PR ho PR Euro

PREZIDENTE REPÚBLIKA KO’ALIA KOOPERASAUN HO REPREZENTANTE UNIAUN EUROPEIA

by Mídia PR Posted on

Palásiu Prezidensiál Nicolau Lobato, Dili, 22 maiu 2019

Prezidente Repúblika Francisco Guterres Lú Olo, ohin, hasoru malu ho Sekretáriu Jerál Adjunto ba Asuntu Polítiku Servisu Europeu ba Asaun External Embaixadór Jean-Christophe Belliard, hodi ko’alia kooperasaun Uniaun Europeia no Timor-Leste iha area dezenvolvimentu sosiál no ekónomiku.

Embaixadór Jean-Christophe Belliard hateten katak Timor-Leste no Uniaun Europeia iha relasaun ne’ebé importante tebetebes no hato’o mós intensaun saida mak sei hala’o tan iha futuru atu hametin liután kooperasaun. Tuir embaixadór katak agrikultura, edukasaun no juventude nu’udar setór prinsipál sira ne’ebé presiza hametin liután. Populasaun ho númeru joven ne’ebé barak presiza iha edukasaun ho kualidade tanba iha ligasaun ho empregu. Uniaun Europeu sei hametin liután nia kooperasaun iha area sira ne’e.

Embaixadór ne’e mós ko’alia ho Prezidente Repúblika kona-ba adezaun Timor-Leste ba ASEAN importante tebetebes ba nasaun no rekezitu sira ne’ebé presiza priense molok sai membru organizasaun rejionál ne’e. Organizasaun rejionál sai zona ekonomia prinsipál iha mundu.

MÍDIA PR