Palásiu Prezidensiál Nicolau Lobato, Dili, 24 setembru 2019
Embaixadór Tailandia ba Timor-Leste Danai Karnpoz termina nia misaun hafoin fulan 17 hala’o servisu diplomátiku iha Timor-Leste.
Iha sorumutu ho Prezidente Repúblika Francisco Guterres Lú Olo (24/09) iha salaun Nino Konis Santana, Embaixadór Karnpoz ofisiálmente hato’o despedida ba Xefe Estadu.
Embaixadór Karnpoz rekoñese relasaun bilateral Timor-Leste ho Tailandia iha progresu maka’as no avansu ona ba relasaun altu nível no salienta katak relasaun ne’e sei kontinua iha futuru.
Prezidente Repúblika iha okaziaun ne’e hato’o nia rekoñesementu boot ba embaixadór Karnpoz ne’ebé durante nia mandatu halo esforsu hodi hametin koperasaun Timor-Leste ho Thailandia.
Timor-Leste ho Thailandia dezenvolve koperasaun iha area oioin hanesan agrikultura, saúde públiku, dezenvolvimentu rural, turizmu, edukasaun no area importante seluk.
Tailandia, Repúblika Xina no Noruega maka nasaun tolu dahuluk ne’ebé estabelese nia relasaun diplomátiku ho Timor-Leste iha loron 20 fulan maiu tinan 2002.
MÍDIA PR