selebrasaun Aniversáriu FALINTIL-Forsa Defeza Timor-Leste ba dala-18

by Mídia PR Posted on

 

Diskursu hosi Sua Exelénsia
Prezidente Repúblika, Dr. Francisco Guterres Lú Olo
Iha serimónia selebrasaun Aniversáriu FALINTIL-Forsa Defeza Timor-Leste ba dala-18
Kuartél-Jenerál F-FDTL, 2 Fevereiru, 2019

Señór Prezidente Parlamentu Nasionál,
Señór Primeiru-Ministru,
Señór Prezidente Tribunál Rekursu,
Señores Membrus Governu no Parlamento Nacional,
Ilustres Eis-Titulares Órgauns Soberania,
Señór Xefe Estadu-Maiór Jenerál FALINTIL-Forsa Defeza Timor-Leste,
Señóres Embaixadores no Reprezentantes Korpu Diplomátiku,
Xefe Estadu-Maior Jeneral Forsas Armadas Indonézia (TNI), Air Field Marshall HADI TJAHJANTO,
Vise-Xefe Estadu-Maior Jeneral Forsas Autodefeza husi Japão, Tenente-Jeneral TAKASHI MOTOMATSU,
Ilustres Veteranus no Kombatentes hosi Luta ba Libertasaun Nasionál
Ilustre konvidadu sira.
Señoras no Señores,
Militár sira,

Ohin ita selebra aniversáriu FALINTIL-FDTL nian ba dala sanulu resin ualo. Iha selebrasaunn ida ne’e, ita hanoin ba kotuk, ita hanoin-klean ba ohin-loron no ita haree mós ba futuru Instituisaun ida ne’e nian, ne’ebé ita harii no tenke kaer-metin nafatin, atu la’o ba oin, nu’udar nesesidade Nasaun no Estadu nian.

Iha loron-festa ida-ne’e, ha’u hakarak hato’o ulukliu ha’u-nia saudasaun no parabéns ba maluk sira hotu ne’ebé hala’o dadaun knaar iha Forsas Defeza hodi serbí Nasaun loron-loron, ho sentidu misaun no dedikasaun.

Ohin oportunidade mós ba ita hotu-hotu presta omenájen ba kontribuisaun veteranus FALINTIL sira-nian ba ita-nia luta ba independénsia nasionál, no mós ba memória mártir sira-nian, ne’ebé sakrifika-an ba ita-nia Pátria. Ita hakru’uk ba sira-nia esforsu, sira-nia aten-barani no sira-nia sakrifísiu. Ba sira-ne’ebé mate, ita la haluha sira-nia família.

Omenájen di’ak liu ba sira mak ita hatutan babeibeik eransa ida ne’ebé sira husik hela mai ita. Hosi eransa ida ne’ e, ita hasai inspirasaun atu hakat liu dezafiu sira ne’ebé ita hasoru ohinloron no sei hasoru abanbairua, iha prosesu dezenvolvimentu nasaun nian.

Distintu konvidadu sira. Militár sira
Estadu la iha bainhira la iha territóriu, la iha populasaun no la iha autoridade.
Autoridade Estadu nian hatuur ho Forsas Armadas hamutuk ho instituisaun seluseluk. Forsas Armadas mak garante soberania, defeza no seguransa territóriu nian. Tanba ne’e, Forsas Armadas ne’e sai instrumentu importante tebes ida ba Estadu nia lala’ok.

Kompete ba Estadu kaer-metin órden, asegura defeza no promove sosiedade nia moris-di’ak no progresu.
Iha nível polítiku, Forsas Armadas sira-nia koezaun no naran-kmanek presiza hetan atensaun maka’as.
Nune’e, órgaun soberania-sira tenke hakaas-an hodi fó tulun efetivu ba komandu ninia lala’ok no kondisaun sira ne’ebé Forsas Armadas presiza atu bele hala’o sira-nia knaar baibain ho di ‘ak.

Militár FALINTIL-FDTL sira,
Bainhira ita hanoin no ko’alia kona-ba Forsas Armadas, ita presiza kompreende uluk Nasaun ida ne’e, ninia istória no ninia futuru, nu’udar Estadu independente, soberanu no unitáriu.

Istória FALINTIL-FDTL nian kesi-metin ba oinsá ita harii Nasaun ida ne’e. Hanesan horiuluk, nu’udar FALINTIL, no hanesan mós ohin-loron, nu’udar FALINTIL-FDTL, militár sira, nu’udar kontinuadór, tane aas nafatin valór no prinsípiu fundamentál sira ne’ebé dada konfiansa, konsiderasaun no respeitu hosi ita-nia povu.

Bainhira ita hahú harii ita-nia Estadu, iha haksesuk kona-ba nesesidade atu organiza ka lae forsa militár permanente ida hodi defende ita-nia soberania.

Iha momentu susar tebes ida, iha ita-nia istória, ita deside harii FALINTIL-FDTL. Haree ba realidade, ita-nia lideransa foti duni desizaun loos ida. Ita-nia líder sira hatudu aten-barani, karáter no vizaun ba abanbairua, ba ita-nia moris koletivu, nu’udar Nasaun Independente ida.

Timoroan sira fó fiar no identifika-an ho Forsas Defeza.
To’o ohin loron, FALINTIL-FDTL, hala’o sira-nia lala’ok ho di’ak no, ho konduta ezemplar ida ne’e, kontribui maka’as ba ita-nia pás no estabilidade.

Hatudu mós maturidade boot, apartidarizmu, katak, la hali’is ba partidu ne’ebé de’it, lealdade ba podér polítiku eleitu, no respeitu ba Konstituisaun no Lei sira. Nune’e, FALINTIL-FDTL kontribui maka’as ba ita afirma ita-nia soberania no hametin ita-nia estabilidade no demokrasia.

Estadu harii Forsas Defeza ba misaun ida: atu hala’o defeza militár tuir Konstituisaun haruka. Forsas Defesa sira simu formasaun liuliu ba misaun ida ne’e. Maibé sira mós bele partisipa, ho sira-nia rekursus rasik, hamutuk ho parte sira seluk, iha misaun sira seluk, bainhira presiza halo hamutuk.

Ohinloron, Timoroan sira-nia seguransa no moris-di’ak ezije Forsas Defeza servisu hamutuk ho Forsas no Servisus Seguransa iha misaun protesaun sivíl, iha knaar sira ne’ebé iha relasaun ho nesesidades bázikas no atu hadi’a kualidade moris ba ita-nia populasaun sira.

Iha nível seguransa interna, Forsas Defeza bele haforsa Forsas Seguransa bainhira presiza duni hatuur lalais autoridade no garante seguransa ba populasaun sira. Maibé situasaun ida ne’e labele akontese beibeik. La’ós regra ida katak militár sira bele hala’o polísia nia knaar. Bainhira militár halo beibeik polísia ninia knaar, hahalok ne’e hafraku imajen Estadu nian no hasees Forsa Defeza hosi ninia misaun prinsipál.

Atu asegura soberania, Timor-Leste tenke hakbesik-an ba rai sira seluk. Timor-Leste presiza estratéjia defeza militár ida ne’ebé la’o ho diplomasia no ko’alia ho ibun mamar no matenek, nu’ udar dalan atu hasees-an no rezolve konflitus no hetan parseria estratéjika hodi haburas ninia kapasidade militár iha ámbitu seguransa kooperativa.

Hare’e ba ámbitu ida ne’e, ha’u hakarak hato’o agradesimentu ba nasaun belun hotu-hotu ne’ebé kontribui ona ba kapasitasaun no dezenvolvimentu Forsas Defeza Timor-Leste nian.

Susar tebetebes ba planeadór militár no ukun-na’in sira atu define forsa militár no kapasidade militár bainhira Estadu sira iha rekursus limitadus tebes. Biar nune’e, tuir ha’u-nia hanoin, ita presiza hala’o nafatin esforsu ba prioridade sira tuirmai ne’e:
− hametin no haburas reforma lejizlativa sira-ne’ebé la’o hela tuir ita-nia Konseitu Estratéjiku Defeza no Seguransa;
− fó kapasitasaun ba Rekursus Umanus no sosa ekipamentu ba forsa sira, tuir kritérius loloos no, ikusmai,
− promove forsas sira-nia partisipasaun iha misaun pás nu’udar fatór dezenvolvimentu, motivasaun no prestíjiu ba forsa sira no ba ita-nia país.

 

Área relevante seluk ida ne’ebé ita presiza konsidera mak oinsá valoriza profisaun militár no respeita kondisaun militár sira.

Relasiona ho ida-ne’e, ita presiza define loloos estatutu ba pesoál militár, ne’ebé serve iha Forsas Defeza nian, hahú ho Estatutu Kondisaun Militár ne’ebé seidauk define tuir lei, hodi identifika loloos kondisaun militár no tuir fali, halo revizaun ba Estatutu Militár sira-nian, atu haree loolos sira-nia devér, direitu no karakterístika seluseluk ne’ebé haketak sira hosi funsaun públika, iha ita-nia Estadu.

Militár sira FALINTIL-FDTL,
Uluk, ohin no aban-bainrua, Forsas Defeza nafatin komponente ida ne’ebé kontribui ba hatuur ita-nia identidade nasionál – valór ida ne’ebé hametin ita-nia Nasaun babeibeik no ida ne’ ebé halo imi-nia Komandante Supremu sente orgullu.

Ha’u hatene katak ita sei iha buat barak atu halo. Ha’u rekoñese esforsu sira ne’ebé imi halo ona no imi-nia dedikasaun ba Forsas Defeza no Nasaun.

Ha’u enkoraja imi atu mantein nafatin imi-nia espíritu unidade no kamaradajen atu hakiak nafatin eransa ne’ebé FALINTIL husik hela mai ita, Nune’e, imi sei simu beibeik, hosi ami hotu, Timoroan, ami-nia respeitu, konfiansa no konsiderasaun.
Obrigadu!