Bucoli, Baucau, 18 Abríl, 2016: S.E. Prezidente Repúblika, Taur Matan Ruak, hala’o diálogu ho komunidade iha Suku Bucoli no Suku Tirilolo iha Postu Administrativu no Munisípiu Baucau segunda-feira liubá iha prezensa Defensór Públiku, Dr. Sérgio Hornai, no konvidadu espesiál hanesan Administradór Postu Administrativu Bobonaru, Munisípiu Bobonaro, Domingos Leto Lelo, Xefe-Suku Luculai husi Munisípiu Liquiçá, Leonel d. Lopes, no Xefe-Suku Lacutos, Postu Administrativu Fohorem, Munisípiu Covalima, Antonio G. de Araújo, no Xefe-Suku Asu Lau, Postu Administrativu Hatoli’a, Munisípiu Ermera, Armando M. Soares.

Iha diálogu dahuluk, iha Suku Bucoli, membru komunidade ho naran Carlos Baptista kestiona sobre problema ezonerasaun, tanba tuir nia hanoin, karik problema ezonerasaun bele kria instabilidade ba povu nia moris.

Hatán ba preokupasaun ne’e, S.E. Prezidente Repúblika, Taur Matan Ruak, hatete:

“Ita-Boot sira haree, foin daudaun, ha’u ho governu iha diferensa. Ha’u hakarak Jenerál Lere sai para Jenerál Meno sa’e fali. Mas, governu la konkorda, iha diskute malu boot to’o ha’u bá parlamentu. Foin daudaun, Governu haruka fali, ok, se Prezidente lakohi Lere kontinua, entaun veteranu sira sai hotu kedas. Veteranu Lere, Veteranu Falur, Jenerál Meno, Aluk, Maunana, koronél sira sai hotu kedas, entaun, ha’u dehan, ok, sira sai hotu. Ne’ebé, agora foti fali foun na’in-rua, labarik joven quer diser 40 anos. Kapitaun uluk, angkatan laut ninian boot, Donaciano, no Koliati, jerasaun foun fali. Katuas sira deskansa, ba reforma tanba tuir lei 60 tahun ne’e ba reforma. Prezidente aseita ida-ne’e, sira balun dehan, mas Jenerál Lere lakohi, Jenerál Lere tenke kumpre lei, iha ai-laran de’it mós lei iha, nu’usá mak nasaun Ukun-An tiha lei la iha, tenke kumpre lei. Prezidente kumpre lei, Ministru kumpre lei, Primeiru Ministru kumpre lei hotu-hotu.”

“Agora, ohin loron sira dehan, PD, Prezidente Parlamentu sai ne’e problema ida ke polítiku, polítiku ne’e hanesan surik sori-sorin kro’at hotu, tuu hanesan ne’ebá di’ak, tuu hanesan nee mós di’ak. Maibé, ida agora ne’e tuu polítiku. Agora Estadu ida, dame ne’e buat ida ke Timoroan hotu hakarak. Ita tenke hametin pás no estabilidade, mezmu iha diferensa ideia, agora Timór mak tenke bá oin. La iha ida ke hanoin atu lori Timór ba fali kotuk, la iha. Tanba ne’e, maun Carlos tenke konfia”, Xefe Estadu kontinua nia klarifikasaun.

Tuirmai iha diálogu ho komunidade Suku Tirilolo, Augusto Faria de Sá hato’o preokupasaun ba Xefe Estadu katak, sira preokupasaun tebes ho programa governu ne’ebé maka gasta osan ba Aeroportu Oekusi no abandona fali Aeroportu Baucau nian ne’ebé maka bele sai hanesan Aeroportu Internasionál no bele atrai ema mai Timor-Leste.

Hatán ba preokupasaun ne’e, Xefe Estadu deklara katak:

“Ita-nia governu iha planu sei hahú uluk iha Oekusi, depois sei mai to’o munisípiu hotu. Tanba ne’e, imi Baucau prepara an sei sai Munisípiu no podér tomak sei entrega ba administrasaun lokál. Tanba ne’e, sei dezenvolve aeroportu ne’e.”

Iha mós preokupasaun seluk hirak, ne’ebé komunidade Suku Tirilolo aprezenta, hanesan tuirmai:

  • Justisa lei ba rai =Agora daudaun ita-nia lei ba rai seidauk iha.

  • Komunidade ninia moris depende de’it ba iha udan-been, nune’e bainhira udan la monu rai produsaun agríkola sei la iha, nune’e oinsá maka atu hadi’a sistema ekonomia

  • Edukasaun = Husu atu loke tan eskola públiku

  • Infraestrutura = Hadi’a Estrada

  • Saúde = susar asesu ba saúde tanba la iha postu saúde

  • Ezije atu loke lailais ona produsaun semente

  • La fó valorizasaun ba veteranus sira tanba haree ba veteranus sira ne’ebé maka dezmobiliza ona to’o tempu komemorasaun loron 20 Maiu, 28 Agostu no 28 Novembru, Governu só fó de’it konvite maibé la haree ba transporte entaun veteranus sira-ne’e tenke kaer sira-nia xapeu, balun kaer de’it saia, tanba tenke la’o kilómetru barak husi sira-nia uma-fatin ba to’o iha fatin serimónia.

  • Pensaun Vitalísia: husu ba S.E. PR atu hamenus lei pensaun refere ou halakon tiha de’it tanba fó valór de’it ba iha leten maibé kraik la iha.