PREZIDENTE REPÚBLIKA SIMU KARTA KREDENSIÁL HUSI NASAUN FINLANDIA, REINU UNIDU NO POLÓNIA

by Mídia PR Posted on

 

Palásiu Prezidensiál Nicolau Lobato, Dili, 16 jullu 2019

Prezidente Repúblika Francisco Guterres Lú Olo, ohin, simu karta kredensiál husi Embaixadór Finlandia, Jari Sinkari, Embaixadór Reinu Unidu, Owen John Jenkins, no Embaixadora Polónia, Beata Stoczynski atu hametin liután kooperasaun no amizade ho Timor-Leste.

Reinu Unidu nia kooperasaun ho Timor-Leste konsentra iha area formasaun lingua inglesh ba diplomata timor oan sira, bolsu estudu Chevening, vizita estudu, apoiu Planu Dezenvolvimentu Nasionál no desde 1999 iha papél fundamentál ba rekonstrusaun Timor-Leste liuhusi fó apoiu finanseiru ba Comissão de Acolhimento, Verdade e Reconciliação, Comissões de Veteranos no asesór jurídiku hodi fó formasaun ba F-FDTL. Embaixadór Own John Jenkins fó enfaze ba importánsia edukasaun ba dezenvolvimentu nasaun ida nian.

Embaixadór Finlandia, Jari Sinkari, hateten katak edukasaun mak dalan prosperu liu ba nasaun ida nia moris. Jari Sinkari informa mós katak Finlandia mak agora lider Uniaun Europeia husi fulan Jullu to tinan ne’e nia rohan hodi fó atensaun liu ba alterasaun klimátika.

Embaixadora Polónia, Beata Stoczynski hateten katak sei fortalese relasaun entre nasaun rua, iha area formasaun ba diplomata, bolsu estudu no iha projetu kiik sira ba ema ho nesesidade espesiais. Beata Stoczynski hateten katak Timor-Leste no Polónia komunga valór kristaun ninian no kontente tebetebes no vizita Amu Papa João Paulo II mai vizita Timor-Leste iha tinan-1989 no haree nia estatua iha Dili.

Prezidente Repúblika Francisco Guterres Lú Olo apresia kooperasaun ne’ebé nasaun sira halo ho Timor-Leste desde 2002 bele sai metin liután.

Iha enkontru kortezia ho Embaixadór Finlandia no Reinu Unidu, Prezidente Repúblika Francisco Guterres Lú Olo fó-sai katak ema mak tenke sai sentru ba dezenvolvimentu nasaun ida nian.

Ba Embaixadora Polónia, Prezidente Repúblika hateten katak vizita Amu Papa João Paulo II nu’udar pontu virajen ba luta libertasaun nasionál tanba muda opiniaun internasionál nian ba kauza Timor-Leste.

MÍDIA PR