by Mídia PR Posted on

Palásiu Prezidensiál Nicolau Lobato, Dili, 1 abril 2019

Prezidente Repúblika Francisco Guterres Lú Olo husu atu Governu Japaun kontinua halo diskusaun ho Governu Timor-Leste kona-ba planu rehabilitasaun projetu Aeroportu Internasionál Prezidente Nicolau Lobato.

Prezidente Repúblika hato’o hanoin ne’e ohin bainhira hasoru malu ho Embaixadór Japaun ba Timor-Leste Hiroshi Minami ne’ebé aprezenta projetu aeroportu ba Xefe Estadu.

Embaixadór Minami hateten katak Governu Japaun sei foti desizaun ba projetu fulan ne’e no governu husi nasaun rua sei halo konkordansia iha fulan maiu 2019. Projetu ba rehabilitasaun aeroportu sei hahú iha marsu tinan oin ho montante orsamentu $ miloens 44. Projetu ne’e sei la’o durante fulan rua-nulu no konklui iha dezembru 2021.

Governu Japaun fó nia apoiu dezenvolvimentu ba Timor-Leste iha projetu kooperasaun tékniku, fornese asesór ba instituisaun prinsipál estadu ninian, programa parseria ho JICA, doasaun no impréstimu. Iha parte infraestrutura ninian, Governu Japaun apoiu konstrusaun Ponte Komoro no harii uma foun ba Fakuldade Enjinaria, Siénsia no Teknolojia Universidade Nasionál Timor-Leste.

MÍDIA PR