KONGRESU 2020 ATU REUNE KOMBATENTES LIBERTASAUN NASIONÁL

by Mídia PR Posted on

Palásiu Prezidensiál Nicolau Lobato, Dili, 14 juñu 2019

Prezidente Repúblika, Francisco Guterres Lú Olo, dala ida tan, reafirma katak Kongresu Konsellu Kombatentes Libertasaun Nasionál ne’ebé sei hala’o iha marsu 2020 atu reune kombatentes hotu-hotu, la’ós atu hafahe.

Prezidente Repúblika husu ba kombatentes atu buka dalan oinsá bele tau hanoin hamutuk hodi defende kombatentes hotu nia interese. Hanoin ne’e hato’o ba Komandu Rejiaun Bivaque nian ne’ebé iha diverjensia pozisaun relasiona ho verifikasaun dadus ba veteranu sira. Tuir porta voz Komandu Rejiaun Bivaque, Norberto Espírito Santo, iha audiénsia ho Xefe Estadu ohin hateten katak verifikasaun ba dadus veteranu sira tenke hapara, hein to’o kriasaun Konsellu Kombatentes Libertasaun Nasionál.

Preokupasaun ne’e mosu tanba iha kazu falsifikasaun ba rejistu veteranus akontese iha tempu Komisaun Omenajen nia serbisu. Tanba ne’e, Komandu Rejiaun Bivaque ezije atu Konsellu Kombatentes Libertasaun Nasionál mak halo verifikasaun atu evita falsifikasaun dokumentus kombatentes ninian. Komandu Rejiaun Bivaque sei fó apoiu tomak ba kriasaun Konsellu Kombatentes Libertasaun Nasionál.

Relasiona ho ezijensia ne’e, Prezidente Repúblika hateten katak kompriende preokupasaun kombatentes husi Rejiaun Bivaque nian no husu atu buka solusaun ida hodi reune kombatentes hotu-hotu. Xefe Estadu sei ko’alia ho Primeiru Ministru atu tau matan ba ezijensia ne’e.

Komisaun Omenajen sei halo verifikasaun dadus kombatentes libertasaun nasionál iha Setembru 2019 ba ema na’in 124600 ne’ebé rejistadu iha 2009.

Iha audiénsia ho Sekretáriu Estadu Asuntu Kombatentes Libertasaun Nasionál, Gil da Costa ‘Oan Soro’, foin lalais, Prezidente Repúblika husu atu halibur organizasaun no grupu hotu-hotu nia hanoin relasiona ho verifikasaun ba dadus veteranus nune’e ema sira-nia ideia bele kontempla iha prosesu verifikasaun nia laran. Iha enkontru ne’e, Prezidente Repúblika husu atu kombatentes sira uza kriasaun Konsellu Kombatentes Libertasaun Nasionál reune veteranus hotu, la’ós atu hafahe.

Prezidente Repúblika hateten katak veteranu sira bele partidu ketak-ketak maibé iha interese ida de’it hodi dignifika kombatentes, promove valór rezisténsia nian no dezenvolvimentu sustentavel.

Iha marsu 2018, Prezidente Repúblika Francisco Guterres Lú Olo promulga Dekretu Lei Númeru 7/2018 kona-ba Estatutu Organiku Konsellu Kombatentes Libertasaun Nasionál. Lei ne’e sei fó dalan atu harii organizasaun mahon ida ba veteranu hotu-hotu hodi promove direitu kombatentes, dezenvolvimentu sustentavel, memória no valór rezisténsia no ezersísiu poderes.

MÍDIA PR