CORE GROUP TRANSPARENCY TIMOR-LESTE HATO’O REZULTADU MONITORIZASAUN NO PREOKUPASAUN

by Mídia PR Posted on

 

 

Core Group Transparency Timor-Leste (CGT-TL) informa rezultadu monitorizasaun no preokupasaun ba Prezidente Repúblika, Francisco Guterres Lú Olo, relasiona ho projetu auto estrada, aeroportu Suai no alterasaun Lei Fundu Petrolíferu.

Tuir monitorizasaun Core Group Transparency Timor-Leste katak auto estrada husi Suai ba Fatukai remata tiha ona maibé husik hela problema balu ba komunidade ne’ebé seidauk rezolve. Projetu auto estrada kria problema sosiál no ambientál ba komunidade, laiha estudu viabilidade ba ambientál no sosiál bainhira atu hahú projetu. Iha parte seluk ekipa monitorizasaun (CGT-TL) aprezenta katak Komunidade sira ne’ebe hela besik, hetan impaktu boot ba projetu auto estrada: la fasilita ho di’ak labarik sira assesu ba eskola, agrikultór sira-nia assesu ba merkadu, toos, no ba rate. Indiminizasaun ba uma sira besik aeroportu too agora seidauk remata balu lori problema ba família nia moris.

Rezultadu monitorizasaun hatudu mós katak laiha Lei ida mak garante konteúdu lokál. Kontratór internasionál ne’ebe manan projetu laiha obrigasaun atu implementa konteúdu lokál liuhusi sosa populasaun no kompania lokál ninia produsaun no servisu. Tanba ne’e CGT-TL husu Prezidente Repúblika atu ko’alia ho governu atu tau atensaun hodi la repete efeitu negativu husi projetu auto estrada iha Suai ba Betanu no Vikeke no tau atensaun ba produsaun lei ne’ebé lori efeitu multiplikadór husi projetu ba ekonomia lokál.

Porta voz Juvenal Dias hatutan katak sosiedade sivíl apresia vontade husi orgaun estadu atu altera lei fundus petrolíferu, maibé sosiedade sivíl la konkorda ho artigu balu ne’ebe la nesesaria atu halo alterasaun.

Prezidente Repúblika Francisco Guterres Lú Olo hato’o agradesimentu no apresia ba inisiativa sosiedade sivíl ne’ebé kontinua fó hanoin ba estadu.

Xefi Estadu husu ba Core Group Transparency Timor-Leste no organizasaun sosiedade sivil atu aprezenta opiniaun ka pareser ba Parlamentu Nasionál kona-ba alterasaun Lei Fundus Petrolíferu hodi halo diskusaun klean molok Parlamentu Nasionál foti desizaun. Xefe Estadu mós husu atu parte hotu-hotu halo estudu klean liu hodi garante futuru jerasaun Timor-Leste ninian.

MÍDIA PR