Dili, Parlamentu Nasionál, 20 Setembru, 2016

Señór Prezidente Parlamentu Nasionál,

Señora no Señór deputadu sira,

Exelénsias,

Povu Doben Timor-Leste.

Ha’u nia hako’ak boot ba Ita Boot sira ne’ebé hamutuk iha fatin ida ne’e: distintus membrus Parlamentu Nasionál nu’udar reprezentante eleitu sidadaun Timor-Leste sira-nian, membrus hosi órgaun soberania sira hotu no distintus konvidadus ne’ebé mak akompaña ami iha sesaun abertura Parlamentu Nasionál nian ne’e.

Ha’u nia hako’ak boot mós ba Timoroan sira iha Timór laran tomak no iha rai li’ur, ne’ebé serbisu loro-loron hodi hadi’a sira nia família nia moris. Timoroan sira nia serbisu—iha fatin ne’ebé de’it, iha sidade, iha foho, iha to’os laran—hanesan ita nia nasaun nia rikusoin boot liu.

Ha’u agradese ba Señór Prezidente Parlamentu Nasionál no mós ba señór no señora deputadu sira hodi simu ha’u ho laran di’ak. Ho laran ksolok boot mak ha’u sempre mai iha Uma Demokrasia ida ne’e atu hato’o ba Exelénsia sira, no mós ba sidadaun sira, ha’u-nia hanoin kona-ba nasaun nia dezenvolvimentu.

Kontaktu entre órgaun soberania sira no kooperasaun entre instituisaun Estadu sira nian nu’udar fatór importante atu garante demokrasia nia lala’ok di’ak.

Ha’u agradese mós ba konvite ne’ebé Prezidente Parlamentu Nasionál hato’o mai ha’u hodi partisipa iha III Lejizlatura nia sesaun lejizlativa dala 5. Ha’u mai koalia iha abertura Parlamentu Nasionál ba dala ikus nu’udar Prezidente Repúblika. Sesaun ida ne’e mós sesaun lejizlativa ida ikus ba Ita Boot sira nu’udar deputadus III Lejizlatura nian (2012-2017). Ne’e hanesan momentu di’ak ida atu hato’o ha’u nia vizaun kona-ba Estadu Nasaun nian, kona-ba buat hirak ne’ebé ita nia Povu konsege alkansa ona no ikus liu kona-ba dezafius ne’ebé sei mai iha tinan hirak oin mai.

Hori bainhira ha’u toma pose nu’udar Prezidente Repúblika iha loron 20 Maiu 2012, ha’u estabelese prioridade fundamentál hirak ne’ebé presiza tau atensaun hodi hametin soberania no independénsia nasionál:

  • Haburas ekonomia ida ne’ebé sustentavel hodi valoriza rikusoin nasionál.
  • Dezenvolve Edukasaun no Formasaun hodi valoriza ita nia foin sa’e sira, agrikultór sira no Rekursus Umanus nasaun ne’e nian, hasa’e Timoroan sira nia kapasidade atu sira bele hatán ba nesesidade sira dezenvolvimentu nian.
  • Investe iha ekonomia inkluziva ida hodi kria kondisoins ne’ebé di’ak atu dada tan investimentu iha rai laran no hosi rai li’ur, diversifika ekonomia no kria serbisu.
  • Desentraliza ekonomia hodi harii pólu dezenvolvimentu, hametin koezaun nasionál no dezenvolve ita nia nasaun ho modun ekilibradu.
  • Ikus liu atu dehan tan de’it katak ha’u sempre defende no promove nesesidade atu envolve sidadaun sira nia partisipasaun iha prosesu dezenvolvimentu nasionál.

Atu alkansa dezenvolvimentu inkluzivu no sustentavel ida ne’ebé ita nia rain presiza, ita tenke haforsa Timoroan sira nia partisipasaun iha dezenvolvimentu ekonómiku no mós iha sosiedade, no hakbesik liu tán Estadu ba sidadaun sira.

Prioridade sira ne’e fó orientasaun ba ha’u nia mandatu no tenke sai hanesan matadalan ida ne’ebé ita bele uza hodi analiza dalan ne’ebé ita la’o liu ona iha tinan ikus hirak liu bá no avalia Estadu Nasaun.

Hanesan ha’u hatete dala barak ona, ita halo progresu barak hahú hosi Restaurasaun Independénsia.

  • Ita hametin tiha ona paz. Ita hakat liu ona prosesu rekonsiliasaun ida ne’ebé konsidera nu’udar ezemplu di’ak ida iha rejiaun no mós iha mundu.
  • Ita harii tiha ona Estadu Direitu demokrátiku. Sidadaun hotu-hotu hanesan iha lei nia oin no sira mak hili ukun na’in sira, deputadu sira no reprezentante sira seluk ho livre no hakmatek.

Estabilidade sosiál no polítika ne’ebé mak harii tiha ona hanesan vitória ita hotu nian, la’ós lider sira nian de’it maibé mós sidadaun sira nian. Estabilidade hanesan kondisaun importante tebes atu dezenvolvimentu ekonómiku no sosiál bele hetan susesu. Relasiona ho prosesu dezenvolvimentu:

  • Iha ona planu estratéjiku dezenvolvimentu rua;
  • 90% hosi populasaun bele asesu ona eletrisidade;
  • Ita hadi’a tiha ona estrada liu kilómetru 200;
  • Ita harii tiha ona eskola lubuk ida. Aleinde ne’e, agora daudauk ita dezenvolve hela rede kuidadu saúde ne’ebé sei fó benefísiu ba populasaun. Ita halo ona progresu iha nivel Saúde no Edukasaun, liuliu ba ita nia labarik ho foin sa’e sira;
  • Ita komesa hakat ona ba iha desentralizasaun ekonómika, no iha ona planu atu investe maka’as iha projetu boot rua iha Oekusi no iha área kosta súl;
  • Foin lailais ne’e, governu fó kompeténsia administrativa hirak ba munisípiu sira ho objetivu atu hakbesik servisu sira ba populasaun sira;
  • Polítika sira kona-ba apoiu ba kbiit laek sira kontribui ona hodi hamenus kiak no moris mukit, liu-liu ba ita nia ferik-katuas sira, feto faluk no oan kiak sira, veteranu sira no sira seluk tan.

Tulun ne’ebé Estadu fó ba ita nia maun alin no inan feton kbiit-laek sira, hanesan konkista importante ida ne’ebé ita nia nasaun alkansa hafoin independénsia. Maski nune’e, durante ha’u-nia viajen ba foho hodi vizita suku no knua hirak ne’ebé hela liu iha fatin izoladu, ha’u sente triste tebes wainhira haree katak, liutiha tinan 14 independénsia, apoiu ba grupu vulneravel sira dala barak la hatán ba nesesidade ne’ebé sira iha duni no Timoroan barak sei moris hela iha kiak nia laran.

Apoiu ne’ebé nasaun fó ba veteranu sira, hanesan rekoñesimentu ne’ebé Timor-Leste fó ba sira ne’ebé durante funu hasoru perigu hirak no hatudu aten barani hodi serbí komunidade tomak. No ita labele haluha! Sira fó apoiu diretu ka indiretu mai ita ida-idak iha fatin ida-ne’e.

Ha’u nia hako’ak boot no saudasoins ba veteranu sira ho sira nia família, ne’ebé kontribui ba pás no seguransa iha rai laran. Ha’u-nia hako’ak boot mós ba feto faluk no oan kiak sira ne’ebé halo sakrifísiu atu ohin loron ita hamriik iha Nasaun di’ak liu ida. Rekoñesimentu ba veteranu sira hanesan prosesu ida ne’ebé seidauk kompletu. Balun simu ona apoiu, balun seidauk. Ida ne’e hamosu beibeik konflitu entre veteranu sira rasik. Situasaun hirak ne’e tenke hapara kedas. Ita labele permite injustisa iha ita nia leet.

Estadu halo hela esforsu boot ida. Maibé, hanesan ha’u hatete dala barak ona, ha’u sente preokupasaun kona-ba sustentabilidade projetu ida ne’e nian, ne’ebé tinan ba tinan nafatin de’it, nunka rezolve. Ha’u apela ba veteranu sira rasik atu partisipa hodi tulun Estadu halo justisa ne’ebé loos, hodi fó onra ba kapítulu ida ne’e iha ita nia istória libertasaun nasionál.

Sistema ne’ebé estabelese hosi Lei Pensaun Vitalísia hamosu mós preokupasaun barak. Ha’u lakohi influensia Parlamentu Nasionál, tanba ha’u iha konsiderasaun boot ba señoras no señores deputadus nu’udar reprezentante sira nasaun nian.

Maibé, nu’udar Prezidente Repúblika, ha’u sente katak ha’u iha devér atu dada ema nia atensaun ba situasaun ida ne’ebé ha’u konsidera hanesan todan no la justu iha ita nia sosiedade nia leet.

Hanesan Ita Boot sira hotu hatene, hosi kedas ha’u sei lidera ita nia Forsa Armada sira, ha’u sempre kontra no nafatin kontra Lei Pensaun Vitalísia.

Lei ne’e kria tiha sistema ida ne’ebé fó ezemplu ladi’ak ba sidadaun sira. Iha kazu balun, Lei Pensaun Vitalísia bele kria parazitas tanba fulafulan simu osan boot hosi Estadu maibé ema balun la halo buat ida ba sosiedade hodi selu fali apoiu laran luak ne’ebé fó ba sira.

Sistema ida hanesan ida-ne’e injustu tebe-tebes wainhira kompara ho situasaun hosi veteranu sira no ema hirak ne’ebé maka moris kiak duni iha ita nia rain[1].

Partidu polítiku sira hatene katak Lei Pensaun Vitalísia la justu. Tanba ne’e mak sira promete halo revizaun ba Lei, iha tempu besik ona ba eleisaun. Ha’u lembra rona promesa hirak ne’e iha 2011 no 2012. Maibé liu tiha tinan haat ha’u seidauk haree proposta ida atu halakon ka halo revizaun ba lei ida ne’e. Ha’u husu ba ha’u nia an rasik, hanesan ita nia maun-alin no inan-feton timoroan barak mós husu, tanba sá?

Ha’u halo apelu ba Exelénsia sira, no mós ba lider nasionál hotu-hotu ne’ebé mak kaer responsabilidade polítika, atu fó prioridade ho laran tomak ba kestaun ida ne’e.

Ha’u halo apelu ba Parlamentu Nasionál atu loke debate públiku luan ida ne’ebé transparente, simples no momoos kona-ba benefísiu no vantajen hirak ne’ebé prevee iha Lei nr. 1/2007, hosi 18 Janeiru, kona-ba Pensaun Mensál Vitalísia ba Deputadu sira no Regalias sira seluk, no mós kona-ba Lei nr. 14/2009, hosi 21 Outubru, ne’ebé mak estabelese remunerasaun ba titulár kargu polítiku sira.

Rona povu nia opiniaun, diskute no halo alterasaun ne’ebé presiza ba lei sira ne’e, sei hasa’e Justisa iha sosiedade nia laran no mós sidadaun sira nia respeitu ba ita nia instituisaun demokrátika sira.

Ha’u fiar katak Parlamentu Nasionál nia ajenda lejizlativa ba sesaun dala ikus ne’e ambisiozu tebes, maibé la bele sai obstákulu ba prosesu buka solusaun téknika hirak ne’ebé di’ak, konsensuál no politikamente metin liu. Atu halo reforma lejizlativa ne’ebé kle’an tebes iha lejizlatura ida nia rohan, ezije konsensu no kuidadu boot liu tan. Ida ne’e aplika ba projetu lejizlativu sira ne’ebé mak diskute hela iha Uma-Fukun ida ne’e, ne’ebé relevante tebes ba ita nia nasaun nia futuru, hanesan Lei Pensaun Vitalísia, Lei kona-ba Rai, Reforma Fiskál ka Lejizlasaun Anti-Korrupsaun.

 

Señór Prezidente Parlamentu Nasionál,

Señora no Señór deputadu sira,

Exelénsias,

Asuntu ida ne’ebé merese ha’u temi iha ne’e mak Timor-Leste nia dalan ba integrasaun internasionál. Susesu ne’ebé diplomasia timoroan alkansa tiha ona hatudu ita nia diplomata sira nia dedikasaun ho kualidade. Kualidade hirak ne’e merese ita hahi’i nia.

Hahú hosi kedas Restaurasaun Independénsia, diplomasia timoroan konsege hasai vantajen no haburas tan diplomasia Rezisténsia nia imajen seriedade no rigór. Ita nia diplomasia ne’ebé ita hala’o, molok no hafoin Restaurasaun Independénsia, kontribui ba Timór nia afirmasaun iha mundu.

Komunidade internasionál rona apelu ne’ebé ita hotu no veteranu sira frente armada nian halo ba paz durante ita nia luta, tanba ita nia maun-alin no inan-feton sira iha frente Diplomátika serbisu maka’as ho neon.

Diplomasia Timor-Leste, nu’udar nasaun independente, fó kontinuidade no hariku tradisaun diplomátika hirak ne’e, ho nune’e tulun hametin Estadu no haforsa kondisaun sira ne’ebé nesesáriu atu bele hala’o soberania nasionál.

Parseria multilaterál ka bilaterál ne’ebé ita halo ho Nasoins Unidas no parseiru dezenvolvimentu sira kontribui hodi realiza ita nia prioridade sira konstrusaun nasionál nian. Apoiu hosi ita nia nasaun belun sei nafatin importante iha área oi-oin. Ha’u hakarak temi liu-liu apoiu ne’ebé sira fó ba ita nia esforsu dezenvolvimentu sosiál, valorizasaun ba setór produtivu nasionál no diversifikasaun ekonomia.

Susesu ne’ebé polítika paz no rekonsiliasaun hetan ona, kontribui ba dezenvolve no hametin ita nia relasaun amizade no kooperasaun ho nasaun viziñu, Indonézia no Austrália. Kontaktu familiár no interkámbiu kulturál, sosiál no ekonómiku ne’ebé metin entre ita nia povu sira kontinua habelar an.

Kooperasaun fronteira entre Timor-Leste no Indonézia kontribui ona no sei kontribui nafatin atu intensifika komérsiu no kontaktu entre família sira, ho vantajen ba populasaun sira ne’ebé hela besik fronteira entre nasaun rua ne’e.

Iha ámbitu relasaun bilateral ho país vizinhu – inklui disputa fronteiras marítimas nian ho Austrália – ita tenke rezolve problema hotu-hotu ne’ebé sei iha, hodi hatudu respeitu ba malu no respeitu ba lei internasionál, la hó prejuízu ba relasaun viziñansa di’ak no amizade ne’ebé ita nia país no ita nia povu sira harii tiha ona.

Ita nia relasaun ho nasaun membru ASEAN nian haluan no hakle’an tiha ona. Ita hakat nafatin ba oin ho laran metin hodi tama ba ASEAN. Nasaun ASEAN sira nia abertura bele hamosu konkordánsia atu simu ita nia pedidu adezaun iha tinan badak nia laran.

Durante tempu ida neé, hau hanoin ita bele reflete hamutuk kona-ba desafios nee be ita iha wainhira ita integra-an ona iha ASEAN. Hau refere ba questaun mobilidade, competitividade no ita nia partisipasaun nebe efikas hosi agenda todan nee be ita nia integrasaun iha ASEAN implika. Hanesan pais soberano, ita iha obrigasaun, maibe ita tenki hatene hetan benefisiu hosi ita nia insersaun iha rejiaun no iha mundu.

Timor-Leste hakarak haluan no hakle’an tan nia partisipasaun iha prosesu kooperasaun bilaterál no multilaterál sira ne’ebé buka hametin estabilidade no seguransa iha rejiaun no haforsa dezenvolvimentu ne’ebé sei lori vantajen ba populasaun nasaun sira nian.

Durante ne’e ita hala’o relasaun amizade no kooperasaun ida ne’ebé mak metin ho poténsia aziátika no mundiál hirak, inklui Xina, Estadus Unidus, Uniaun Europeia, Japaun, Repúblika Koreia, Kuba no Nova Zelándia, no mós Portugál, Brazíl no nasaun maun-alin sira CPLP nian.

Timor-Leste nia prezidénsia pro tempore ba Komunidade Rain sira-ne’ebé Ko’alia Lia Portugés besik atu remata. Prezidénsia CPLP hatudu dalan importante ne’ebé mak Nasaun la’o liu ona, hosi luta iha foho leten no hosi ezíliu to’o iha lideransa ba Komunidade nasaun independente no maun-alin nian ne’e ba dala uluk. Ita nia maun-alin sira CPLP nian konsidera ita nia lideransa ne’e hanesan ezemplu ida. Rekoñesimentu ida ne’e bele sai hanesan orgullu ida ba ita no estímulu ida ba futuru.

Tebes duni, CPLP sai global ho admisaun plena Timor-Leste iha organizasaun. Ita nia país tama formalmente iha CPLP no bele hala’o Conferensia Chefe Estado no Governo CPLP sira nian, iha Asia, regiaun nebe konsidera hanesan eixu hosi economia mundo tomak nian.

Dala uluk liu bele fo importansia ba vertente ekonomia nian. Ita nia país assume CPLP hanesan plataforma ida atu permite artikulasaun oi-oin nebe la’o husi nia kondisaun pluricontinental. Tamba ne’e mak ita hala’o Forum Ekonomiku Global no ita iha oportunidade atu konta ho presença ASEAN nian.

Iha dominiu lian português nian, ita iha privilejiu simu Terceira Conferencia Internacional kona-ba Futuro Lian Portugues no Sistema Mundial. Ita conta ho presença asiatica iha Conferencia Internacional ida ne’e.

Maibé, buat barak labele hala’o hotu. Konjuntura mundu nian ne’ebe afeta Estados-Membros sira trava hodi hala’o inisiativas ne’ebe ita nia presidensia rotativa hatudu dalan, ho apoiu husi ita nia Comunidade.

Direitu Internasionál sai nu’udar hun ba paz no hanesan pontu partida atu buka kondisoins ne’ebé ekilibradu liu ba dezenvolvimentu no povu sira nia moris di’ak. Timor-Leste nia integrasaun internasionál orienta ba reforsu hosi sistema mundiál ida ne’ebé justu, ne’ebé bazeia ba Direitu no promove estabilidade, paz no dezenvolvimentu ne’ebé inkluzivu no sustentadu.

 

Señór Prezidente Parlamentu Nasionál,

Señora no Señór deputadu sira.

Buat ne’ebé Timor-Leste konsege alkansa ona dezde independénsia hanesan buat hirak ne’ebé importante. Maski nune’e, ita tenke rekoñese katak buat ne’ebé ita halo ona, bele halo barak liu tan no di’ak liu tan. Aleinde ne’e, ita tenke hateke ba dezafius boot ne’ebé ita sei iha ho seriedade, liu-liu produtividade serbisu nian ne’ebé ki’ik, dezempregu no volatilidade ekonómika.

Iha tinan ikus hirak ne’e, ha’u vizita 90% hosi suku sira iha Timor-Leste. Ha’u rona ho atensaun, ha’u ko’alia ho populasaun sira. Durante vizita sira ne’e, realidade ida ne’ebé sempre dada ha’u nia atensaun no halo ha’u sente preokupasaun maka dezigualdade iha kondisaun moris entre fatin sidade no área rurál.

Ita nia nasaun nia modelu kreximentu ekonómiku iha tinan ikus hirak ne’e la kontribui ba hamenus dezigualdade ne’e—entre rejiaun sira no entre família sira.

Polítika apoiu sosiál ba grupu vulneravel sira, buat ida ke importante, maibé la dun sufisiente atu hadi’a no fó kompensasaun ba fatór dezigualdade foun sira.

Realidade ida seluk ne’ebé halo ha’u preokupa mak ita nia ekonomia ne’ebé la iha kapasidade atu kria kampu serbisu ne’ebé natoon. Oportunidade serbisu la dun barak, liu-liu iha área rurál, iha ne’ebé mak 70% hosi ita nia populasaun hela ba.

Situasaun hirak ne’e halo joven barak bá rai li’ur buka serbisu. Iha tinan 10 liu bá, ita nia nasaun forma ema lisensiadu liu rihun 30. Maibé Timor-Leste la konsege asegura sira barak nia inkluzaun ekonómika.

Ita investe maka’as liu iha simentu duké investe iha koñesimentu: ekonomia nia produtividade ki’ik nafatin no la iha kapasidade atu kompete ho ekonomia sira seluk. 90% hosi sasán no servisus ne’ebé ita konsome mai hosi rai li’ur.

Hanesan ita hotu hatene katak, dala barak obras públikas la iha kualidade no halo ita gasta osan barak liu tan ba iha obras reparasaun ka rekonstrusaun. Ita nia infraestrutura barak sai aat lailais. Ida ne’e hatudu katak Orsamentu Estadu fakar osan barak hodi halo obras ne’ebé la iha kualidade.

Projetu investimentu boot rua la’o hela daudaun iha Oekusi no kosta súl. Maski nune’e, to’o oras ne’e ita hotu seidauk hatene lolos investimentu rua ne’e sei benefisia ka lae kondisaun moris no dezenvolvimentu sosiál populasaun Oekusi, Covalima no Manufahi.

Dadus ne’ebé fó sai iha relatóriu kona-ba Konta Nasionál sira hatudu mai ha’u katak hafoin tinan lima implementa tiha polítika dezenvolvimentu (hosi 2009 to’o iha 2014), setór ekonómiku sira nia kontribuisaun ba produtu nasionál mantein nafatin kuaze la hó mudansa ida.

Konstrusaun no Agrikultura mantein nafatin hanesan setór boot liu hosi ekonomia nasionál naun-petrolíferu.

Iha tinan 2014, Indústria nia kontribuisaun ba produsaun nasionál kontinua ki’ik nafatin, la to’o 1%.

Setór ida ne’ebé importante liu ba ekonomia maka Administrasaun Públika, ho partisipasaun 24%[2]. Dadus sira ne’e mak dadus ofisiál governu nian.

Se rezultadus hanesan ne’e, oinsá mak ita sei diversifika ekonomia no hamenus nasaun nia dependénsia ba mina-rai?

Hosi parte seluk, relasiona ho Administrasaun Públika, ita tenke rekoñese katak ha’u nia apelu iha tinan ikus hirak ne’e kona-ba nesesidade atu hakbesik Estadu ba sidadaun sira komesa ona hetan atensaun. Daudaun ne’e, Administrasaun sentrál nia servisus iha nivel munisípiu barak liu wainhira kompara ho tinan 5 ba kotuk.

Hahú hosi kedas ha’u sei hanesan Jenerál, ha’u defende namanas katak Estadu tenke rona sidadaun sira no lori komunidade sira atu buka solusaun ba sira nia problema rasik. Ha’u rona katak ha’u nia apelu sira ne’e hetan ona resposta. Programa dezenvolvimentu lokál ne’ebé implementa ho partisipasaun hosi komunidade sira, daudaun ne’e barak liu wainhira kompara ho tinan hirak liubá.

Maski nune’e, ha’u sei hakfodak nafatin kona-ba prioridade sira ne’ebé departamentu governu balun estabelese ba sira.

Dala barak ita haré departamentu sira ne’e halakon sistema administrativu hirak ne’ebé la’o didi’ak ona, nune’e sobu fali tékniku sira nia serbisu, lakon tempu no fakar osan de’it, duké foka liu ba rezolve problema todan hirak ne’ebé presiza atensaun no desizaun estratéjiku.

Volatilidade administrativa ne’e, hanesan mós ho obras ne’ebé la iha kualidade, hanesan desperdísiu osan públiku nian. Dala barak, buat hirak-ne’e rezulta hosi má-jestaun.

Problemas ne’ebé mosu iha servisus Administrasaun nia lala’ok hanetik ita-nia rain atu hakat ba oin. Por ezemplu, kompañia sira ne’ebé kria kampu serbisu labele kontinua hetan penalizasaun tanba Estadu atraza selu hotu dívidas.

Imposivel atu dudu ba oin setór privadu wainhira kompañia sira la iha kapitál no imposivel mós atu dada mai investimentu hosi emprezáriu sira wainhira Estadu selu sira la tuir oras.

Ita labele simu katak empresa sira ne’ebé halo obras ka presta servisus haktuir regulamentu sira ne’ebé sei vigora hela, maski halo hotu ona, maibé sira hein fulan ba fulan to’o simu pagamentu. Enkuantu sei iha nafatin nesesidade atu rekapitaliza empresa sira, liu-liu empresa timoroan sira nian, tanba Estadu atraza selu hotu dívidas, mak sei la posivel atu haré setór privadu hasa’e nia kontribuisaun ba produtu internu brutu.

Administrasaun públika ida ne’ebé ladi’ak sei kontamina setór produtivu tomak no hasés investimentu.

 

Señór Prezidente Parlamentu Nasionál,

Señora no Señór deputadu sira.

Kondisaun setór Justisa Nasaun ida ne’e nian sai aat ba beibeik. Organizasaun judisiária ne’ebé prevee iha Konstituisaun sei dook nafatin atu atinje. Aleinde harii tribunál sira ne’ebé prevee iha Konstituisaun, seidauk aprova lei lubuk ida ne’ebé mak importante ba Tribunál sira nia lala’ok, hanesan lei kona-ba Prosesu Administrativu no Fiskál. Lei sira ne’e hanesan kondisaun ida ne’ebé tenke iha hodi harii Estadu Direitu iha Timor-Leste.

Falta investimentu iha Justisa hamosu tiha paralizia iha Tribunál Rekursu no taka tiha dalan ba juis sira ne’ebé serbisu iha tribunál distritál atu avansa iha sira nia karreira rasik, tanba primeiru la iha avaliasaun ne’ebé adekuadu no, segundu, la halo implementasaun ba protokolu sira ne’ebé asina hafoin duni sai tiha majistradu internasionál sira ne’ebé apoia prosesu reforma setór Justisa nian.

Falta meius iha setór Justisa hanesan obstákulu ida ba ita hotu nia luta hasoru korrupsaun. Polísia sira, Komisaun Anti-Korrupsaun, Ministériu Públiku ho Tribunál sira – sira hotu ne’e presiza ita nia apoiu iha luta hasoru problema boot ida ne’ebé afeta hela ita nia sosiedade. Ema privilejiadu balun uza sala rekursus ne’ebé ita hotu nian. Ida ne’e halo ita kestiona kona-ba koezaun sosiál, fó impaktu ba re-distribuisaun rikusoin nian no hamenus potensiál ba dezenvolvimentu nasionál. Ha’u apela ba ema hotu-hotu nia partisipasaun iha esforsu nasionál atu halakon korrupsaun iha ita nia rain!

 

Señór Prezidente Parlamentu Nasionál,

Señora no Señór deputadu sira.

Ha’u hein katak, kontráriu hosi buat ne’ebé ita halo iha tinan ikus hirak ne’e, preparasaun ba Orsamentu Jerál Estadu nian ba tinan 2017 no tinan hirak oin mai sei iha mudansa boot ida, bazeia ba realidade folin mina-rai nian no rezervas Tasi-Timór ne’ebé ladún estavel.

Finansiamentu ba orsamentu Estadu tenke mai hosi fonte prinsipál haat: 3% hosi Rendimentu Sustentavel Estimadu (RSE) hosi Fundu Mina-Rai hanesan hatuur iha lei, no osan restu tenke mai hosi reseita doméstika, doasaun no empréstimu, no esportasaun.

Orsamentu Estadu hanesan instrumentu fundamentál hosi governu sira-nia intervensaun ekonómika. Orsamentu Estadu tenke planeia ho kuidadu, matan-moris no responsabilidade, bazeia ba situasaun ohin loron no aban-bainrua nian.

Hosi kriasaun Fundu Mina-rai nian, Timor-Leste gasta ona dolar 7,3 billaun hosi Fundu. Maski nune’e, rezultadu ne’ebé hetan hosi investimentu hirak ne’e ladún barak.

Ita nia ekonomia sei nafatin la sustentavel: Timór importa kuaze buat hotu ita konsome mai rai-laran, maibé la dún esporta sasán ba rai-li’ur[3].

Desperdísiu iha Administrasaun Públika signifika fakar osan arbiru. Situasaun ida ne’e só posivel tanba ita uza reseitas ne’ebé mai hosi Fundu Mina-Rai hodi selu faturas, taka défise boot hosi balansa komersiál no sustenta mákina Estadu nia lala’ok[4].

Ita hotu hatene katak mina-rai sei la tahan ba nafatin. Saida mak sei akontese bainhira mina-rai hotu tiha?

Ita hotu hatene katak reseitas ne’ebé mai hosi Fundu Mina-Rai tun maka’as ona tanba razaun rua, ida mak produsaun iha Bayu Undan ne’ebé komesa menus ona, no ida seluk mak folin mina-rai ne’ebé tun maka’as iha merkadu internasionál sira hahú hosi 2014.[5]

Ne’ebé, ita hotu iha devér atu husu ita nia an no hatán ho onestidade ba pergunta tuir mai ne’e: Futuru sá de’it mak ita harii hela ba ita-nia rain?

Sr. Prezidente Parlamentu Nasionál

Deputadu sira,

Señoras no Señores,

Ita atu tama ba iha tinan importante ida ba futuru Nasaun nian ho realizasaun ba aktu eleitorál o-ioin.

Dezafiu importante liu ne’ebé ita hotu sei enfrenta, maka atu garante eleisaun ne’ebé livre no justu, iha ne’ebé povu sei hato’o nia hakarak ka vontade soberanu. Luta libertasaun nasionál saugati de’it karik Povu la ukun liu hosi ninia reprezentante sira. Ita hotu servidór ba Povu nia hakarak no la iha podér seluk duké podér ne’ebé mak fó hosi Povu.

Tanba ne’e mak ha’u dehan ha’u kontra alterasaun ba Lei órgaun Administrasaun Eleitorál nian ne’ebé rezulta membrus Komisaun Nasionál Eleisaun nian lakon sira nia mandatu maski seidauk hotu, liu-liu tanba kestaun hirak ne’e mosu iha tempu besik eleisaun. Ha’u kaer metin nafatin katak opsaun hirak ne’e halo prosesu hametin estrutura Estadu sira nian hakat ba kotuk, haktuir regras Estadu Direitu Demokrátiku nian. Ho nune’e, ha’u fiar katak ita tenke reforsa ekipa independente sira ne’ebé sei hala’o observasaun ba eleisaun tinan oin nian, atu nune’e eleisaun sira ne’e bele la’o ho transparénsia.

 

Señór Prezidente Parlamentu Nasionál,

Señora no Señór deputadu sira.

Haré ba prioridade fundamentál sira ne’ebé temi iha leten relasiona ho hametin soberania no independénsia nasionál, ita bele haré momós katak polítika importante sira ne’ebé mak implementa tiha ona iha tinan ikus hirak ne’e:

  • Hetan fallansu, tanba la hamenus dependénsia ba mina-rai no la promove ekonomia ida ne’ebé sustentavel no inkluziva liu tan ba Timoroan sira;
  • Hetan fallansu, tanba la fó valór ne’ebé natoon ba Rekursus Umanus nu’udar kapitál umanu nasaun nian, no la promove aproveitamentu ba rikusoin nasionál;
  • Hetan fallansu, tanba la diversifika ekonomia, nune’e la kontribui hodi kria serbisu ne’ebé natoon ba joven sira ho tinan atu serbisu;
  • Hetan fallansu, tanba la promove sidadaun sira nia partisipasaun iha prosesu transformasaun ekonomia no konstrusaun nasionál.

Hau simu informasoes kona-ba projectu Rejiaun Autonono Especial Oecusse Ambeno ho ZEESM nian. Informasaun neébe hau simu fo animo mai hau. No tebes duni, hau hakarak atu hetan tan informasaun kona ba asaun sira neebe bele lori Povo Oecusse nian ba centro politica nasional.

Hau sei atentu nafatin ba desenvolvimentu sira kona-ba Costa Sul, hodi hein tan informasoes.

Ho liafuan badak atu hatete katak: iha tinan 4 ikus ne’e, maski foti osan liu billaun hat hosi Fundu Mina-Rai, apezarde halo despeza barak liu hosi Orsamentu Estadu haat ne’ebé hetan aprovasaun hosi Parlamentu, ESTADU NASAUN ladún hetan melloria ne’ebé signifikativu.

Ida-ne’e la signifika katak ha’u la valoriza nasaun nia susesu, pelo contrário:

  • Ha’u fó parabens ba sidadaun no lider hotu-hotu ne’ebé hatudu maturidade polítika no matenek ne’ebé mak sira hetan hosi esperiénsia, hodi kontribui atu alkansa pás no halo rekonsiliasaun;
  • Ha’u fó parabens ba sira ne’ebé kontribui ona atu kria no hametin instituisaun sira Timór nian nu’udar nasaun independente, no mós ba sira ne’ebé iha 2001, 2007 no 2012 hametin estabilidade, demokrasia, seguransa komunidade nian no hakmatek iha nasaun ne’e.

Ha’u saúda susesu ne’ebé ita nia país no ita nia Povu alkansa ona iha prosesu afirmasaun Estadu nian no integrasaun nasaun nian iha komunidade internasionál.

Ha’u fó parabens ba ita nia agrikultór sira, ita nia ema ne’ebé serbisu iha indústria, komérsiu, turizmu no iha setór ekonomia privada sira seluk, ne’ebé prodús no kaer metin ba serbisu maski ekonomia ladún hetan baze ne’ebé di’ak no metin.

Ha’u fó parabens ba ita nia emprezáriu sira, ne’ebé investe iha dezenvolvimentu ekonómiku no nasionál no kria kampu serbisu.

Ha’u fó parabéns ba funsionáriu sira Estadu nian, iha Dili no iha servisus desentralizadus, iha fatin ne’ebé de’it, ne’ebé komesa ona lori servisus Estadu nian ba munisípiu sira. Sira nia serbisu importante tebes hodi hasa’e servisu públiku sira nia kualidade.

Hanesan ha’u hatete ona, ha’u fó valór duni ba ita nia susesu. Ha’u sente orgullu ba buat ne’ebé ita alkansa tiha ona.

Maibé, nu’udar Prezidente Repúblika no sidadaun, ha’u iha devér atu bolu atensaun mós ba fallansu ne’ebé mak akontese, liu-liu wainhira sira lori perigu ba ita nia mehi atu harii futuru di’ak liu ida ba ita nia nasaun.

Mudansa jerasaun nian iha organizasaun ida ke kompleksu só bele akontese wainhira jerasaun foun ne’e ukun tuir ninia autoridade rasik.

Ita nia nasaun seidauk to’o iha faze ida ne’e. Jerasaun foun ne’e seidauk ukun ka la ukun tuir ninia autoridade rasik.

Ida ne’e mak sai hanesan esplikasaun ba impase ne’ebé Timor-Leste hasoru daudaun —paralizia dezenvolvimentu nian—ne’ebé nasaun enfrenta tinan barak ona, liu-liu durante lejizlatura daudaun nian, 2012-2017.

Timor-Leste hetan bensaun ho lider istóriku sira ne’ebé hatudu ona kapasidade atu halibur nasaun no tulun Povu atu fiar ba nia an rasik.

Hamutuk ita realiza ona ita nia objetivu balun no konkista ona mundu nia admirasaun no respeitu. Independénsia no konstrusaun Estadu Direitu, ho respeitu ba Timoroan hotu-hotu nia dignidade, korresponde ba realizasaun ba kapítulu dala huluk hosi ita nia aspirasaun nasionál sira.

Maski nune’e, ita nia projetu nasionál la hotu ho Independénsia. Nasaun timoroan nia objetivu nafatin mak hakat liu kiak no harii moris di’ak liu ida ba Timoroan hotu-hotu.

Lider istóriku sira hatudu kapasidade boot atu realiza parte dahuluk hosi ita nia aspirasaun nasionál. Lideransa, liu-liu jerasaun lider tuan liu, alkansa ona buat hirak ne’ebé sira ambisiona. Ita fó ita nia respeitu tomak ba lider istóriku sira.

Maski nune’e, parte daruak hosi ita nia objetivu nasionál sira ezije motivasaun foun ida no perspetiva foun ida. Importante ita halibur esforsu sira hodi mobiliza no hasa’e foin-sa’e sira nia partisipasaun. Ita nia país seidauk fó valór ba ita nia rikusoin nasionál no mós ba ema: labele esklui ema hosi ekonomia no dezenvolvimentu nasionál.

Ita tenke uza independénsia nu’udar instrumentu boot ida atu lori sidadaun sira bele partisipa iha prosesu halakon kiak no haburas ita-nia rain ne’e. Harii nasaun ida ne’ebé lori moris-di’ak ba Timoroan tomak, hanesan serbisu ida ba jerasaun foun sira.

Ita tenke aten-barani hodi fó fatin ba jerasaun foun sira ne’e. Edukasaun no formasaun tenke orienta di’ak liu tan atu nune’e bele hatán ba empresa sira nia nesesidade no implementa ekonomia koñesimentu nian ida, ne’ebé produtivu liu no kompetitivu liu.

Mestre timoroan sira merese mós kondisaun serbisu ne’ebé di’ak liu tan no estudante sira rasik merese ita hasa’e kualidade hanorin nian.

Ita tenke prepara didi’ak ita nia rekursus umanus no fó mobilidade boot liu tan ba sira, tanba ida ne’e mak sei kontribui maka’as ba futuru nasaun no sei bele dada investimentu iha rai-laran no hosi rai-li’ur, duké infraestrutura barak ne’ebé la aproveita didi’ak.

Obras infraestrutura sei nesesáriu nafatin, maibé ita tenke hamenus desperdísiu osan no investe maka’as liu tan iha kualidade.

Ita tenke rona populasaun lokál sira atu nune’e dezenvolvimentu suku no aldeia sira nian hetan partisipasaun—no empeñu maka’as—hosi komunidade sira, nune’e hasa’e retornu hosi kapitál investimentu ne’ebé mai hosi Orsamentu Estadu.

Ita presiza tulun família sira hadi’a ekonomia uma-laran nian hodi enkoraja família sira nia inisiativa ekonómika, duké haruka polísia sobu inisiativa hosi sira ne’ebé hakarak serbisu duni tanba hakarak hasa’e rendimentu uma-laran nian.

Ita tenke fó fali prioridade ba valorizasaun feto nian iha sosiedade laran. Feto sira hala’o knaar importante tebes hodi promove Edukasaun, saúde no ekonomia uma-laran nian. Ita tenke serbisu maka’as liu tan atu nune’e sosiedade respeita feto sira nia dignidade, hanesan nia respeita ona dignidade mane sira nian.

Estadu no sosiedade tenke serbisu hamutuk no kria kondisaun ne’ebé mak di’ak atu nune’e feto Timor-Leste sente fiar-an no hala’o knaar ativu liu iha aspetu hotu-hotu, hodi dezenvolve Nasaun.

Ita tenke halakon tentativa sira hotu ne’ebé partidu sira halo, atu uza ita nia instituisaun nasionál sira. Partidu sira importante tebes hodi asegura katak demokrasia la’o ho di’ak: atu fiskaliza governu nia atividade liu hosi Parlamentu Nasionál, nudar konstituisaun estabelece; atu tulun mobiliza sidadaun sira atu partisipa iha prosesu harii ekonomia no hametin instituisaun sira.

Kompara ho partidu sira, instituisaun Estadu sira nia realidade oin seluk, tanba Estadu eziste atu serbí sidadaun hotu-hotu. Instituisaun sira Estadu nian la mosu atu serbí partidu sira nia interese. Tuir lolós sira mosu atu realiza independénsia, asegura soberania nasionál no presta servisu ne’ebé ho kualidade ba sidadaun hotu-hotu.

Ho kompeténsia no kualidade servisus sira nian mak Administrasaun Públika bele sai forte no metin liu tan.

Ita nia Estadu hanesan rezultadu hosi Povu nia vitória. Ita nia futuru nu’udar nasaun sei sai hanesan rezultadu hosi sidadaun sira nia empeñu no partisipasaun, atu nune’e ita hamutuk bele harii moris ida ne’ebé di’ak liu tan ba ita hotu.

Obrigadu barak ba Ita-Boot sira nia atensaun.

Ha’u husu ba Maromak atu fó bensa ba Ita-Boot sira no fó bensa nafatin ba ita nia rai doben Timor-Leste.