PREZIDENTE REPÚBLIKA SIMU KARTA KREDENSIÁL HUSI EMBAIXADÓR NOVA ZELANDIA

by Mídia PR Posted on

Palásiu Prezidensiál Nicolau Lobato, Dili, 14 maiu 2019

Prezidente Repúblika Francisco Guterres Lú Olo, ohin, simu karta kredensiál husi Embaixadór Nova Zelandia ba Timor-Leste Philip Hewitt hodi troka Vicki Poole ne’ebé remata tiha ona nia mandatu.

Prezidente Repúblika agradese kooperasaun entre nasaun rua iha area edukasaun, turismu no justisa. Timor-Leste inisia relasaun bilateral ho Nova Zelandia desde 1999 ho prezensa forsa iha INTERFET (International Force for East Timor).

Iha oportunidade ne’e, Embaixadór Philip Hewitt hato’o konvite husi Xefe Estadu Nova Zelandia atu Prezidente Repúblika halo vizita Estadu ba nasaun refere. Prezidente Repúblika agradese konvite husi Xefe Estadu Nova Zelandia no sei halo desizaun ba konvite ne’e.

Embaixadór Philip Hewitt kontente ho Bilateral Policy Dialogue ne’ebé Ministériu Negosiu Estranjeiru no Kooperasaun organiza tinan-tinan nu’udar mekanismu koordenasaun hodi hametin liután relasaun Timor-Leste ho nia parseiru sira.

Timor-Leste iha tinan 2015 apoiu kandidatura Nova Zelandia ba membru la permanente Konsellu Seguransa Nasoens Unidas. Desde estabelesimentu kooperasaun bilateral entre nasaun rua, Nova Zelandia fó apoiu ba dezenvolvimentu iha Timor-Leste iha area infraestruturas, kapitál sosiál, ekonomia, justisa no seguransa. Nova Zelandia oras ne’e esplora apoiu iha area dezenvolvimentu polítika turismu Timor-Leste ba nivel internasionál.

Philip Hewitt inisia nia kareira iha Ministériu Negosiu Estranjeiru Nova Zelandia iha 2001. Philip Hewitt asume kargu primeiru sekretáriu iha Samoa, konselleru Dezenvolvimentu iha Bangkok, iha Tuvalu no Nieue ba Polítika Rejionál Pasífiku. Iha tinan 2018, Philip Hewitt vizita Timor-Leste nu’udar responsável programa parseria ho Timor-Leste.
MÍDIA PR