ENSUL RELATA DEZENVOLVIMENTU KONSTRUSAUN EDIFÍSIU DFCB BA PR

by Mídia PR Posted on

Palásiu Prezidensiál Nicolau Lobato, Dili, 01 abril 2019

Prezidente Repúblika Francisco Guterres Lú Olo simu vizita fundadór empreza ENSUL Engeharia Timor-Leste, António Simões Marquês Couto, ne’ebé relata ba Xefe Estadu kona-ba dezenvolvimentu konstrusaun Díli Financial Business Center (DFCB) ka Sentru Negósius no Finansas Díli.

António Couto hateten edifísiu ho investimentu 18 millões dolares, ne’ebé lokaliza iha Colmera, ho dimensaun 16.000 m², oras ne’e hala’o konstrusaun to’o ona andar-lima hosi andar-sanulu no obra ne’e sei remata iha tinan-2020 nia rohan.

Edifísiu ne’ebé sei domina ho besi no vidru ne’e, tuir António Couto, klasifika ho klase A no harii tuir padraun europeu no amerikanu.

Ba emprezáriu ne’ebé hanesan mós Konsul Onoráriu Timor-Leste iha Porto, Portugal ne’e, Prezidente Repúblika hato’o nia apoiu no husu atu involve mós timoroan sira iha projetu ida ne’e, atu hetan esperiensia hodi hakbiit sira-nia an.

Empreza ENSUL Engenharia ne’ebé hala’o servisu iha Timor-Leste dezde 2000, asina kontratu atu harii DFCB iha tinan-2012 no lansamentu ba konstrusaun ho fatuk-dahuluk realiza iha loron 16 fulan dezembru 2013.

MÍDIA PR