Palásiu Prezidensiál Nicolau Lobato, Dili, 19 setembru 2019
Prezidente Repúblika, Francisco Guterres Lú Olo, iha audiénsia ho Ministru Negosiu Estranjeiru no Kooperasaun, Dionísio Babo, informa katak laiha intensaun atu impede atu fó posse ba embaixadór sira. Tanba ne’e, nu’udar lider masimu diplomasia ninian husu governu atu tetu lista ne’e.
Hafoin, enkontru ho Prezidente Repúblika, Ministru Dionísio Babo hateten katak hetan garantia husi Prezidente Repúblika nu’udar lider masimu diplomasia nian relasiona ho lista embaixadór ne’ebé seidauk hetan posse tanba ne’e interese estadu nian no husu Governu atu tetu.
Ministru ne’e hatutan katak hafoin enkontru dahuluk ho Xefe Estadu, Ministériu Negosiu Estranjeiru halo tiha ona ajustamentu ba lista naran embaixadór no haruka tiha ona ba Konsellu Ministru atu aprova. Dionísio Babo mós hatutan katak ne’e nu’udar kna’ar Konstitusionál Prezidente Repúblika atu aprova lista embaixadór sira.
Husi lista embaixadór na’in-16, Prezidente Repúblika fó ona posse ba embaixadór na’in-tolu mak hanesan Olimpio Branco ba Embaixadór Brasil, Isilio Coelho ba Estadus Unidus no Lisualdo Gaspar ba Nova Zelandia.
Iha oportunidade ne’e, Ministru Dionísio Babo husu mós hanoin husi Prezidente Repúblika kona-ba mensajen ruma ne’ebé hato’o iha Asembleia Jerál ONU iha Nova Iorke. Tuir Ministru Negosiu Estranjeiru, Prezidente Repúblika la hato’o nia mensajen iha Assembleia Jerál ONU nian tanba Parlamentu Nasionál la fó asentimentu. Maske nune’e, Prezidente Repúblika alerta de’it kona-ba importánsia kontribuisaun nasaun nian relasiona ho mudansa klimátika no asesu universál saúde ba ema hotu no edukasaun ho kualidade.
Reuniaun Asembleia Jerál ONU ba dala-74 iha Nova Iorke sei partisipa husi Xefe Estadu husi nasaun 164. Timor-Leste sei laiha reprezentasaun husi Xefe Estadu nian iha Asembelia Jerál ONU tanba Parlamentu Nasionál la fó asentimentu ba Prezidente Repúblika hodi partisipa.
Tinan ne’e, Asembleia Jerál ONU sei ko’alia kona-ba mudansa klimátika, finanseiru ba dezenvolvimentu, saúde, Voluntary National Report no Objetivu Dezenvolvimentu Sustentavel.
Ministru Negosius Estranjeiru no Kooperasaun informa ba Prezidente Repúblika kona-ba Altu Reprezentante Misaun Esploratóriu ASEAN ne’ebé foin lalais iha 3-7 setembru 2019 vizita Timor-Leste atu haree empeñamentu husi Autoridade Nasionál relasiona ho adezaun ba ASEAN.
Prezidente Repúblika hateten katak adezaun ba ASEAN nu’udar vontade ida ne’ebé mai hori uluk kedas tanba presiza ema hotu nia esforsu atu Timor-Leste bele sai membru ASEAN.
MÍDIA PR