Palásiu Prezidensiál Nicolau Lobato, Dili, 19 setembru 2019
Prezidente Repúblika, Francisco Guterres Lú Olo, iha audiénsia ho eis komandante Internationational Force for East Timor (INTERFET), Peter Cosgrove, hateten katak komemorasaun tinan-20 prezensa Forsa Multinasionál sei komemora mós memória Povu Timor-Leste no Australia.
Tuir Prezidente Repúblika katak partisipasaun INTERFET iha Timor-Leste hamaran matan been no hapara ran fakar nu’udar memória ne’ebé sei husik hela husi jerasaun ba jerasaun.
Peter Cosgrove kontente bele vizita fila fali Timor-Leste ba dahuluk hafoin husik kargu nu’udar Governadór Australia nian. Peter Cosgrove apresia tebes povu Timor-Leste ne’ebé ho aten-brani ba vota 30 agustu 1999 hodi deside futuru nasaun.
Peter Cosgrove informa katak veteranu na’in-60 ne’ebé sei ativu iha Forsa Australia nia no na’in-50 ne’ebé ba ona vida sivíl aban sei partisipa iha komemorasaun tinan-20 prezensa INTERFET iha Timor-Leste.
Peter Cosgrove informa katak Australia kontente atu simu Xefe Estadu nia vizita no agradese Prezidente Repúblika ne’ebé sempre marka prezensa iha ANZAC day tinan-tinan.
MÍDIA PR