ESTADU KONDEKORA PADRE JOÃO DE DEUS HO GRAU MEDALLA ORDEM TIMOR-LESTE

by Mídia PR Posted on

Palásiu Prezidensiál Nicolau Lobato, Dili, 24 setembru 2019

Xefe Estadu, Francisco Guterres Lú Olo, liuhusi Dekretu Prezidente Repúblika númeru 45/2019, 24 setembru, kondekora Pe. João de Deus Pires, SDB ho Grau Medalla Ordem Timor-Leste ho Títulu Postume.

Estadu fó rekoñesimentu no valoriza kontribuisaun Pe. João de Deus Pires durante prosesu luta libertasaun nasionál hahú husi fó asisténsia ba populasaun ne’ebé rende no militár Indonézia kaptura iha tinan 1979 no 1980 hafoin base de apoio rahun, iha  situasaun ne’ebé difísil tebetebes ho hamlaha no moras.

Maske ho ameasas oioin husi militár Indonézia Pe. João de Deus Pires kontinua halo ligasaun ho Diresaun Superior Luta iha ai-laran no ho Díli ne’ebé konsege haruka korespondénsia ba Rai-li’ur.

Padre João de Deus Pires kontribui mós ba fundasaun eskolas barabarak iha misaun Salesianos iha ponta leste no kontinua fó formasaun iha eskola sira ne’e. Pe. João de Deus harii Eskola Téknika Agrikola iha Fatumaka iha 1963.  Padre João de Deus harii orfanatu sira hodi tau matan ba labarik sira ne’ebé inan-aman mate iha funu laran iha Baucau.

Estadu rekoñese padre João de Deus Pires tanba hatudu sentidu umanista no dedikasaun estraordinária ne’ebé hatudu tiha ona bainhira sei moris.

Liuhusi Dekretu Prezidente Repúblika númeru 46/2019, 24 setembru,  Prezidente Repúblika sei entrega kondekorasaun liuhusi ninian reprezentasaun Ministra Edukasaun, Juventude no Desportu, Dulce Jesus Soares.

Pe. João de Deus nu’udar misionáriu husi Portugal ne’ebé hala’o misaun katóliku nian iha Timor-Leste desde 1958 to’o nia mate iha 22 setembru 2019, iha Hospital Nasional Guido Valadares tanba moras.  Padre João de Deus, moris iha Mirandela, Braganca, iha 15 Abril 1928.

Iha 2012, Pe João de Deus simu ona kondekorasaun husi Estadu ho Ordem Dom Martinho Lopes. Ordem Dom Martinho Lopes nu’udar rekoñesimentu husi Estadu atu valoriza partisipasaun Igreja Katólika iha prosesu libertasaun nasionál Timor-Leste.

 

MÍDIA PR.