúde, atividade produtiva no empregu.

Iha 23 janeiru 2019 Prezidente Repúblika veta Orsamentu Jerál Estadu 2019 ho montante biloens $ 2.1 ho razaun sustentabilidade finanseiru iha ameasa nia laran, orsamentu la tuir Konstituisaun no lei estruturante sira, desikilíbriu orsamentál ne’ebé aas tebes no laiha polítika alternativa. Husi razaun sira ne’e, Prezidente Repúblika la konkorda ho alokasaun orsamentu ne’ebé ki’ik tebes ba edukasaun, saúde, agrikultura, bee-moos no saneamentu báziku.

Hafoin reapresiasaun ba Orsamentu Jerál Estadu 2019, Parlamentu Nasionál hasai de’it montante miloens $ 650 ne’ebé aloka ba sosa partisipasaun husi kompañia ConocoPhillips no Shell iha Greater Sunrise no la aumenta osan ba edukasaun, saúde, agrikultura, bee moos no saneamentu báziku.

Mídia PR