JAIME RIBEIRO ‘SAMBA SEMBILAN’ SEI HAKOI IHA JARDIM DOS HEROIS DA PATRIA

by Mídia PR Posted on

Palásiu Prezidensiál Nicolau Lobato, Dili, 1 Jullu 2019

Xefe Estadu, Francisco Guterres Lú Olo, liuhusi Dekretu Prezidente Repúblika númeru 28/2019 rekoñese no valoriza kontribuisaun Jaime Ribeiro ‘Samba Sembilan’ iha prosesu luta libertasaun nasionál ho direitu atu hetan onra fúnebre no hakoi iha Jardim dos Herois da Pátria iha Metinaro, iha 5 jullu 2019.

Tuir artigu 11 Konstituisaun RDTL konsagra rekoñesimentu no valorizasaun rezisténsia ba Povu Maubere ne’ebé kontra okupasaun no ba ema ida-idak ne’ebé luta ba independénsia nasionál. Bazeia ba Lei Estatutu Kombatentes Libertasaun Nasionál fó omenajen ba Kombatentes Libertasaun Nasionál.

Jaime Ribeiro ‘Samba Sembilan’ moris Liquiça, 15 abril 1959. Partisipa iha luta libertasaun nasionál durante 24 anos, desde FALINTIL harii iha loron 20 agustu 1975, to’o Timor-Leste nia independénsia. Jaime Ribeiro ‘Samba Sembilan’ hahú ho postu soldadu iha Frente Armada husi 1975-1978 to’o zona libertadas rahun. Hafoin Reorganizasaun Nasionál ba Rezisténsia iha 1981, asume kargu nu’udar komandante sesaun to’o 1985. Husi 1986-1991 sai komandante peletaun. Husi 1992-1999 asume kargu nu’udar segundu komandante rejiaun.

Hafoin desmobilizasaun, Jaime Ribeiro ‘Samba Sembilan’ fila ba vida sivil, moris hanesan povu bainbain to’o nia is kotu.

Iha tinan 2007, Jaime Ribeiro ‘Samba Sembilan’ kondekoradu ho Ordem da Guerrilha. Iha 28 novembru 2018, Prezidente Repúblika Francisco Guterres Lú Olo kondekora Jaime Ribeiro ‘Samba Sembilan’ ho Kolár Ordem Timor-Leste.

Jaime Ribeiro ‘Samba Sembilan’ hakotu is iha 30 juñu 2019, iha Hospital Nasionál Guido Valadares, Dili.

MÍDIA PR