ESTADU REKOÑESE PADRE JOÃO DE DEUS NIA KONTRIBUISAUN

by Mídia PR Posted on

Comoro, Dili, 23 setembru 2019

Prezidente Repúblika, Francisco Guterres Lú Olo, bainhira presta omenajen ikus iha kapela Salesiano Dom Bosco iha Comoro, hateten katak Estadu rekoñese Padre João de Deus, SDB, nia kontribuisaun ba luta libertasaun nasionál liuhusi Dekretu Prezidente Repúblika ne’ebé sei publika aban.

Iha oportunidade ne’e, Prezidente Repúblika hato’o sentidu kondolénsia ba família Salesiano ne’ebé lakon padre João de Deus.

Pe. João de Deus nu’udar misionáriu husi Portugal ne’ebé hala’o misaun katóliku nian iha Timor-Leste desde 1958 to’o nia mate iha 22 setembru 2019, iha Hospital Nasional Guido Valadares tanba moras.  Padre João de Deus, moris iha Mirandela, Braganca, iha 15 Abril 1928.

Bainhira sei moris, Pe. João de Deus harii Eskola Téknika Agrikola iha Fatumaka iha 1963. Pe. João de Deus tulun hari misaun Katólika sira iha Baucau.

Iha 1975, banhira funu sivíl akontese, governu Portugal haruka atu evakua hotu misionáriu katóliku sira iha Timor-Portugés, Pe. João de Deus hili atu hela metin nafatin maske nia  moris iha ameasa nia laran.

Hafoin base de apoiu rahun iha 1978, Igreja sai nu’udar unika instituisaun ne’ebé kontinua hamriik iha vila laran durante okupasaun Indonézia. Pe. João de Deus buka dalan atu kontinua fó apoiu ba rezisténsia liuhusi harii orfanatu sira iha Baguia, Laga, Quelicai hodi tulun labarik sira ne’ebé lakon inan-aman durante funu hasoru militár Indonézia. Hafoin Timor-Leste hetan nia independénsia, Padre João de Deus kontinua fó nia kontribuisaun ba umanidade.

Iha 2012, Pe João de Deus simu ona kondekorasaun husi Estadu ho Ordem Dom Martinho Lopes. Ordem Dom Martinho Lopes nu’udar rekoñesimentu husi Estadu atu valoriza partisipasaun Igreja Katólika iha prosesu libertasaun nasionál Timor-Leste.

 

MÍDIA PR