EMBAIXADORA MILENA PIRES HATO’O MISAUN TIMOR-LESTE IHA ONU BA PREZIDENTE REPÚBLIKA

by Mídia PR Posted on

Palásiu Prezidensiál Nicolau Lobato, Dili, 3 maiu 2019

Prezidente Repúblika Demokrátika Timor-Leste Francisco Guterres Lú Olo hasoru malu ho Embaixadora Timor-Leste iha Nasoens Unidas Milena Pires, hodi relata kona-ba servisu misaun Timor-Leste iha Nova Iorke.

Embaixadora informa apoiu estadu Timor-Leste desde uluk ba direitu autodeterminasaun povu Sarawi no akompañamentu ba situasaun Guine-Bissau.

Timor-Leste presiza tau atensaun ba ajenda importante Organizasaun Nasoens Unidas (ONU) iha 2019. Tuir ajenda, iha fulan-jullu, Timor-Leste sei aprezenta relatóriu kona-ba 2030. Iha fulan setembru, iha Asembleia Jerál Nasoens Unidas sei hala’o simeira kona-ba mudansa klimátika, avaliasaun globál mundu tomak kona-ba planu 2030 kona-ba dezenvolvimentu sustentavel no sei iha simeira kona-ba Saúde, dezarmamentu no ikus liu simeira kona-ba situasaun illa sira nian.Iha fulan-novembru sei organiza forum kona-ba implementasaun meta númeru 16 ne’ebé ko’alia kona-ba sosiedade pasífikas, inkluziva no justa iha Dili.

Progresu misaun Timor-Leste iha Nasoens Unidas pozitivu tebes. Nasaun membru ONU haree Timor-Leste hanesan istória susesu, tanba Timor-Leste konsege hetan restaurasaun, administrasaun Nasoens Unidas iha periódu tranzisaun.

Timor-Leste mós hetan rekoñesementu boot kona-ba doasaun ajenda 2030 no hetan rekoñesementu nu’udar país solidariu ba nasaun seluk.“Kestaun sira ne’e hotu, halo nasaun membru Nasoens Unidas nia rekoñesementu haree pozitivu tebes,” Milena Pires hateten.

Prezidente Repúblika enkoraja no rekomenda nafatin Embaixadora, atu kontinua servisu nafatin ba interese estadu Timor-Leste tuir kna’ar iha Nasoens Unidas.

Desde 2016, Estadu hili Milena Pires nu’udar embaixadora Timor-Leste iha ONU hodi defende nasaun nia interese.

MÍDIA PR
———–