Aileu & Manufahi, 21-22 Jullu 2016 – S.E. Prezidente Repúblika, Taur Matan Ruak, kuarta-feira dadeer, hala’o diálogu komunitáriu ho populasaun Suku Bereleu, hafoin kontinua iha parte lokraik ho komunidade Suku Faturilau, Postu Administrativu Lequidoe, Munisípiu Aileu. Iha loron-sesta, S.E. Prezidente Repúblika hala’o diálogu ho komunidade Suku Fatucalo, Postu Administrativu Turiscai, Munisípiu Manufahi.

Iha diálogu dahuluk, ho komunidade Berelau, Xefe Estadu husu ba agrikultores sabraka (Tanjeriñas) iha Suku Bereleu atu organiza an fa’an sira-nia produtu, hodi fasilita, promove no defende sira-nia direitu.

Pedidu Xefe Estadu nian ne’e relasiona ho lamentasaun komunidade Suku Berelau nian ne’ebé sente difikuldade atu hetan kompradór ba sira-nia produtu agríkola, hanesan sabraka. Tuir komunidade Manuel Mesquita, ne’ebé iha sabraka-hun hamutuk 800, la iha kompradór inklui Governu, mak sosa sabraka komunidade nian.

Tan ne’e, nia no komunidade Berelau seluk, ne’ebé maioria hanesan vendedór ambulante ai-fuan, deside fa’an iha dalan-ninin iha sidade Díli, maski sempre hetan duni hosi membru saneamentu Munisípiu Díli.

“Imi tenke organiza an bainhira fa’an imi-nia ai-fuan no modo. Imi tenke ko’alia ho Ministériu Komérsiu, Indústria no Ambiente (MCIA), Ministériu Agrikultura no SEPFOPE, atu apoiu imi no buka dalan oinsá atu imi bele fa’an imi-nia sasán”, afirma Xefe Estadu.

Komunidade Suku Bereleu mós hato’o sira-nia preokupasaun sobre ezisténsia “Movimentu Moris Foun” (MMF), ne’ebé espalla informasaun katak sei eziste forsa Armada seluk iha ai-laran. Grupu ida-ne’e, tuir komunidade sira, hakarak harii mós “Bandeira-riin Besi-Asu ho Talin Korrente”, iha Munisípiu Aileu, iha komemorasaun Loron FALINTIl, 20 Agostu 2016.

Hatán ba kestaun ne’e Xefe Estadu husu komunidade atu lalika preokupa no kolabora ho Estadu atu mantein estabilidade seguransa iha rai-laran.

“Lalika fiar sira (MMF), se bele, ajuda kaer sira no entrega ba autoridade sira”, apela Xefe Estadu.

Antes husik hela Suku Bereleu, Xefe Estadu, presta uluk omenajen iha rate Saudozu Guido Valadares, Ministru Saúde RDTL dahuluk, ne’ebé hakoi iha suku refere, iha 1975.

Tuirmai iha diálogu daruak, iha Suku Faturilau, komunidade sira husu atu ukun-na’in sira nasaun nian atu servisu hamutuk no labele fahe povu.

 “Ulun sira laiha konflitu, hanoin mak la hanesan, ne’e normál. Ne’ebé Ita-Boot sira iha ne’e lalika ta’uk. La iha ema ida mak hanoin atu sobu nasaun. Preokupa mak hanesan ha’u dehan ba imi, servisu hamutuk ho imi-nia autoridade sira no servisu badinas”, responde Xefe Estadu.

Iha loron tuirmai, kinta-feira, S.E. Prezidente Repúblika Taur Matan Ruak, la’o ain oras neen nia laran, hosi Suku Faturilau (Aileu) ba Suku Fatucalo (Manufahi), hodi halo diálogu komunitária ho populasaun suku refere.

Iha suku ne’ebé la iha asesu ba estrada no enerjia eletrisidade ne’e, Xefe Estadu dala ida tan apela konxiénsia populasaun nian ba prosesu dezenvolvimentu ne’ebé sei la’o neineik iha Timor-Leste, nu’udar nasaun ne’ebé foin tinan 14 ukun-an.

Xefe Estadu mós husu komunidade sira atu iha nafatin esperansa ba futuru ne’ebé di’ak, ba sira-nia moris.

“Imi estrada la iha, eletrisidade la iha, maibé imi Timoroan. Ha’u la lori estrada ba imi, Prezidente lori domin ba imi, hatete ba imi katak Estadu la haluha imi. Sé mak lori estrada ba imi mak Governu. Sira (Governu) mós hadomi imi. Maibé ita barak, no Governu sei halo ida ba ida, loron ida, sei to’o imi imi-nian”, hatete Xefe Estadu.

Iha diálogu ho Xefe Estadu, aleinde husu estrada no enerjia eletrisidade, komunidade suku Fatucalo mós husu ba Governu atu sosa kuda ba Ofisiál Polísia Suku (OPS) ne’ebé hala’o knaar iha sira-nia suku, ne’ebé maski iha ona motorizada maibé la uza hodi halo servisu, tanba estrada la iha.

Komunidade Fatucalo husu mós uma ba membru OPS no ba profesór sira, ne’ebé hala’o knaar iha sira-nia suku, tanba konsidera suku izoladu ho distánsia ne’ebé dook husi Postu Administrativu Turiscai.

Hafoin diálogu, Xefe Estadu ho nia komitiva deskansa iha suku refere no fila fali ba Suku Faturilau sesta-feira dadeer ho la’o-ain.