ALTERASOINS KLIMÁTIKAS SAI AMEASA BOOT BA MORIS IHA MUNDU

by Mídia PR Posted on

Díli, 24 setembru 2019

Prezidente Repúblika, Francisco Guterres Lú Olo, hateten katak Planeta Terra iha risku nia laran tanba ne’e ezije intervensaun urjente no efikáz hodi kombate klimátikas ne’ebé ohin loron sai ona ameasa boot ita-nia moris.

Alterasoins klimátika nu’udar realidade ida ne’ebé ita labele ses iha ne’ebé de’it no sai ona ajenda polítika internasionál tanba ne’e apela ba ema hotu-hotu atu proteje meiu ambiente.

Prezidente Repúblika hato’o nia intervensaun iha Marxa Ba Justisa Klimátika iha Jardim B.J Habibie ne’ebé lee husi Asesór Reinaldo Junior Freitas  Batista Belo:

“Dezafiu sira ne’ebé ita hasoru mak dezafiu sira ne’ebé umanidade tomak hasoru. Tanba ida ne’e, importante tebes katak ita servisu hamutuk, ita buka dalan hodi harii ponte hodi halo ligasaun ba malu, labele izola ita nia an, ita buka dalan ne’ebé sustentável hodi ita buka moris nu’udar umanu ho ekilíbriu ho natureza. Líder hothotu iha mundu tenke hatene defende bein-estar ba família umana tomak, liu hosi proteje ita nia ambiente.”

Prezidente Repúblika apela ema hotu nia partisipasaun ativa tanba bainhira la kuidadu meiu ambiente nasaun ki’ik sira bele lakon, ka mout, iha tasi okos.   Tanba ne’e presiza harii kooperasaun efikáz entre komunidade internasionáll ho komunidade sira ne’ebé vulneravel.

Prezidente Repúblika apresia inisiativa husi Movimentu Justisa Klimátika hodi hatudu preokupasaun kona-ba alterasoins klimátika ne’ebé nasaun sira iha mundu enfrenta.

Asaun ba Justisa Klimátika nu’udar inisiativa husi organizasaun sosiedade sívil iha mundu ho Kampaña Global Climate Strike akontese iha nasaun 150 husi 20-27 setembru 2019.

MÍDIA PR