Gleno, 20 Maiu, 2016
Exelénsia sira. Ilustre konvidadu sira.

Povu Timor-Leste.

Ha’u-nia respeitu ba povu hosi munisípiu Ermera ne’ebé mak tinan ida-ne’e sai uma-na’in ba komemorasaun ofisiál ba loron-moris Restaurasaun Independénsia nian.

Ha’u hato’o ha’u-nia hako’ak boot ba Timoroan hotu-hotu iha Timór laran tomak no iha fatin ne’ebé de’it. Iha loron festa ida-ne’e, ita-nia maun-alin no inan-feton rihun ba rihun iha rai-li’ur hanoin hela kona-ba ita-nia rain ne’e, maski sira labele hamutuk ho ita iha fatin ne’e.

Ha’u hakarak atu fó saudasaun ba bainaka sira hotu-hotu no hato’o benvindu liuliu ba sira-ne’ebé hakat liu tasi-balun ho rai-boot hodi mai haksolok hamutuk ho ita iha loron ida-ne’e.

Aniversáriu ba Restaurasaun Independénsia sai hanesan loron-boot ida tanba ohin ita komemora ita-nia liberdade nu’udar Nasaun no mós susesu sira-ne’ebé ita hetan ona iha Independénsia tinan 14 nia laran.

Loron 20 Maiu sai hanesan mós oportunidade di’ak ida atu ita hamutuk halo reflesaun kona-ba dalan ne’ebé ita la’o liu ona dezde Independénsia no ita-nia partisipasaun iha prosesu konstrusaun nasaun nian hodi halo ita-nia mehi sai realidade nu’udar Nasaun no nu’udar mós hanesan sidadaun ne’ebé hakarak hetan moris ida-ne’ebé di’ak liután.

Ita manán tiha ona luta no alkansa tiha ona independénsia, tanba durante tinan 24 nia laran ita fiar, halo sakrifísiu no hamutuk.

Timoroan sira forsadu atu kaer kilat, maibé ita-nia Rezisténsia ne’e sempre sai hanesan funu ida ba pás hasoru violénsia iha forma saida de’it.

Ema tokon ba tokon komprende ita-nia sentimentu hasoru violénsia hirak-ne’e no ita-nia luta ba ita-nia dignidade nu’udar povu. Timoroan sira-nia luta konkista belun barak no hamosu solidariedade hosi ativista sira iha mundu-raiklaran tomak.

Hanesan akontese iha tinan hirak liubá, iha aniversáriu Restaurasaun Independénsia ida-ne’e, hodi ita-nia povu nia naran, ha’u hakarak hato’o ita-nia rekoñesimentu ba ita-nia belun barak ne’ebé fó-liman ba kauza liberdade povu nian no merese ita hahi’i sira tan buat ne’ebé sira halo.

Ha’u kondekora ona ema na’in-25 – hosi Timor-Leste no mós hosi rain sira seluk inklui Mosambike, Portugál, Inglaterra, Estadus Unidus, Indonézia no Austrália. Balun hetan kondekorasaun ho títulu póstumu. Iha kazu balun, kondekoradu sira labele mai partisipa iha komemorasaun ida-ne’e tanba razaun saúde.

Ha’u hakarak temi liuliu kondekorasaun ne’ebé ha’u fó ba saudozu Prezidente Samora Machel hosi Mosambike. Ha’u hato’o ha’u-nia omenajen ho laran tomak ba ninia memória.

Samora Machel sai hanesan kombatente ida ba dignidade iha frente oioin: iha libertasaun hosi nia rain rasik; iha solidariedade ne’ebé metin ba ita-nia povu nia luta ba libertasaun; no iha liña-oin hosi kombate hasoru Apartheid no rasizmu.

Tanba nia umanizmu no solidariedade, Mozambike-oan ida-ne’e nia memória ikusliu nakfilak sai patrimóniu ida ba luta bodik ba emansipasaun umanidade nian.

Maun-boot Samora nia mate, ne’ebé akontese molok nia tempu, haketak ita hosi ninia matenek no konvíviu.

Maibé, ha’u hein katak ha’u sei bele entrega pesoalmente Ordem de Timor-Leste ba kombatente ida seluk ba liberdade iha tempu badak nia laran: eis-Prezidente Jorge Sampaio hosi Portugál.

Iha tinan 1999, bainhira ita loke ita-nia janela ba liberdade, prezidénsia no governu Portugál nian soi ativista hirak-ne’ebé luta maka’as ba liberdade no defende Timoroan sira-nia kauza, hanesan Jorge Sampaio (no António Guterres), hodi presta serbisu lubuk ida-ne’ebé importante ba dignidade umanidade nian no mós Timoroan sira-nian.

Ha’u kondekora mós ema na’in-7 hosi Timor-Leste ne’ebé mai hosi kontestu akadémiku no organizasaun sosiedade sivíl sira, inklui Igreja: Amu Locatelli hosi Koléjiu Fatumaca, Amu Leão hosi Externato S. José, Amu João Felgueiras no Amu José Martins hosi Comunidade Amigos de Jesus.

Sira-nia asaun nu’udar manorin ba jerasaun timoroan tuituir malu no iha prezervasaun ba ita-nia identidade nasionál no promosaun ba ita-nia rain ne’e nia dezenvolvimentu kulturál, husik tiha ona marka ida iha ita-nia sosiedade. Amu-lulik sira-ne’e hela iha Timór tinan 50 ka 60 ona: sira hotu deside atu halo Timór nakfilak ba sira-nia rai-inan.

Ha’u kondekora mós Prof. DR. Antero da Silva, Sra. Manuela Leong hosi ONG timoroan ACbit, no mós Sr. Xisto Martins (Raebia).

Ba Ita-Boot sira hotu, ha’u hato’o ha’u-nia hako’ak boot no ha’u hein katak Ita-Boot sira sei hala’o nafatin imi-nia serbisu, liuliu iha área Direitus Umanus.

Hosi Portugál ha’u fó kondekorasaun ba ema na’in-6: balun marka prezensa iha ita-nia leet, hanesan Vise Almirante António Silva Ribeiro, Sr. Carlos de Lemos, Sr. Luís Represas no Dra. Patrícia Gaspar.

Iha momentu oioin, sira-nia misaun ba ita-nia rain sai sensitivu tebetebes.

Ha’u fó-hanoin hikas apoiu ne’ebé fó hosi Almirante António Silva Ribeiro hodi fasilita ekipamentus komunikasaun ba Falintil iha foho durante tempu okupasaun. Iha momentu ne’ebá, Pedro Klamar Fuik sai hanesan elementu ligasaun entre Almirante Silva Ribeiro no kombatente sira.

Luís Represas nia múzika la’o hale’u mundu. Nia múzika sai hanesan apelu estraordináriu ida – no ninia poezia sai hanesan “lian alarme” ida – ne’ebé halibur hamutuk Portugés tokon ba tokon nia apoiu emosionál ba ita-nia povu iha momentu ida-ne’ebé Timór enfrenta situasaun emerjénsia nasionál.

Ilustre Mosambikanu ida seluk, Sekretáriu Ezekutivu hosi Komunidade Rain sira-ne’ebé Ko’alia Lia-Portugés (CPLP), mós hetan kondekorasaun. Oras ne’e nia sai hanesan belun funu-maluk ida atu luta hodi habelar valór universál sira-ne’ebé sai ai-riin ba CPLP.

Foin lailais ne’e, ho laran-ksolok boot ha’u entrega kondekorasaun ba ema no organizasaun na’in-7 hosi Austrália, inklui Tazmánia.

Ha’u hakarak temi Senadór Bob Brown, Bob Hanney, Chris Elenor, Jean Mclean, Onoravel Meredith Burgman; aleinde Hobart East Timor Committee ne’ebé mak reprezenta hosi Julian Stanley; no saudozu Kevin Sherlock.

Feto no mane sira-ne’e, ne’ebé mak kleur ona hatudu solidariedade ba Timoroan sira, simboliza no fó-hanoin hikas mai ita kona-ba solidariedade forte no fraternál ne’ebé fó hosi maun-alin no inan-feton australianu tokon ba tokon iha territóriu Austrália tomak.

Povu australianu simu ita-nia refujiadu sira ho liman nakloke; halibur osan hodi fó ba rezisténsia; dada ema nia atensaun ba ita-nia luta; ho aten-barani hasa’e valór moralidade no umanidade nian iha relasaun internasionál sira iha momentu ida ne’ebé Timor-Leste enfrenta okupasaun no funu nia todan.

Ho laran tomak ha’u agradese sira hotu tanba sira-nia dedikasaun ba Timór.

Ha’u hakarak aproveita atu hato’o liafuan espesiál balun kona-ba kondekoradu sira-ne’e ida, saudozu Kevin Sherlock: Australianu ne’e nia laran monu ba Timór. Nia hatudu ninia dedikasaun hodi halibur no organiza dokumentu lubuk ida-ne’ebé importante kona-ba ita-nia povu, ita-nia kultura no ita-nia istória.

Kevin nia domin ba ita-nia kultura no realidade sai hanesan ezemplu ne’ebé ita hotu nu’udar Timoroan tenke banati tuir, tanba ezemplu hirak-ne’e hatudu mai ita kona-ba importánsia atu hamoris memória iha prezervasaun no tranzmisaun valór no tradisaun sira-nian, inklui mós akontesimentu sira-ne’ebé balun kontribui hodi ohin loron ita sai Nasaun ida-ne’ebé independente.

Ohin Kyrsty Gusmão simu kondekorasaun ne’ebé ha’u fó ba nia tinan kotuk maibé seidauk entrega. Ha’u-nia alin Kyrsty aprende atu hadomi Timór no fó ona nia kontribuisaun ba liberdade – molok no hafoin Restaurasaun Independénsia. Nia serbisu nafatin ho determinasaun hodi valoriza feto maluk sira no sosiedade sivíl iha ita-nia rain.

Hodi ha’u-nia naran rasik no povu Timoroan nia naran, ha’u hakarak hato’o obrigadu wain no ha’u-nia hako’ak boot ba sira-ne’ebé, hosi dook ka besik, iha rai-boot hotu-hotu, ajuda ona no ajuda hela Timor-Leste atu tuba no hamriik metin.

—X—

Ita-nia kapasidade nu’udar povu, ne’ebé hatudu durante ita-nia luta, kontinua hatudu an hafoin Independénsia.

Iha tinan 14 nia laran ikus ne’e, ita hametin instituisaun sira no hala’o soberania nasionál.

Ita hala’o tiha ona rekonsiliasaun, iha laran no mós iha li’ur. Ita hametin tiha ona pás. Ita afirma liután ona Timor-Leste hanesan sosiedade ida-ne’ebé estavel no respeitu ba malu, iha ne’ebé Timoroan sira hela, konvive no serbisu iha pás nia laran.

Ita harii demokrasia ida, iha ne’ebé sidadaun hotu-hotu bele vota ho livre no partisipa maka’as iha eleisaun sira.

Ita harii Estadu Direitu: sidadaun hotu-hotu hanesan iha lei nia okos no Estadu asegura juis ho tribunál sira-nia independénsia.
Iha ita-nia rain, lei proteje jornalista sira-nia direitu atu fó informasaun no sidadaun sira-nia direitu atu hetan informasaun.

Haree ba liberdade Imprensa, internasionalmente, Timor-Leste konsideradu ona beibeik hanesan nasaun ida hosi nasaun hirak seluk ne’ebé tuir prátika, ne’ebé di’ak liu, la’ós de’it iha rejiaun ASEAN nia laran, maibé mós iha nasaun sira seluk iha Ázia no iha Mundu.

Ita horik iha nasaun ida iha ne’ebé lei garante no proteje sidadaun sira-nia dignidade no Direitus Umanus. Foin primeira vés mak buat ne’e akontese loloos iha istória ita-nia rain nian.
Timoroan sira tenke sente orgullu ba buat ne’ebé halo tiha ona iha tinan 14 dahuluk nia laran ba nia independénsia.

Durante ne’e ita la mesak. Iha prosesu konstrusaun Estadu nian ne’e, ita hetan apoiu hosi parseria ida-ne’ebé forte no susesu di’ak ho Nasoins Unidas, no hetan mós apoiu hosi nasaun belun barak no ajénsia espesializada sira ONU nian. Parseria sira-ne’e sai fundamentál ba susesu ne’ebé mak ita atinje ona, no valoriza maka’as tebes hosi ita-nia povu.

Ha’u agradese ba ita-nia parseiru dezenvolvimentu sira-ne’ebé fó apoiu mai ita-nia serbisu atu promove progresu sosiál no ekonómiku, no hametin instituisaun sira.

—X—

Ita hala’o hela integrasaun di’ak ida iha komunidade Nasaun sira-nian, la’ós de’it iha nivel rejionál maibé mós iha nivel internasionál.

Prosesu pás no rekonsiliasaun harii relasaun foun hirak-ne’ebé di’ak no amizade ho ita-nia viziñu Indonézia, no ohin loron nasaun rua ne’e soi kooperasaun bilaterál no multilaterál intensa no pozitiva ida-ne’ebé lori vantajen ba parte rua ne’e hotu, no hasa’e kontaktu familiár, kulturál no ekonómiku entre Timoroan no Indonéziu sira.

Governu Timor-Leste no Indonézia nia relasaun serbisu di’ak hatudu ona progresu lubuk ida iha área oioin.

Ho laran-ksolok boot ha’u rona kona-ba progresu sira-ne’ebé hetan tiha ona iha prosesu identifika ema sira-ne’ebé lori ba Indonézia durante tempu funu nian. Tinan ida-ne’e, Timoroan na’in-17, ne’ebé lakon tinan barak, mai vizita Timór hodi halibur malu fali ho sira-nia família. Primeiru grupu timoroan sira iha sirkunstánsia sira-ne’e filafali mai Timór ba dahuluk iha tinan 2015. Prosesu identifikasaun hirak-ne’e no reenkontru ho família sira sai hanesan inísiu ba implementasaun hosi Komisaun Lia-Loos no Amizade nia rekomendasaun ida, no progresu iha área hirak-ne’e rezulta hosi kooperasaun entre Provedoria Direitus Umanus no Justisa Timor-Leste nian no Komisaun Nasionál Direitus Umanus Indonézia nian (KOMNAS HAM), ho partisipasaun hosi organizasaun ida naran Justisa no Direitus iha Ázia (AJAR) ne’ebé iha parseria ho ACbit. Kolaborasaun ne’ebé hala’o ne’e rezulta hosi orientasaun prezidente Joko Widodo nia administrasaun nian no ita-nia governu nian, no merese hetan énfaze no ita hahi’i buat ne’e.

Relasaun kooperasaun no amizade ho Austrália mós maka’as tebes maski asuntu importante balun seidauk rezolve relasiona ho definisaun ba baliza tasi entre nasaun rua ne’e.

Ita-nia governu sira soi relasaun kooperasaun bilaterál no multilaterál hirak-ne’ebé importante no Timoroan sira apresia duni Austrália nia asisténsia.

Povu timoroan no povu Austrália hala’o hela interkámbiu ida-ne’ebé intensu iha nivel hotu-hotu. Australianu tokon ba tokon hatudu nafatin sira-nia laran-luak no amizade loloos ba Timór, no ha’u hakarak hato’o ba sira katak ha’u rekoñese no agradese apoiu hirak-ne’e.

Timor-Leste, Austrália no Indonézia hanesan parseiru ne’ebé kontribui maka’as tebes ba ambiente konfiansa no estabilidade ne’ebé nesesáriu ba dezenvolvimentu rejiaun ne’e nia povu sira.

Ita labele husik adia tan kestaun fronteira Tasi Mane no labele husik mós atu kestaun ida-ne’e fó prejuízu ba relasaun ne’ebé ita-nia povu sira hakiak ona hahú hosi Funu Mundiál Daruak no iha momentu importante sira seluk iha tinan 70 ikus ne’e.

Hametin Estadu Timor-Leste sai hanesan aspirasaun ida-ne’ebé lejítimu tuir komunidade internasionál nia hareen. Delimitasaun fronteira sai hanesan hakat importante ida iha prosesu ne’e nia laran, no bazeia ba Direitu no prátika hirak- ne’ebé di’ak hosi komunidade nasaun sira-nian.

Ita-nia maun-alin australianu barak komprende aspirasaun hirak-ne’e, inklui Austrália nia órgaun soberania sira ho sosiedade sivíl.
Ho laran ha’u hakarak hato’o ha’u-nia no Timoroan sira-nia rekoñesimentu ba solidariedade no apoiu ne’ebé Australianu rihun ba rihun fó mai, relasiona ho demarkasaun fronteira ita-nian.

Ha’u apela ba governu australianu atu buka meius hodi hatán ba Timor-Leste nia pedidu ne’ebé naturál no lejítimu, hodi loke negosiasaun kona-ba tau baliza permanente ba fronteira tasi nian entre viziñu rua ne’ebé hanoin di’ak ba malu.

Negosiasaun hanesan ida-ne’e lori tempu naruk. Maski nune’e, bainhira nasaun rua respeita malu no hala’o kooperasaun ne’ebé maka’as, sira tenke hatudu hakarak atu fó kedas hakat sira-ne’ebé nesesáriu, dudu prosesu hirak-ne’e ba oin no kontribui atu hametin relasaun bilaterál, ohin loron no aban-bainrua.
Povu timoroan hein atu haree governu Austrália foti asaun ne’ebé pozitivu.

Hosi parte Timór, ita hili ita-nia maun-boot Xanana Gusmão atu lidera kestaun ne’e. Nia ema ida ke iha kapasidade ne’ebé presiza no ha’u fiar katak nia sei bele to’o ba rezultadu sira-ne’ebé ita-nia nasaun hakarak atu hetan.

Liután ida-ne’e, iha ita-nia rejiaun, ita kontinua hakle’an liután ita-nia relasaun amizade ho país viziñu sira ASEAN nian.

Organizasaun ida-ne’e nia asaun estabilizadora no pasífika han malu ho ita-nia vizaun kona-ba relasaun internasionál sira. Dezde nia harii, ASEAN sai hanesan fatór importante ida ba pás no estabilidade, no kontribui ona hodi halo Sudeste Aziátiku sai seguru liu, dezenvolve kooperasaun entre Estadu membru sira no fasilita dezenvolvimentu. Mezmu iha momentu ida-ne’ebé atividade ekonómika tun iha mundu tomak, nasaun ASEAN sira sai hanesan nasaun sira ho taxa kreximentu ekonómiku aas liu iha mundu ne’ebé rezulta nasaun sira-ne’e nia povu hetan moris di’ak liután.

Timor-Leste nia kooperasaun ho ASEAN metin tebetebes. Ita halo parte hosi prosesu lubuk ida-ne’ebé mak organiza hosi ASEAN, ho objetivu atu hametin seguransa rejionál, no seluk-seluk tan.

Ita-nia rain ne’e hateke ho espetativa ba momentu iha ne’ebé nia sei bele tama ASEAN nu’udar membru.

Iha kontinente aziátiku, ita harii tiha ona relasaun kooperasaun no amizade ne’ebé forte ho Japaun, Repúblika Koreia, Repúblika Populár Xina no sira seluk tan. Liután ida-ne’e, ita halo tiha ona parseria ne’ebé forte no di’ak loos ho Estadus Unidus no Uniaun Europeia, no harii tiha ona relasaun ne’ebé metin ho poténsia Europa nian balun iha nivel bilaterál, inklui Portugál. Nasaun hotu-hotu ne’e sai hanesan ita-nia parseiru ne’ebé durante ne’e fó asisténsia ne’ebé kontinua no metin ba esforsu ne’ebé ita halo komesa iha 2002 hodi dezenvolve ita-nia rain. Ita-nia povu valoriza tebetebes sira-nia apoiu ne’e.

Tinan ne’e ita kompleta tinan rua, hosi 2014 to’o 2016, ne’ebé Timor-Leste kaer prezidénsia CPLP nian ba dahuluk.

Ita-nia prezidénsia CPLP pro tempore mak fó laran-ksolok tebes mai ha’u tanba prezidénsia ne’e hatudu dalan ne’ebé ita-nia rain la’o ona iha tempu badak nia laran – hosi territóriu ida-ne’ebé hetan okupasaun no halo rezisténsia, ba to’o iha Estadu ida-ne’ebé kredivel no responsavel, ne’ebé halo parte hosi komunidade nasaun sira-nian, no buka dalan hodi hametin ita-nia povu nia seguransa no moris-di’ak.

Ita hakarak kontinua atu hakle’an liután Timor-Leste nia kontribuisaun ba estabilidade, pás no dezenvolvimentu iha ita-nia rejiaun no iha parte seluk iha mundu, bainhira de’it ita-nia partisipasaun ne’e sai importante, hanesan akontese tiha ona iha Giné-Bisau no mós ho partisipasaun hosi efetivu sira Falintil-FDTL no PNTL nian iha misaun pás sira Nasoins Unidas nian.

Povu Timor-Leste,

Ha’u-nia diskursu ne’e sai hanesan ha’u-nia diskursu ikus ba aniversáriu Restaurasaun Independénsia, nu’udar Prezidente Repúblika.

Dezde ha’u-nia mandatu hahú, ha’u hala’o ha’u-nia knaar bazeia ba objetivu fundamentál rua: habesik Estadu ba sidadaun sira no hametin estabilidade nasaun nian. Ha’u tuba metin nafatin ba programa hirak-ne’e.

Lori Estadu ba besik sidadaun sira ne’e importante tebetebes hodi hametin unidade nasionál. Importante mós atu fó aten-barani ba sidadaun no komunidade sira hodi buka solusaun ba sira-nia problema rasik.

Estadu kaer hela knaar ne’ebé importante tebetebes hodi rezolve problema sira-ne’ebé relasiona ho dezenvolvimentu nasionál.
Maibé se karik Estadu la rona sidadaun sira, se karik la promove sidadaun sira-nia partisipasaun iha projetu dezenvolvimentu aldeia no suku sira Timor-Leste nian, nune’e ita sei labele hetan dezenvolvimentu lokál ne’ebé produtivu no efikás.

Iha momentu ne’ebé ita selebra aniversáriu Restaurasaun Independénsia ba dala 14, ita-nia nasaun, ita Timoroan sira hotu, kontinua hasoru dezafiu sira-ne’ebé, tenke hakat liu, liuhosi polítika sira-ne’ebé efikás no metin.

Dezafiu boot liu ne’ebé mak ita iha, nu’udar dezafiu sira seluk hotu nia aman, maka nesesidade atu halo ekonomia mina-rai nian nakfila ba ekonomia ida diversifikada no sustentavel atubele halakon kiak.

Timor-Leste presiza atu hasa’e setór produtivu nasionál hodi valoriza ita-nia rain nia rikusoin, inklui mós serbisu ne’ebé halo hosi ita-nia agrikultór sira no mós traballadór timoroan sira seluk.

Hanesan ha’u hatete dala barak ona katak, atu hakat liu dezafiu hirak-ne’e, ita tenke mós hakat liu dezafiu ne’ebé relasiona ho kualidade servisu públiku sira-nian no Estadu nia efisiénsia.

Servisu públiku sira tenke efisiente liután hodi dada investidór barak liután no investimentu sira ho kualidade mai ekonomia Timor-Leste nian.

Dezenvolvimentu ekonómiku ezije pás no estabilidade.

Emprezáriu sira no sosiedade iha jerál hakarak estabilidade, pás no konfiansa hodi bele investe, prodús, haruka ba rai-li’ur no investe filafali lukru sira barak liután iha ita-nia nasaun.

Ha’u haree la’ós de’it progresu sira-ne’ebé ita halo iha tinan 14 nia laran, maibé mós dezafiu sira iha ita-nia oin ne’ebé buka atu koko ita-nia maturidade.

Estadu Direitu, ho respeitu ba lei, respeitu ba órgaun soberania sira–hosi órgaun soberania sira hotu-hotu–ho Tribunál no Juis sira-nia independénsia, no seluk-seluk tan, hamosu dezafiu lubuk ida. Buat ne’e normál.

Haree ba kazu Timor-Leste, ita-nia Lei-Inan rasik hamosu dezafiu lubuk ida ba ita.

Dezafiu no difikuldade sira-ne’e la’ós dahuluk maibé mós la’ós dahikus. Tuir loloos, hasoru dezafiu sira-ne’e halo parte hosi ita ema nia karakter, hanesan feto no mane. Buat ne’ebé bele kestiona ita-nia maturidade mak maneira ita hatán ba dezafiu sira-ne’e.

Estadu Direitu no lei sira la’ós buat ida ke jurista sira mak hamosu hodi komplika.

Estadu Direitu sai hanesan mekanizmu defeza no protesaun nian ba sidadaun no instituisaun sira, no ba pás iha sosiedade nia leet.

Sidadaun sira, órgaun soberania sira, ukun-na’in sira, ita hotu tenke halo tuir lei, tanba bainhira laiha respeitu ba regra sira, labele iha dixiplina, no lahó dixiplina ita labele harii pás no estabilidade.

Ita-nia rain presiza estabilidade no ezemplu di’ak kona-ba respeitu ba lei, tanba ida-ne’e mak tranzmite konfiansa ba família sira ho ajente ekonómiku sira no lori vantajen mai hodi kontinua dezenvolve ita-nia país no foti Timor-Leste nia naran iha komunidade internasionál.

Timoroan sira sempre defende diálogu. Ita sempre hala’o diálogu ho ema hotu-hotu, inklui mós ita-nia funu-maluk sira, atu lori pás no seguransa ba ita-nia sosiedade.

Ha’u fiar katak ita hotu iha kapasidade atu ko’alia ba malu ho hanoin di’ak, hodi buka solusaun ne’ebé di’ak no hakat liu dezafiu sira ohin loron nian.

Dezafiu sira-ne’ebé tuir loloos presiza hetan duni atensaun no ema hotu-hotu nia kometimentu mak halakon kiak, dezenvolve ekonomia, hasa’e moris-di’ak no harii futuru ida-ne’ebé di’ak liután ba ita-nia oan sira.

Dezafiu sira-ne’e tenke halibur liután ita atu hamutuk, no sai importante hotu liután duké diferensa opiniaun sira, ne’ebé mós iha entre ita, no buat ne’e sai normál.

Nu’udar sidadaun no hanesan Prezidente Repúblika ha’u enfrenta ona dezafiu sira no hakat liu ona akontesimentu sira barak hosi ita-nia istória, hanesan ho imi, maun-alin no inan-feton sira. Ita hotu enfrenta ona dezafiu boot sira, iha ita-nia rai-doben ne’e.

Ohin ha’u hatete ba imi: ha’u tau neon-metin ba ita-nia povu nia maturidade. Ha’u fiar ba Timoroan sira-nia kapasidade atu kontinua harii rain ida-ne’ebé di’ak liután no seguru liután ba ita-nia an rasik no ba ita-nia oan sira.

Nu’udar Prezidente Repúblika no hanesan sidadaun, ha’u sei la’o nafatin hamutuk ho imi hodi hametin soberania no hamutuk harii nasaun ida-ne’ebé di’ak liután.

Nune’e, Maromak haraik tulun ba ita no proteje nafatin ita-nia rain.

Viva Timor-Leste.