Bucoli, Baucau, 18 Abríl, 2016: S.E. Prezidente Repúblika, Taur Matan Ruak, kontinua nia kompromisu atu hala’o diálogu komunitáriu iha suku hirak hodi hala’o diálogu ba loron dahuluk nian iha Suku Bucoli, Postu Administrativu no Munisípiu Baucau iha segunda-feira.

Hafoin rona diskursu sobre objetivu nia vizita ba suku no mós lia-menon haat ne’ebé baibain Xefe Estadu hato’o iha suku seluk ne’ebé nia vizita ona, membru komunidade ida ho naran, Carlos Baptista, hato’o kestaun sobre asuntu ezonerasaun ba Xefe Estadu-Maiór Jenerál das Forças Armadas F-FDTL, Major Jenerál Lere Anan Timur.

Hatán ba preokupasaun ne’e, S.E. Prezidente Repúblika deklara katak:

“Tanba kazu ezonerasaun ne’e, Ita-Boot sira haree foin daudaun ha’u ho governu iha diferensa. Ha’u hakarak Jenerál Lere sai para Jenerál Meno sa’e fali, mas governu la konkorda. Iha diskute malu boot, to’o ha’u bá Parlamentu”.

Depois Xefe Estadu kontinua liután hodi dehan:

“Foin daudaun, Governu haruka fali mai. Entaun, se Prezidente lakohi Lere kontinua, entaun veteranu sira sai hotu kedas. Veteranu Lere, Veteranu Falur, Veteranu Meno, Veteranu Aluk, Maunana, koronél sira hotu kedas. Entaun, ha’u dehan, ok, sira sai hotu. Ne’ebé, agora foti fali foun na’in-rua, labarik joven quer dizer 40 anos. Kapitaun uluk, angkatan laut ninia boot, Donaciano no Coliati ne’e jerasaun foun fali, katuas sira deskansa tama ba reforma. Tanba, tuir lei, tinan 60 ne’e ba reforma.

Prezidente aseita ida-ne’e sira balun dehan mas Jenerál Lere lakohi, Jenerál Lere tenke kumpre lei, iha ai-laran de’it mós lei iha nu’usá mak nasaun ukun an tiha lei la iha tenke kumpre lei, Prezidente kumpre lei, Ministrus kumpre lei, Primeiru Ministru kumpre lei hotu-hotu. Agora ohin loron sira dehan PD, Prezidente Parlamentu sai ne’e problema polítiku ida, polítiku ne’e hanesan surik sorin-sorin kro’at hotu, tuu hanesan ne’ebá di’ak, tuu hanesan ne’e mós di’ak. Maibé, ida agora ne’e tuu polítiku. Agora, Estadu ida dame ne’e buat ida ke Timoroan hotu hakarak. Ita tenke hametin pás no estabilidade mezmu iha diferensa ideia. Agora, Timor maka tenke bá oin, la iha ida que hanoin atu lori Timor ba fali kotuk, la iha. Tanba ne’e, maun Carlos tenke konfia.

Entretantu diálogu iha Suku Bucoli la’o ho di’ak tanba iha partisipasaun másimu hosi komunidade suku ne’e nian.

Iha diálogu komunitáriu ne’ebé maka hala’o ne’e, S.E. Prezidente Repúblika hetan akompañamentu husi Defensór Públiku, Sérgio Hornai, Administradór Postu Bobonaro husi Munisípiu Bobonaro nian, Sr. Domingos Leto Lelo, Xefe-Suku Luculai, Postu Administrativu no Munisípiu Likisá,

Sr. Leonel d. Lopes, Xefe-Suku Lacutos, Postu Administrativu Fohorem husi Munisípiu Covalima, Sr. Antonio G. de Araújo, Xefe-Suku Asu Lau, Postu Administrativu Hatolia, Munisípiu Ermera,

Sr. Armando M. Soares, ne’ebé maka mai hanesan bainaka espesiál Xefe Estadu nian.