PREZIDENTE REPÚBLIKA HUSU ESTADU TAU ATENSAUN BA VETERANU KBIIT-LAEK

by Mídia PR Posted on

Dili, 2 marsu 2019

Prezidente Repúblika Francisco Guterres Lú Olo husu Estadu tau atensaun ba veteranu kbiit-laek no liuhusi harii fundu espesiál ida. Prezidente Repúblika hato’o hanoin ida ne’e iha semináriu organiza husi Sekretáriu Estadu Asuntu Veteranu hodi komemora loron veteranus nian iha loron 2 marsu 2019, iha Centro de Convenções de Dili.

Iha abertura ba semináriu ne’e, Prezidente Repúblika husu:

“Ha’u hein mós hosi partisipante-sira atu fó idéias foun no haree oinsá hatasak projetu harii Fundu Veteranus, ne’ebé ha’u konsidera nu’udar dalan di’ak ida atu hamenus dependénsia Kombatentes no Veteranus ba ita-nia Fundu Soberanu mesak, Fundu Minarai, ne’ebé sustenta Orsamentu Jeral Estadu tinan-tinan.”

Prezidente Repúblika nu’udar promotór ba diversifikasaun ekonomia nu’udar dalan atu hamenus dependénsia ba Fundu Petrolíferu tanba ne’e ho kriasaun Fundu Veteranu nian bele garante dignidade Veteranus nian bá futuru no povu Timor-Leste nia sasin moris ba dezenvolvimentu sosiu-ekonomiku no kulturál.

Prezidente Repúblika husu ba veteranu sira, nu’udar sidadaun, tenke kontribui nafatin ba pás no estabilidade no ba dezenvolvimentu ekonómiku no sosial nasaun nian.Prezidente Repúblika haksolok tebes ho Progama VIII Governu iha mós hanoin atu hamosu fundu espesiál ida, hanaran Fundu Veteranus hodi hatutan ideia ne’ebé VII Governu Konstitusionál hato’o iha semináriu komemorasaun loron veteranu tinan kotuk.

Konsellu Nasionál Kombantentes Libertasaun Nasionál iha papél importante atu realiza kriasaun Fundu Veteranu nian. Liuhusu instituisaun ida ne’e veteranu sira sei tau hamutuk hanoin hodi bele iha planu oinsá fó protesaun ba nia membru sira. Iha novembro 2018, Primeiru Ministru nomea ona membru Komisaun Instaladora hodi hala’o preparativus ba primeiru Kongresu.

Prezidente Repúblika husu atu liuhusi semináriu ne’e veteranu sira bele buka dalan oinsá de’it, atu hanoin klean no buka solusaun ba problema sira ne’ebé mosu ohinloron no sei mosu iha loron abanbainrua no afekta liuliu kombatentes kbiit-laek sira-nia moris ohinloron no sei afeta mós bá sira-nia oan ninia futuru oin mai.

Midía PR