CONSELHO NACIONAL DA JUVENTUDE CATÓLICA DE TIMOR-LESTE KONVIDA XEFE ESTADU SAI ORADÓR

by Mídia PR Posted on

Palásiu Prezidensiál Nicolau Lobato, Dili, 21 maiu 2019

Prezidente ezekutivu Conselho Nacional da Juventude de Timor-Leste (CNJCTL) Pe. João Soares konvida Prezidente Repúblika Francisco Guterres Lú Olo atu sai oradór ba kongresu juventude husi dioseze tolu.

Padre João Soares konvida Prezidente Repúblika atu kontinua enkoraja juventude katólika sira atu bele iha kontribuisaun di’ak ba dezenvolvimentu nasaun ninian. Prezidente Repúblika ho laran ksolok simu konvite husi CNJCTL atu partisipa iha eventu ne’e tanba juventude iha papél importante tebetebes ba família, igreja no nasaun. Tinan kotuk Prezidente Repúblika partisipa iha Kongresu CNJCTL iha Dare, Dili.

Iha oportunidade ne’e, Prezidente CNJCTL husu atu Prezidente Repúblika nu’udar aman nasaun bele tulun hodi hadia kondisaun dalan ba Lolotoe atu populasaun bele uza no ba nesesidade sorumutuk juventude katóliku husi Timor laran tomak iha Lolotoe.

Prezidente Repúblika sei uza enkontru regular ho Primeiru Ministru atu informa pedidu husi CNJCTL hodi konsidera.

Organizasaun CNJCTL moris iha 17 agustu 2018 iha Dare, Dili, hodi sai mahon juventude katóliku iha Timor laran tomak. Molok estabelesimentu CNJCTL, juventude iha dioseze tolu la’o ketak-ketak ho ninia programa rasik. Maibé ho estabelesimentu CNJCTL juventude katólika iha dioseze tolu iha ona nia estrutura nasionál hodi ko’alia kona-ba programa nasionál ba nia membru tomak.

MÍDIA PR