Aileu, 18 Jullu 2016 – S.E. Prezidente Repúblika, Taur Matan Ruak, akompañadu husi Primeira Dama, Dra. Isabel Ferreira, iha segunda-Feira dadeer, hala’o diálogu komunitáriu ho populasaun Suku Lahae, hafoin kontinua iha parte lokraik ho komunidade Suku Aisirimou no Suku Seloi Malere. Suku tolu refere pertense ba Postu Administrativu Aileu Vila, Munisípiu Aileu.

Iha diálogu dahuluk, iha Suku Lahae, komunidade sira kestiona kona-ba jestaun Estadu nian atu valoriza ema defisiente sira, hodi partisipa iha prosesu dezenvolvimentu nasaun nian.

Hatán ba preokupasaun ne’e Xefe Estadu hatete, Estadu la haluha ema defisiente sira. Tan ne’e, liuhusi Ministériu Solidariedade Sosiál, Estadu tenta buka maneira oioin atu rezolve problema sosiál sira, inklui tau matan ba ema ho defisiénsia sira.

“Governu iha planu ba defisiente sira. Primeiru, liuhusi subsídiu ba ema defisiente sira. Segundu, Governu ajuda ba Sentru sira ne’ebé tau matan ba defisiente. Governu sei la haluha defisiente sira”, subliña Xefe Estadu.

Komunidade Suku Lahae mós lamenta ba Xefe Estadu kona-ba indivíduu balu husi Komisaun Omenajen, ne’ebé husu osan ba veteranus sira, ne’ebé hakarak trata pensaun veteranus. Aleinde ne’e, ko’alia mós kona-ba folin kafé ne’ebé kontinua tun, ne’ebé sai mós hanesan preokupasaun komunidade sira-nian.

Kona-ba pagamentu atu trata pensaun veteranus, Xefe Estadu husu atu populasaun sira bele fó-hatene ba autoridade sira, atu halo investigasaun, karik iha evidénsia ka hetan irregularidade ruma iha komisaun omenajen nia laran.

No ba folin kafé ne’ebé tun, Xefe Estadu, enkoraja agrikultores kafé atu diversifika produtu kafé no labele fa’an de’it kafé-musan, ne’ebé nia folin la hanesan ho kafé-uut ka kafé laku-teen. Xefe Estadu konsidera folin kafé ne’ebé tun-sa’e, hanesan kestaun ida ne’ebé “normal” no fiar katak, loron ida kafé folin sei sa’e. “Buat hotu depende ba merkadu”, afirma Xefe Estadu.

Iha diálogu daruak, ne’ebé junta komunidade Suku Aisirimou no Suku Seloi Malere, populasaun sira husu, atu Governu bele halo muru protesaun iha Mota Manufoni, hodi proteje to’os ortikultura populasaun sira-nian ne’ebé kuda besik mota-ninin.

Hatán ba kestaun ne’e, Xefe Estadu rekoñese problema mota, iha médiu no longu prazu bele estraga fatin produtivu sira iha Timor, ne’ebé barakliu, besik mota ninin. Maibé halo de’it muru protesaun no “bronzon” sei la rezolve problema ida-ne’e.

“Dalan ba ita mak ita tenke halo barrajen (bendungan), atu konsentra bee no regulariza (bee) mota. Ba ida-ne’e, ita presiza osan barak. Agora, ita sei uza atu hadi’ak estrada, tan ne’e ita labele halo buat hotu dala ida”, responde Xefe Estadu.

Populasaun suku rua mós husu atu Governu bele kontinua programa PNDS, tanba programa ne’e responde duni saida mak komunidade sira enfrenta iha baze. Aleinde ne’e, komunidade sira mós husu atu Governu bele aumenta tan saláriu Ekipa Jestaun PNDS iha suku.

Ba kestaun ne’e, Xefe Estadu husu jestores sira-nia pasiénsia no husu sira atu kontinua fó an ba atu halo servisu.

“Ha’u rekoñese imi-nia kontribuisaun. Estadu uza ona imi, ha’u espera sei uza nafatin imi”, afirma Xefe Estadu.

Bainaka espesiál Xefe Estadu nian ne’ebé mak hola parte iha diálogu komunitária ba Suku sira refere maka hanesan; Administradór Postu Laclubar (Manatutu), Xefe-Suku Laisorulai de Cima (Quelicai, Baucau), Xefe-Suku Lepo (Bobonaro) no Xefe-Suku Colimau (Bobonaro) marka prezensa iha diálogu ho suku tolu tomak atu haree, rona no kompara realidade ne’ebé maka komunidade iha suku tolu hasoru ba sira-nia suku rasik.

Ikusmai hakarak mós atu informa katak, reprezentante Komisáriu ba Komisaun HIV-SIDA aproveita tebes okaziaun diálogu ho komunidade suku tolu hodi habelar informasaun sobre lala’ok moras SIDA, ema na’in hira ona mak sofre moras ne’e, inklui fó mós sujestaun ba komunidade sira atu kuidadu an hodi moras ne’e la da’et ba sira.