Hatulia, sábadu, 21 Maiu, 2016 – Hafoin prezide tiha iha komemorasaun Restaurasaun Independénsia Timor-Leste nian ba dala 14 ne’ebé hala’o iha Gleno Munisípiu Ermera, S.E. Prezidente Repúblika, Taur Matan Ruak, aproveita  kontinua ba hala’o diálogu komunitáriu ho komunidade sira iha Suku Licapat, no iha sábadu ho komunidade Suku Limeia Sorin Balun, Postu Administrativu Hatulia.

Durante diálogu iha suku rua refere, Xefe Estadu kontinua esplika ba komunidade sira sobre nia motivu ba vizita suku hirak durante nia mandatu iha ne’ebé atu: agradese komunidade sira-nia kontribuisaun iha tempu pasadu no husu atu kontinua nafatin iha faze ukun an ida-ne’e atu hetan moris-di’ak. Tanba, mezmu tinan 14 ona restaura independénsia maibé povu sei moris iha kiak. Aleinde ida-ne’e, Xefe Estadu mós aproveita oportunidade ne’e hodi esplika ba komunidade sira sobre progresu no dezafius iha prosesu harii nasaun, fó mós motivasaun sidadaun sira atu serbisu maka’as ho badinas atu kontribui ba prosesu konstrusaun Estadu nian.

Iha Suku Licapat, komunidade sira aprezenta preokupasoins mak hanesan, estrada ba suku refere kondisaun aat tebes iha tempu udan, falta bee moos iha tempu bailoro no halo susar agrikultór kafé atu fase kafé-fuan ne’ebé dulas ona, pesoál saúde iha ona maibé seidauk iha postu saúde, folin kafé kiik liu no aldeia ida hosi aldeia 6 seidauk asesu ba eletrisidade 24 oras, no ikusmai maka problema veteranus no preokupasaun reál seluk hirak ne’ebé liga ba komunidade sira-nia moris loroloron.

Enkuantu iha Suku Limeia Sorin Balu, komunidade aprezenta  preokupasoins kuaze atu hanesan, maibé iha Suku ne’ebé iha ema na’in-700 iha aldeia rua maka seidauk iha asesu ba eletrisidade. Razaun maka katak, kompañia sira sukat beibeik ona, maibé tanba iha dezentendimentu entre veteranus seidauk bele realiza. Husu mós atu liga ponte ba Suku Limeia Kraik no Coliate atu bele fasilita viajen besik ba Postu Hatulia Villa, tanba oras ne’e daudaun estrada ba Postu Hatulia tenke liuhosi fali Postu Letefoho no Ermera maka foin ba Hatulia no problema reál sira seluk.

Hatán sobre preokupasoens ba estrada, Xefe Estadu hatete katak, kompara ho tinan hirak liubá kotuk, estrada husi Dili mai Gleno kondisaun aat. Maibé, agora kondisaun di’ak ona, sei falta maka liga ba Postu hirak nune’e. Xefe Estadu husu komunidade sira atu fiar nafatin ba governu no iha pasiénsia hodi hein, tanba maski sei presiza tempu, estrada hirak ne’e sei reabilita hotu. Razaun seluk mós maka katak, Governu labele halo sasán hotu dada ida de’it, tan iha mós nesesidade seluk ne’ebé governu presiza mós tau matan.

“Imi-nia estrada tenke hadi’ak, tanba imi produtór kafé ne’ebé fó reseitas boot ba Timor-Leste hafoin mina no gás”, dehan Xefe Estadu.

Hatán sobre kafé folin ne’ebé tun, Xefe Estadu husu atu Estadu labele impoin kafé folin, tanba sistema merkadu livre ne’ebé Timor-Leste adota. Nune’e, Xefe Estadu husu kafé-na’in sira atu labele lakon motivasaun, tanba loron ruma kafé folin sei di’ak, ho nune’e Xefe Estadu husu atu kontinua badinas no tau matan nafatin ba sira-nia kafé.

Enkantu ba komunidade Suku Limea Sorin Balu, Xefe Estadu kontente ho grupu agrikultór ne’ebé kuda baunilla, pimenta iha suku ne’e, no husu atu kuda barak liután. Tanba ne’e, hola parte ba hadi’ak vida ekonomia família nian.

Xefe Estadu ba vizita uluk fatin kuda baunilla no pimenta ne’ebé hamutuk kuaze ektares 13 iha suku ne’e antes hala’o diálogu komunitáriu.

Hola parte iha diálogu komunitáriu ba Suku rua refere maka hanesan: Administradór Postu Administrativu Laleia (Manatutu), Xefe Suku Mane Hat (Manatutu), Bahamori (Baucau) no Liaruca (Viqueque) nu’udar bainaka espesiál Xefe Estadu nian atu bá haree diretamente suku seluk nia kondisaun dezenvolvimentu wainhira kompara ba sira-nia suku rasik.