PREZIDENTE REPÚBLIKA PROMULGA LEI ORSAMENTU JERÁL ESTADU 2019

by Mídia PR Posted on

KOMUNIKADU IMPRENSA

PREZIDENTE REPÚBLIKA PROMULGA LEI ORSAMENTU JERÁL ESTADU 2019

Palásiu Prezidensiál Nicolau Lobato, Dili, 7 fevereiru 2019

Prezidente Repúblika Francisco Guterres Lú Olo, ohin, promulga Lei N. 5/V-Orsamentu Jerál Estadu 2019. Maski nune’e, Prezidente Repúblika iha nia rezerva rasik relasiona ho promulgasaun Lei Orsamentu Jerál Estadu.

Prezidente Repúblika sei hato’o nia analiza profunda ba Lei Orsamentu Jerál Estadu 2019, relasiona ho analiza vizaun mediu no longu prazu no situasaun oioin iha loron hirak tuirmai.

Iha 23 janeiru 2019 Prezidente Repúblika veta Orsamentu Jerál Estadu 2019 ho montante biloens 2.1 ho razaun sustentabilidade finanseiru iha ameasa nia laran, orsamentu la tuir Konstituisaun no lei estruturante sira, desikilibru orsamentál ne’ebé aas tebes no laiha polítika alternativa.

Parlamentu Nasionál halo reapresiasaun ba Orsamentu Jerál Estadu 2019 hafoin veto husi Prezidente Repúblika. Iha reapresiasaun Orsamentu Jerál Estadu, Parlamentu Nasionál hasai montante miloens $ 650 ba sosa asoens partisipasaun husi kompania ConocoPhillips no Shell tanba kontempla tiha ona iha Lei Atividade Petrolíferu ne’ebé Prezidente Repúblika promulga. Reapresiasaun Orsamentu Jerál Estadu ho montante biloens $ 1,482 aprovadu ho votus 40 no 25 kontra.

Mídia PR