PREZIDENTE REPÚBLIKA NIA VIZITA BA INDONÉZIA NO JAPAUN IMPORTANTE TEBES

by Mídia PR Posted on

Palásiu Prezidensiál Nicolau Lobato, Dili 23 setembru 2019

Prezidente Repúblika, Francisco Guterres Lú Olo hasoru malu ho eis Prezidente Repúblika no premiadu Nobel ba Pás, José Ramos Horta hodi rona importánsia vizita Xefe Estadu ba serimónia tomada posse Prezidente Jokowi iha Jakarta no koroasaun imperadór foun Japaun ninian.

Tuir José Ramos Horta katak tanba vizita rua ne’e importante tebebtebes ba kredibilidade Estadu hein katak Parlamentu Nasionál autoriza tanba iha tempu sufisiente atu deside. Vizita ba Jakarta importante tebes tanba Prezidente Indonézia konvita nasaun-sanulu ASEAN nian no Timor-Leste nu’udar buat importante ba Timor-Leste nia diplomasia.

Prezidente Repúblika informa simu tiha ona konvite no informa tiha ona Parlamentu Nasionál relasiona ho vizita ba nasaun rua ne’e iha fulan outubru 2019.

Premiadu Nobel ba Pás informa ba Prezidente Repúblika ninian vizita ne’ebé sei hala’o iha fulan ne’e nia rohan ba Korea hodi promove turismu iha rejiaun Asia-Pasífiku. José Ramos Horta sei sai key note speaker iha konferénsia internasionál ne’e.  Timoroan  husi munísipiu haat sei partisipa iha eventu ne’e.

Eis Prezidente Repúblika manifesta ninian preokupasaun atu rezolve impasse ne’ebé akontese hela dadaun iha ita-nia rain.

Eis Prezidente Repúblika ne’e akresenta tan kona-ba embaixadór ne’ebé atu reprezenta Timor-Leste tenke hatene kna’ar diplomasia, dezenvolvimentu pozitivu iha rai-laran no lingua.  Tuir José Ramos Horta katak atu haruka embaixadór ida presiza tuir nia prosesu katak nasaun ne’ebé atu simu embaixadór husi Timor-Leste tenke iha uluk agreement husi nasaun refere.

 

MÍDIA PR