MANTEIN PRESTÍJIU ORDEN TIMOR-LESTE PREZIDÉNSIA REPÚBLIKA PROPOIN PRÉMIU FOUN BA KONDEKORASAUN

by Mídia PR Posted on

MANTEIN PRESTÍJIU ORDEN TIMOR-LESTE

PREZIDÉNSIA REPÚBLIKA PROPOIN PRÉMIU FOUN BA KONDEKORASAUN

Singapura 15 Abril 2019

Reprezentante Prezidénsia Repúblika, Chefe Casa Civil, Francisco Maria de Vasconcelos diskute ho kompaña fornesedór medalla Eng. Leong Medallic Industries (ELM) ne’ebé reprezenta husi Gerard Leong Asistente Jerente Jerál, kona-bá idea ba produsaun Medalla foun ba Servisu Distintu no Medalla ba Servisu Públiku-de-Méritu, iha Sede 57 Medal House, Yishun Industrial Park A, Singapura, iha loron 15 fulan Abril 2019.

Chefe Casa Civil iha sorumutu ne’e informa katak, idea ba produsaun prémiu foun ne’e maka atu kontinua valoriza individu ka organizasaun sira hotu ne’ebé presta ona servisu exepsionál sira ba dezenvolvimentu nasionál, maibé tanba kritéria sira labele hetan Prémiu Orden Timor-Leste.

“Prémiu Orden Timor-Leste maka prémiu ida ho klase ka kategoria a’as liu iha Timor-Leste, tanba ne’e ita tenke matein nia prestíjiu no klase hodi garante katak kondekoradu ne’e ema ne’ebé merese duni no ba sira ne’ebé la hetan Orden Timor-Leste bele hetan prémiu ho klase seluk.” Hatete Chefe Casa Cívil.

Medalla ba servisu distintu sei entrega husi Prezidente Repúblika ba sidadaun nasionál ka internasionál ne’ebé presta servisu no dedikasaun exelente ba Prezidénsia Repúblika. Medalla ne’e mós bele fó ba organizasaun nasionál ka internasionál ne’ebé kontribui maka’as ba Timor-Leste.

Medalla ba Servisu Públiku-de-Méritu sei entrega ba funsionáriu públiku sira ho kontratu permanente ba sira nia dedikasaun-a’as ba Timor-Leste. Medalla ne’e sei fó deit ba servente públiku sira ne’ebé nunka hetan sanksaun disiplinaria no kriminál no mós nunka hetan valor menus ka insatisfatóriu iha avaliasaun dezempeñu.

Prémiu Orden Timor-Leste maka kondekorasaun prinsipál iha orden onorífiku Timor-Leste nian, inisia husi eis Prezidente Repúblika, José Ramos Horta liu husi dekretu lei númeru 20/2009, 24 Abril 2009 hodi fó rekoñesimentu ba kontribuisaun signifikativa husi sidadaun sira ba nasaun no mós ba umanidade.

Prémiu Orden Timor-Leste iha grau haat maka hanesan : Grande Colar, Colar, Medalla no Insígnia. Grau Grande Colar sei fo deit ba Xefe Estadu sira.

Iha sorumutu ne’e Chefe Casa Cívil asina mós kontratu públiku ba fornesemintu bens ho kompaña Eng Leong Medallic (ELM) hodi fornese Medalla Orden Timor-Leste ho Grau Colar 14 no Grau Medalla 30 ezemplar.

Medalla sira ne’e sei entrega husi Prezidente Repúblika ba kondekoradu sira iha loron nasionál sira hanesan 20 Maiu, 30 Agusto, 28 Novembru no loron nasionál sira seluk.

Hahu kriasaun Orden Timor-Leste iha 2009, Prezidénsia Repúblika servisu hamutuk ona ho kompaña ELM hodi fornese medalla ba Prezidénsia Repúblika. Kompaña ELM kompaña koñesida ida iha Singapura, estabelisida iha tinan 1968 no fornese servisu ba nasaun liu 30 inklui Timor-Leste. REMATA

MÍDIA PR