Aileu, 19 Jullu 2016 – S.E. Prezidente Repúblika, Taur Matan Ruak, akompañadu husi Primeira Dama, Dra. Isabel Ferreira, iha tersa-feira dadeer, hala’o diálogu komunitáriu ho populasaun Suku Saboria, no Fahiria, Postu Administrativu Aileu Vila, hafoin kontinua ho komunidade Suku Acobilitoho no Suku Betulau, Postu Administrativu Lequidoe, Munisípiu Aileu iha parte lokraik.

Iha diálogu dahuluk, ho komunidade Saboria no Fahiria, populasaun sira husu atu Governu bele harii ponte ida iha Mota Manufoni atu fasilita sira-nia movimentu bá-mai husi suku ba Kapitál Munisípiu, Aileu.

Bazeia ba informasaun husi komunidade sira katak, mota refere haketak suku 9 no hapara komunidade iha suku ne’e atu hala’o sira-nia atividade negósiu, trata saúde no asuntu sosiál sira seluk iha Kapitál Munisípiu.

Hatán ba preokupasaun komunidade sira-nian sobre asuntu ne’e, Xefe Estadu hatete, nia la hatene/deskoñese se Governu iha planu atu harii ponte iha Mota Manufoni ka lae. Maibé, Xefe Estadu mós espera katak, mezmu Governu Timor-Leste tau prioridade liu ba autoestrada no prioridade oioin, mas nia espera katak, loron ida, Governu sei harii ponte iha mota refere.

“Autoridades munisipál sira bele hatama proposta atu harii ponte, mas depende prioridade husi Governu Sentrál, tanba agora, Governu sei fó prioridade atu halo Estrada Nasionál. La’ós la halo, mas sei lori tempu”, informa Xefe Estadu.

Komunidade Suku rua mós husu ba Estadu atu halais prosesu sobre Lei Terra e Propriedades nian. Tanba to’o momentu ne’e, Parlamentu Nasionál ladauk diskute sobre asuntu lei ne’ebé refere, no se karik maka haruka ba Prezidente Repúblika, Nia sei promulga wainhira lei ne’e di’ak ona.

Komunidade mós aprezenta kestaun sobre asuntu dezempregu ne’ebé maka’as, liuliu iha nivel juventude/foin sa’e.

Hatán ba kestaun hirak-ne’e, Xefe Estadu hatete, susar ba Governu Timor-Leste atu responde hotu kedan ba asuntu dezempregu, maibé Xefe Estadu mós husu katak, Governu no populasaun hotu atu investe maka’as iha setór edukasaun. Maibé, lia menon importante maka katak, husu atu populasaun hotu atu serbisu maka’as hamutuk atu lori Munisípiu Aileu no Timor-Leste ba oin.

Iha fatin seluk, iha diálogu ho Komunidade Suku Acobilitoho no Suku Betulau, populasaun suku rua lamenta sobre fornesimentu enerjia eletrisidade ne’ebé to’o oras ne’e sira-nia suku balun seidauk hetan. Aleinde ne’e, komunidade sira mós husu atu Estadu bele halo inspesaun ho rigor ba kualidade ezekusaun no implementasaun projetu estrada iha Timor-Leste laran tomak.

Ba preokupasaun sira ne’e, Xefe Estadu hatete, nia aponta no sei enkamiña/hato’o tutan difikuldade no preokupasoens hirak ne’ebé populasaun sira hato’o ba ministériu kompetente.

Xefe Estadu mós fó korajen ba populasaun iha suku rua atu kontinua alerta ba autoridades sira sobre difikuldade ka preokupasaun hirak ne’ebé maka sira hasoru, no irregularidade husi ezekusaun projetu ne’ebé sira deskobre iha sira-nia suku.

Hafoin aprezenta nia resposta hirak ba komunidade sira-nia kestaun, S.E. Prezidente Repúblika oferese mós oportunidade ba reprezentante autoridade lokál sira atu hatán ba preokupasaun hirak ne’ebé komunidade sira aprezenta tuir sira ida-idak nia knaar.

Hakarak informa atu mós katak, molok Xefe Estadu hato’o nia diskursu iha diálogu ho komunidade suku rua ne’e, Xefe Estadu mós fó oportunidade ba diretór Komisaun Kombate moras HIV, iha ne’ebé diretór ne’e fahe informasaun, inklui halo apelu ba komunidade sira atu hatudu lala’ok hirak-ne’ebé sei kuidadu sira-nia an. Tanba, moras HIV, moras ida ne’ebé la iha ai-moruk atu kura.

Diretór ne’e mós informa katak, oras ne’e daudaun, Timor-Leste iha ona ema hamutuk 560 maka sofre moras HIV, no iha sira na’in-67 maka mate ona. Informa mós katak, oras ne’e daudaun, iha feto timoroan hamutuk 1000 maka envolve iha atividade hirak-ne’ebé maka bele hada’et liután moras HIV iha Timor-Leste.

Ikusmai la haluha mós atu hato’o katak, Xefe Estadu mós aprezenta klarifikasaun sobre objetivu husi nia vizita suku 442, esplika prosesu dezenvolvimentu ne’ebé maka Governu Timor-Leste konsege hala’o no dezafiu hirak ne’ebé maka hasoru, inklui mós fó serbisu boot haat ne’ebé komunidade ka populasaun Timor-Leste presiza hala’o atu dezenvolve sira-nia moris no mós Timor-Leste.