Mensajen Prezidente Repúblika loron Restaurasaun Independensia loron-20 Maiu 2019

by Mídia PR Posted on

Povu Doben Timor-Leste!

Tinan sanulu resin hitu ba kotuk ita hotu halibur hamutuk iha Taci-Tolu hodi partisipa iha serimónia solene Restaurasaun ba ita nia Independénsia!

Kalan memorável ida ne’e, atu hanoin hikas fali no hafutar sakrifisiu ka terus durante tinan 24 nia laran.

Ita nia independénsia nia folin laiha sasukat, lori ra’an mak selu. Feto ho Mane sira hotu ne’ebé husik buat hotu ba kotuk, hodi fó lo’os deit sira nia an ba funu libertasaun. Sira merese ita hotu nia respeitu!

Tanba buat hotu ne’ebé sira halo no halao ona , mak ita bele toó no sai hanesan ohin loron.

Ohin ita selebra ita nia Restaurasaun Independénsia!

Ita selebra valor bot ida husi sira nia sakrifisiu no dedikasaun tomak! Ita selebra atu fó tutan valor sira ne’ebé jerasaun foun sira tenke hatene história pasadu hodi hari’í ita nia futuru ho diak no metin liu tan.

Povu Doben Timor-Leste!
Iha tinan sanulu resin hitu nia laran ita halo ona buat barak, maibé ita tenke halo liu tan hodi bele merese sira nia sakrifisiu tomak!

Independénsia iha sentidu lolós wainhira ita iha kapasidade hodi reforsa soberania, hodi servi ita nia Povu, hodi harii Paz, Justisa no Desenvolvimentu inkluzivu, ekuitativu no sustentável!

Horiuluk Horiwain Asuwain servidór Timor-Leste nian!
Ita hotu hamutuk lori Povu Timor-Leste ba moris di ‘ak.

Hamutuk hametin ita nia Estadu de Direitu hodi halao
desenvolvimentu Nasional.

Obrigado!