ESTADU NO SIDADAUN PRESIZA HAREE KLEAN LIUTÁN OINSÁ VALORIZA VETERANU

by Mídia PR Posted on

Prasa Proklamasaun Independénsia, Dili, 3 marsu 2019

Prezidente Repúblika Francisco Guterres Lú Olo iha serimónia komemorasaun Loron Nasionál ba Veteranus iha 3 marsu 2019, iha Prasa Proklamasaun Independénsia, husu estadu no sidadaun presiza haree klean liután oinsá valoriza Kombatente no Veteranu sira atu luta na’in sira kontinua sai ezemplu no modelu ba sidadaun ida-idak.

Estadu no sidadaun ida-idak presiza haree klean liután oinsá valoriza di’ak liu Kombatente no Veteranu timoroan-sira, ne’ebé sei moris hela. Kombatente no Veteranu balu kiak tebetebes no balun moras no ferik ka katuas ona. Barak husi sira la hetan asesu ba edukasaun formál ka formasaun profisionál, no nune’e, la hetan oportunidade empregu, iha tempu ukun- an. Barak mai hosi família kiak no lahatene lee no hakerek.

Prezidente Repúblika fó enfaze ba oinsá hala’o lalais prosesamentu rejistu no verifikasaun dadus, ho konxiénsia katak, ita-nia rikusoin boot ida mak luta-na’in sira. Sira mak ita-nia eroí, riin-metin ba ita nia mehi ukun rasik-an no riin –metin ba nasaun ida ne’e.

Valorizasaun ba kombatente no veteranu, informasaun báziku de’it lató. Governu Timor-Leste presiza hatene informasaun liután atu bele halo análize di’ak no prepara polítika tuir dadus loloos. Presiza hatene kona-ba ida-idak ninia estadu saúde (mentál, físika no mobilidade), situasaun finanseira, kondisaun hela-fatin, idade, servisu saída, iha ka la iha asesu ba servisu báziku, sá formasaun ka treinamentu mak simu hafoin 2002, iha dependente hira no ho otas hira, esperiénsia profisionál saída no oinsá hetan rendimentu ba moris loron-loron. Veteranu ida-idak iha nia problema rasik no ida-idak merese simu tratamentu espesiál.
Importante ba Estadu tetu uluk sira-nia kondisaun moris ohinloron. Subsídiu de’ it la dignifika sira no dala ruma hamosu problema seluk. Estadu presiza haree programa reinsersaun sosial atu sira bele moris ho dignidade nafatin, nu’udar ita-nia eróis. Luta-nain sira, ne’ebé sei saudável, bele partisipa mós iha prosesu dezenvolvimentu ekonómiku no sosiál ho ninia kbiit no matenek rasik.

Estadu bele ajuda luta-nain sira atu uza di’ak liu subsídiu ne’ebé ohinloron sira simu liuhusi harii Fundu Veteranus. Fundu ne’e sei utiliza ba serbisu sira relasiona asisténsia médika, edukasaun no formasaun profisionál, asisténsia ba terseira idade no nesesidade seluk.

Prezidente Repúblika husu ba luta-na’in sira aleinde iha direitu iha mós dever nu’udar sidadaun.

Espíritu sakrifísiu no dedikasaun fó-an tomak ba bein-estar, onestidade no espíritu domin Pátria no Povu tenke sai ezemplu no modelu ba sidadaun hotu-hotu. Estadu presiza luta-nain sira atu mantein pás no estabilidade no atu partisipa mós iha dezenvolvimentu sósiu-ekonómiku.

Tuir dadus hosi Sekretariadu ba Asuntus Kombatentes Libertasaun Nasional, Timor-Leste iha ohinloron kombatentes rihun rua nulu resin hitu, atus hitu ualu nulu resin ida (27.781), korresponde ba 2.1% populasaun. Tinan-tinan númeru ne’e aumeta no subsidiu mós aumenta. Husi rejistu ne’ebé estadu hahú loke iha 2002, sidadaun balu aproveita sai veteranu. To’o ohinloron seidauk dezenvolve baze-de-dadus kompletu, sistematizadu no atualizadu.

Mídia PR