PREZIDENTE REPÚBLIKA APOIA DIREITU AUTO-DETERMINASAUN POVU SAHARA OSIDENTÁL

by Mídia PR Posted on

KOMUNIKADU IMPRENSA

Dili, 29 marsu 2019

Prezidente Repúblika Francisco Guterres Lú Olo hato’o mensajen apoiu ba direitu auto-determinasaun povu Sahara Osidentál.

Roque Rodrigues ne’ebé reprezente Xefe Estadu hato’o mensajen Xefe Estadu iha Konferénsia Internasionál ba Direitu Auto-Determinasaun Povu Sahara Osidentál ne’ebé organiza husi Southern Africa Development Communities (SADC) iha Pretória, Afrika Sul iha loron 25-26 marsu 2019.

Prezidente Repúblika iha nia mensajen hato’o:
“Ha’u fiar katak partisipante konferénsia ne’e sei kriativu no kontribui atu buka dalan seguru no solidu hodi hakotu dezafiu kolonia ikus iha kontinente Afrika liuhusi respeitu direitu inaliavel povu Sahara ba auto-determinasaun. Ami iha ne’e hamutuk ho imi atu espresa ami-nia apoiu tomak ba inisiativa ida ne’e no hametin ami-nia suporta ba auto-determinasaun povu Sahara.”

Timor-Leste nu’udar nasaun ida ne’ebé kontinua fó nia apoiu ba direitu auto-determinasaun povu Sahara Osidentál. Sahara Osidentál iha nia reprezentasaun iha Timor-Leste

Desizaun ba Konferensia Solidariedade ida ne’e deside liuhusi Simeira Ordináriu ba dala 38 husi Xefe Estadu no Governu SADC iha Agustu 2018.

Nasaun 24 hamutuk ho lider Movimentu Libertasaun Afrika no partidu polítiku ho reprezentante organizasaun sosiedade sivil partisipa iha Konferénsia Internasionál ne’e apoiu atu implementa rezolusaun ONU no dezisaun African Union kona-ba Sahara Osidentál atu hetan solusaun dame no permanente hodi hatan ba nesesidade povu Sahara Osidentál.

Sahara Osidentál nu’udar uniku kolónia iha Afrika ne’ebé to’o ohin loron moris iha okupasaun Maroko no seidauk hetan solusaun internasionál. Iha tinan-1960 Asemblei Jerál ONU hasai rezolusaun atu garante independensia nasaun kolonia no povu no rezolusaun ba Sahara Osidentál atu España liberta Sahara husi dominasaun koloniál. Iha tinan 1991 Konsellu Seguransa ONU hasai rezolusaun 690 atu estabelese misaun ONU ba referendum.

Southern Africa Development Communities nu’udar organizasaun intergovernamentál ne’ebé harii iha 1992 atu hametin kooperasaun no integrasaun sosiu-ekonomiku, polítiku no seguransa nasaun Afrika Austral.

Konferénsia Internasionál ne’e ko partrosinadu husi Afrika Sul no Namíbia.

MÍDIA PR