ENVIADU ESPESIÁL PR FRANCISCO MARIA DE VASCONCELOS PARTISIPA REUNIAUN ALTU NIVEL IHA ASEMBLEIA JERÁL ONU

by Mídia PR Posted on

KOMUNIKADU IMPRENSA

Dili, 7 Abril 2019

Prezidente Repúblika, Francisco Guterres Lú Olo, nomeia Francisco Maria de Vasconcelos, Chefe Casa Civil hanesan Reprezentante Prezidente Repúblika-nian hodi partisipa iha reuniaun altu nivel ba dala 73 husi Asembleia Jeral Nasaun Unidas hodi komemora sentenáriu estabelesimentu Organizasaun Traballu Internasionál (ILO-sigla Ingléz).

Eventu altu nivel ne’e, sei realiza iha sede Asembleia Jerál Nasaun Unidas nian iha loron 10 fulan Abril tinan 2019, iha sidade Nove Iorke, Estadus Unidos da América (USA).

Xefe estadu no xefe governu husi paíz oioin sei partisipa iha eventu altu nivel ne’e, no sei hato’o mensájen nasaun nian.
Enviádu Espesiál Timor-Leste hetan mós oportunidade atu hato’o mensájen Prezidente Republika nian iha reuniaun altu nivel ne’e.

ILO maka ajénsia multilaterál Nasaun Unidas nian ida ne’ebé espesializada iha kestaun sira relasiona ho traballu.

Timor-Leste sai estadu membru ILO nian ba 177 iha loron 19 fulan agustu 2003.
Organizasaun Traballu Internasionál, tulun Timor-Leste hasoru obstákulu sira iha redusaun ki’ak no kria kampu servisu ba nia populasaun sira.
ILO espesializa nia tulun ba Timor-Leste iha area prioridade tolu maka hanesan promosaun empregu ba joven sira, dezenvolvimentu ekonómia rural no mós governansa merkadu traballu.

Reprezentante Prezidente Repúblika ho Delegasaun Timor-Leste nian sei dezloka ba Nova Iorke ohin 7 to’o 11 Abril 2019. No sei kontinua vizita traballu ba iha Singapura husi loron 12 to’o 15 Abril 2019. Enviadu espesiál ho ekipa sei to’o hikas iha Timor-Leste iha loron 16 fulan Abril tinan 2019. (Media PR)

REMATA