Sua Exelénsia Prezidente Repúblika foin simu proposta foun ida hosi Governu hodi regulariza situasaun xefia militár sira-nian. Maski nia sempre defende tranzisaun ida ne’ebé graduál liu, maibé ikusliu Prezidente Taur Matan Ruak simu proposta daruak ne’ebé governu hato’o ba Sua Exelénsia kona-ba tranzisaun jerasionál, liuhosi nomeia Kapitaun husi Tasi no Funu nian Donaciano Gomes, alias Pedro Klamar Fuik, no Koronél Calisto dos Santos, alias, Coliati, ba kargu Vise Xefe Estadu-Maiór Jenerál Forsas Armadas.

Susesaun iha lideransa Forsas Armadas nian hanesan sinál konfiansa ida ne’ebé forte la’ós de’it iha instituisaun militár maibé mós iha militár sira.

Prezidénsia Repúblika no Governu nia servisus sei prepara hela detalle sira relasiona ho promosaun hosi ofisiál sira-ne’ebé temi iha leten, ne’ebé inklui mós Xefe Estadu-Maiór F-FDTL nian no Komandante sira Komponente nian, no mós detalle kona-ba promosaun onorífika no prosesu tama reforma hosi ofisiál sira-ne’ebé hala’o hela funsaun, inklui mós serimónia ofisiál.

Sua Exelénsia Prezidente Repúblika sente ksolok tebes ho konsensu ne’ebé mak harii, hodi interese nasionál aas liu nia naran, ne’ebé permite atu hakat liu situasaun susar ida-ne’e relasiona ho lideransa xefia militár sira-nian, no fó-agradese ba militár sira-ne’ebé mak atu husik F-FDTL ne’ebé serbisu ho aten-barani hodi luta ba libertasaun nasionál no mós ba harii Forsas Armadas ne’ebé forte hahú kedas hosi independénsia nasionál.

Palásiu Presidensial Nicolau Lobato, 15 Abril 2016