Natarbora, 5 Setembru, 2016 – S.E. Prezidente Repúblika, Taur Matan Ruak, segunda-feira ne’e hala’o diálogu komunitáriu ba loron dahuluk ho komunidade sira Suku Uma Boco no Abat Oan, Postu Administrativu Natarbora, Munisípiu Manatuto.

Wainhira hakat ba hahú diálogu, S.E. Prezidente Repúblika, hahú nia klarifikasaun hanesan baibain halo ona iha suku hirak ne’ebé nia vizita ona hodi esplika sobre razaun ka objetivu husi nia vizita. Hafoin Xefe Estadu mós aproveita okaziaun ne’e hodi esplika mós sobre dezafius no progresu ne’ebé maka Timor-Leste hasoru daudaun oras ne’e iha prosesu harii nasaun. Depois, Xefe Estadu mós fó korajen ba komunidade sira atu: hadi’ak sira-nia ekonomia hodi hala’o atividade hirak-ne’ebé iha benefísiu ekonomia ba sira-nia an, husu atu komunidade sira mós atu investe iha oan sira-nia edukasaun, husu liután mós ba komunidade sira atu kuidadu sira-nia saúde, no ikusmai husu ba komunidade sira atu kontinua fó sira-nia kontribuisaun iha períodu Ukun Rasik-An hodi serbisu no koopera ho sira-nia autoridade lokál.

Hafoin esplikasaun hirak-ne’e, Xefe Estadu mós konta esperiénsia no fó referénsia ba suku hirak ne’ebé maka susesu ona iha hadi’ak jestaun ekonomia atu hametin liután nia klarifikasaun, no husu ba suku rua refere atu halo tuir suku ne’ebé maka nia uza hanesan referénsia.

Informa mós katak, molok hahú diálogu komunitáriu, Xefe Estadu fó uluk omenajen ba restus mortais sira ne’ebé maka komunidade sira rekolla no tau hamutuk ona iha suku refere.

Iha diálogu ne’ebé refere, Xefe Estadu mós hato’o nia agradesimentu ba família eroi sira ne’ebé maka oferese ona sira-nia oan atu luta ba Ukun Rasik An Timor-Leste nian.

 “Agradese ba família sira ne’ebé oferese ona imi-nia oan sira hodi sosa ukun-an. Lori imi maka ami moris, lori imi maka nasaun moris, karik imi la apoiu ami mate mohu iha ai-laran. Tanba ne’e, imi maka eroi loloos, liuliu inan-aman ne’ebé lakon família. Ita-Boot sira la terus para ha’u sai Prezidente Repúblika, ha’u mós la terus atu sai Prezidente Repúblika, ita terus para hakarak hetan moris-di’ak, mas atu to’o ne’ebá dalan sei naruk, tanba ne’e ita tenke iha ne’e ba oin serbisu maka’as hodi bele hetan moris-di’ak”, dehan Xefe Estadu.

Hakat fali ba iha sesaun husu, Padre Kuaze-Parókia Natarbora, Pe. Benedictus Randong, preokupa ho kualidade ensinu superiór, inklui mós amu nia preokupasaun sobre mentalidade Timoroan sira nian. Tan ne’e, amu sujere atu Governu Timor-Leste atu hapara fó akreditasaun ba universidade, ka institutu balun ne’ebé maka la iha kualidade.

Hatán ba ida-ne’e, Xefe Estadu rekoñese katak, edukasaun iha duni problema, tanba Xefe Estadu subliña katak, iha nasaun seluk, ema nia sistema edukasaun tau matan liu ba implementa dixiplina, depois maka hanorin matéria. Maibé, iha Timor-Leste kontráriu, hanorin de’it, mas la fó importánsia ba dixiplina, tanba ne’e, Timoroan (estudante no foin sa’e) iha problema mentalidade.

Haree fali ba preokupasaun seluk hirak ne’ebé maka komunidade sira levanta durante diálogu maka hanesan: loke sentru vokasionál, loke eskola sekundária no universidade, halo barrajen ba mota Sahe ne’ebé estraga komunidade nia plantasaun, grupu feto ne’ebé prodús hudi-sona maibé MCIA la sosa, uma MGD’s la iha bee moos, inklui problema reál seluseluk tan.

Diálogu iha Suku Uma Boco no Abat Oan nu’udar série diálogu komunitáriu iha fulan-Setembru ne’e, ne’ebé sei kontinua ba suku hirak iha Munisípiu Viqueque no Baucau nian durante semana ida resin.
Informa mós katak, bainaka espesiál Xefe Estadu nian, hanesan, Administradór Postu Fatululik, Munisípiu Covalima, Xefe-Suku Lobunu no Leimea Leten, Postu Administrativu Atsabe, Munisípiu Ermera, Xefe-Suku Duyung, Postu Administrativu Metinaro, Munisípiu Dili, no Xefe-Suku Fatucalo, Postu Administrativu Turiscai, Munisípiu Manufahi.

Ikusmai, hakarak atu hato’o katak, tuir programa, diálogu hirak tuirmai, sei hala’o iha Suku Ahic, Postu Administrativu Lacluta iha parte dadeer, no iha parte lokraik iha Suku Bibileo, Postu Administrativu Viqueque Villa, Munisípiu Viqueque.