Maliana, loron 20 fulan-Maiu, tinan 2015
Exelénsia sira.

Povu Timor-Leste.

Ita komemora Aniversáriu Restaurasaun Independénsia ba dala 13 iha Maliana. Ha’u sauda Reverendísimu Bispu D. Norberto do Amaral no mós reljiozu no relijioza sira hotu hosi Dioseze Maliana no hosi Timor-Leste tomak.

Tinan 2015 ida-ne’e fanun ita ho maneira espesiál ba ita-nia Nasaun nia istória. Tinan ida-ne’e ita komemora tinan 500 ba kontaktu dahuluk ho Portugés sira.

Enkontru ida-ne’e tuir kedas ho kontaktu ho misionáriu sira. Akontesimentu sira ba sékulu lima tiha ona ne’e, tulun atu hakerek ita-nia rain nia istória.

Ita komemora enkontru dahuluk sira-ne’e bainhira Timor-Leste hetan onra atu prezide CPLP, Komunidade ba Rai sira ne’ebé Ko’alia Lian Portugés.

Nu’udar realidade rua mak simboliza aspetu identidade timoroan nian: Kristianismu no Lian Portugés—lian ne’ebé adota hosi Rezisténsia, tanba lian ne’e mak halo diferensa ba ita. No, tanba ne’e, mak lian ne’e kontribui ba libertasaun nasionál.

Kristianismu sai nu’udar forsa inspiradora ida ba timoroan sira-nia espiritualidade. Uma Kreda no mós relijiozu sira-nia servisu tenke sai ezemplu ba kualidade timoroan sira-nian, atu halo servisu ba moris di’ak no mós ba ema vulnerável sira, iha nasaun laran tomak.

Ita sai nu’udar nasaun aziátiku no Kristaun ida, ho ligasaun maka’as ho nasaun maun-alin sira oin-oin, hosi kontinente sira seluk.

Aleinde lian, ita no maun-alin sira hosi CPLP partilla valór no istória sira ne’ebé barak.

Solidaridade fraternál hosi povu sira CPLP nian, durante tinan 24 nia laran, iha importánsia boot iha luta ba Independénsia.

Oras ne’e, integrasaun armonioza nasaun nian iha komunidade internasionál mós sai importante tebes atu konsolida Estadu no dezenvolve Timor-Leste.

Hanesan Nasaun aziátiku, ita hakarak aprofunda ita-nia partisipasaun iha rejiaun ida-ne’e nia moris. Adezaun ba ASEAN iha tempu ikusmai sai nu’udar pasu ida ba objetivu ida-ne’e.
Munisípiu Bobonaro inklui rejiaun ida ne’ebé luan ba ita-nia fronteira internasionál.

Povu Bobonaro koñese importánsia estabilidade no pás ba komérsiu no mós ba dezenvolvimentu ekonomia.

Polítika amizade no rekonsiliasaun entre Timor-Leste no Indonézia—kooperasaun entre ita-nia rain rua, no nune’e mós ho Austrália—sai nu’udar kontributu boot ba estabilidade, dezenvolvimentu no reforsu ba ekonomia rejionál.

Iha fulan-Abril, ha’u hasoru malu ho señor Prezidente Indonézia, Joko Widodo. Ha’u ho nia konkorda atu, imediatamente, fó impulsu renovadu ida ba negosiasaun kona-ba fronteira sira entre Timor-Leste ho Indonézia, espesialmente fronteira marítima.

Fronteira rai-maran nian defini tiha ona to’o pursentu 98. Buat ida-ne’e oferese seguransa ba komunidade sira hosi parte rua no kontribui atu dezenvolve kontaktu familiár no mós relasaun komersiál sira.

Seguransa ema nian no aumentu komérsiu sai vantajozu ba Maliana no munisípiu Bobonaro nia ekonomia.

Kona-ba Australia, Timor-Leste hato’o tiha ona mós proposta kona-ba inísiu ba negosiasaun atu defini fronteria marítima komun. Ita kontinua hein resposta ba ita-nia proposta ne’e.

Timor-Leste haree dezenvolvimentu nasaun nian hanesan prosesu ida ne’ebé tenke lori vantajen ba parte sira hotu ne’ebé envolvidu. Dezenvolvimentu tenke hamosu oportunidade sira ne’ebé foun ba komérsiu no kooperasaun ho rejiaun viziñu sira, hosi Timor-Leste ba Darwin no ba Norte Austrália no mós provinsia indonézia nian sira ne’ebé besik.

Parte boot hosi empregu diretu sira ne’ebé hamosu hosi ita-nia ekonomia, kontinua kria iha Dili.

Prosesu dezenvolvimentu tenke kontribui ho lalais atu promove kriasaun empregu iha zona sira seluk nasaun nian.

Kooperasaun tripartida, ne’ebé ita hakarak habelar, entre Timor-Leste, Indonézia no Austrália sei estimula kresimentu ekonómiku iha rejiaun ida ne’ebé luan tebes, inklui Oecusse, Ataúro, Bobonaro, Kovalima no territóriu viziñu sira.

Ita fiar iha kooperasaun ne’ebé mutuamente vantajozu, atu harii moris-di’ak ba ita-nia komunidade sira no komunidade sira hosi rejiaun viziñu sira.

Prosesu ida-ne’e hatudu mai ita kona-ba importánsia relasaun internasionál iha konsolidasaun Estadu no iha dezenvolvimentu nasaun nian.

—X—

Ohin ha’u kondekora ema no organizasaun internasionál sira, ne’ebé destaka an ba apoiu ne’ebé empeñadu no konfiável ba ita-nia luta. Balu labele dezloka an mai iha ne’e tanba razaun saúde.

Ita rekoñese belun feto no mane na’in 35, ne’ebé sira-nia kontribuisaun ba iha vitória no ba iha Restaurasaun Independénsia ne’e sai importante. Sira mai hosi rai bara-barak:
Iha Ázia-Pasífiku—hosi Austrália, hosi Indonézia, hosi Japaun, hosi Nova Zelándia, hosi Filipina; no hosi Vanuatu, ita fó-onra ba memória ba ita-nia povu nia belun ida, ho títulu póstumu.

Iha Lian Portugés nia leet, ita fó-omenajen ba ativista no jornalista sira hosi Portugal no mós hosi PALOP, organizasaun ba Rai Afrikanu sira ne’ebé Ko’alia Lian Ofisiál Portugés.

Nasaun maun-alin sira-ne’e fó apoiu inabalável ba ita-nia luta, ho destake ba Angola no Mosambike, maibé inklui mós Guiné-Bissau, Saun Tomé no Kabuverde.

Ha’u hakarak hato’o ba imi ha’u-nia laran-ksolok atu kondekora Reverendísimu Bispu Eméritu hosi Setúbal, D. Manuel Martins. Nia luta iha vida tomak ba Justisa, iha Setúbal, Portugál no iha mundu. Ninia apoiu no domin ba Timor-Leste rai metin iha ha’u-nia fuan.

Iha kontinente amerikanu, ita rekoñese solidaridade no apoiu maka’as hosi kongresista sira, ativista sira no organizasaun sira sosiedade sivil Estadus Unidus no Kanadá nian. Sosiedade sivil iha Kanadá, Estadus Unidus, no mós reprezentante barak ne’ebé eleitu hosi povu amerikanu sai influente no ativu iha luta durante tinan 24 nia laran.

Ha’u hato’o hakoak emosionadu ida ba ita-nia belun sira hotu. Uluknana’in, ba Profesór Noam Chomsky, ba lideransa estraordinária no ezemplu inspiradór ba respeitu bodik ba direitu sivil no Direitus Umanus, iha Estadus Unidus no iha mundu tomak, iha dékada neen nia laran tiha ona, ka liután. Ninia apoiu ba Timor-Leste kontinua sai inabalável tebes ohin loron, hanesan mós uluk iha denúnsia ba okupasaun.

Iha Europa, Irlanda sempre iha movimentu solidaridade ida ne’ebé forte ho Rezisténsia Timorense. Solidaridade hosi ema europeu sira sai forte iha rai sira seluk mós, no rekoñesidu liuhosi kondekorasaun iha okaziaun sira seluk.

Jornalista aten-barani sira, hosi Portugál no mós hosi rai sira seluk fó-koñesimentu ba mundu kona-ba Rezisténsia Timorense no kona-ba violasaun Direitus Umanus iha ita-nia rain.
Liberdade imprensa iha mundu tulun hodi promove solidaridade hosi povu sira seluk ba timoroan sira-nia luta!

Ha’u hato’o hakoak ba irmaun Max Stahl, ne’ebé ha’u dezeja atu di’ak lalais iha nia saúde.

Timor-Leste nia belun mane no feto barak mak organiza no lidera rede apoiu ba Rezisténsia iha sosiedade sivil sira iha sira-nia rain. Sira tulun hodi halibur apoiu osan no apoiu materiál seluk, no mobiliza opiniaun públiku mundiál kontra okupasaun Timor.

Ha’u fiar iha komprensaun no apoiu hosi ema hotu-hotu atu mensiona espesialmente ativista indonézia, Liem Soei Liong, líder istóriku ba Tapol, nu’udar organizasaun ba defeza Direitus Umanus nian iha Indonézia. Tapol sempre sai entre lian sira ne’ebé la tauk kontra opresaun ba timoroan sira.

—X—

Rezisténsia nia diplomasia no solidaridade internasionál kontribui hodi izola rejime Suharto no foka líder mundiál sira-nia atensaun ba Timor.

Ita-nia diplomata sira liuhosi diresaun nasionál luta nian tulun hodi impoin vizaun timorense iha modelu referendu iha tinan 1999.

Ha’u hato’o hakoak ba maun-alin no inan-feton sira hosi Frente Diplomátika, ne’ebé durante tinan 24 nia laran fiar iha vitória, no la haluha povu nia terus iha rai laran.

Ha’u hato’o hakoak espesialmente ba ita-nia diplomasia nia aman, ha’u-nia irmaun Ramos-Horta.

Ninia kapasidade rekoñesidu tiha ona hosi Nasoins Unidas ne’ebé fó konfiansa ba nia atu kaer misaun sira ho responsabilidade boot, no nia kontinua fó-onra ba Timor nia naran iha mundu.

Rezisténsia nia diplomasia amplifika asaun hosi frente armada no frente klandestina, hodi aumenta ninia impaktu internu no internasionál.

Oras ne’e, Timor-Leste nia embaixadór sira no ita-nia diplomata sira hotu tenke dezenvolve diplomasia ida ne’ebé proativa, ne’ebé inspira nia an hosi lisaun sira Rezisténsia nian.

Diplomasia timorense tenke hatudu ba mundu kona-ba nasaun nia estabilidade, ita-nia povu nia susesu no oportunidade sira investimentu nian, iha projetu sira ne’ebé mutuamente vantajozu ba investidór sira no mós dezenvolvimentu nasaun nian.

Timor-Leste nia fronteira internasionál sira sai nu’udar espasu ba entendimentu, amizade no kooperasaun. Ita-nia nasaun sai nu’udar parseiru ida ne’ebé estável, previzível, inspiradór ba konfiansa, iha rejiaun ne’e no iha mundu.

Maun-alin no inan-feton sira.

Sein estabilidade, sei laiha dezenvolvimentu.
Pás, seguransa ba ema no sasan sira, konfiansa ba Justisa no respeitu ba lei sai indespensável atu atrai investimentu no promove dezenvolvimentu.

Se timoroan sira la hamutuk, ema seluk aproveita ita-nia frakeza, ne’ebé afeta ba soberania nasionál.

Ita tenke hamutuk no reforsa estabilidade, hodi implementa ita-nia estratéjia ba dezenvolvimentu no finta ema sira ne’ebé hakarak buat aat mai ita.

Iha mundu globalizadu iha ita-nia loron ohin, rezultadu sira ekonómiku nian depende ba dezenvolvimentu internu no mós ba susesu iha kompetisaun internasionál.

Tanba ne’e Timor-Leste serbisu hodi halo kooperasaun ekonómika no emprezariál sai eixu asaun nian ida ne’ebé foun ba CPLP, la’ós de’it iha atuál tinan rua nia laran maibé ba futuru. Iha sentidu balu, fronteira sira Timor-Leste nian ne’e luan no habelar an ba kontinente sira seluk, ne’ebé maun-alin sira CPLP nian iha ba.

Laiha nasaun ida maka hetan susesu mesak. Konfiansa no respeitu internasionál ne’e sai importante ba ita-nia dezenvolvimentu.

Durante luta, ita-nia povu nia apoiu ba kombatente sira, kredibilidade no respeitu internasionál ba Rezisténsia harii, hosi pasu ida ba pasu seluk:

– Ho polítika sira ne’ebé moderada no inkluziva, aprovadu hosi diresaun sentrál luta nian, iha ai-laran;

– No ho diplomasia ida ne’ebé badinas no kredível, mak ajuda mundu hodi koñese ita no fiar ba timoroan sira.

Oras ne’e, kredibilidade no respeitu internasionál ba nasaun kontinua harii loro-loron, hosi pasu ida ba pasu seluk mós:

– Ho polítika sira ne’ebé moderadu no inkluzivu hosi lideransa nasionál, atu reforsa estabilidade no promove kresimentu sustentável, ne’ebé sei tulun hodi hadi’a família sira-nia ekonomia no reforsa setór privadu nasionál.

– No ho intensifikasaun ba diplomasia ida ne’ebé sempre kredivel no badinas, bele transmiti estabilidade ne’ebé ita moris ba no reforsa komunidade internasionál nia konfiansa ba Timor-Leste.

Ita-nia diplomasia sai nu’udar ferramenta ida ne’ebé tulun atu implementa prioridade sira dezenvolvimentu nian ne’ebé ita aprova tiha ona.

—X—

Estadu oras ne’e hala’o hela investimentu boot atu dezenvolve nasaun.

Rezultadu sira balun sai vizível tiha ona. Rezultadu ida maka rede eletrisidade nasionál. Eletrisidade to’o tiha ona iha parte barak nasaun nian. Iha tempu balun tan, eletrisidade sei to’o ba ita-nia rain nia suku no aldeia sira hotu.

Ita investe hela namanas iha konstrusaun no melloria ba iha rede nasionál estrada nian.

Obra sira balun sei hala’o ho parseria entre Timor-Leste no instituisaun sira komunidade internasionál nian ka parseiru dezenvolvimentu sira.

Solusaun ida-ne’e, hahú implementa hosi governu anteriór sira. Ha’u dezeja katak esperiénsia hosi parseria sira-ne’e asegura kualidade obra sira ne’ebé di’ak liután no lalais liután iha nia implementasaun.

Parseria sira ba implementasaun infrastrutura hariku esperiénsia no kapasidade realizasaun servisu Obras Públika nian no akizasaun ba sasan no servisu sira hosi Estadu.
Ita tenke aprende bebeik, atu ita bele halo buat barak no di’ak liután.

Oras ne’e daudaun, Estadu halo hela investimentu boot iha pólu dezenvolvimentu rua iha Oecusse no iha Kosta Súl.

Objetivu hosi investimentu ne’e mak atu estimula aproveitamentu riku-soi no komunidade sira-nia servisu iha rejiaun sira-ne’e no atrai investidór sira atu dezenvolve setór produtivu no kria empregu barak liután.

Pólu sira-ne’e tenke nakfilak-an sai motór ba kresimentu ekonómiku rejionál atu dinamiza la’ós de’it Timor-Leste nia ekonomia maibé mós troka komersiál sira ho rejiaun viziñu sira hosi Austrália no Indonézia, ho vantajen ba parte sira hotu ne’ebé envolvidu.

Ita tenke avansa ho lalais tebes bainhira iha posibilidade duni, no kria tan sentru dinamizmu ekonómiku iha rejiaun sira seluk.

So investe iha pólu dezenvolvimentu sira maka ita bele aproveita ita-nia rain nia rekursu no agrikultór sira-nia servisu. Importante tebes atu planeia hodi proteje no habelar zona agríkola sira. Ita labele kontinua atu importa kuaze sasan sira hotu ne’ebé ita han ka hemu.

Mai ita serbisu hamutuk atu asegura dezenvolvimentu sustentável ba rejiaun sira hotu Timor-Leste nian no aproveita ho didi’ak nasaun nia riku-soi naturál sira.

Estadu tenke aumenta kualidade servisu no hamenus burokrasia.
Populasaun barak mak moris la’ós iha kapitál, maibé Administrasaun públika kontinua, iha nia parte barak, konsentra iha Dili.

Estadu tenke lori servisu públiku ba populasaun sira—iha nasaun laran tomak.

Sidadaun sira-nia partisipasaun no envolvimentu iha dezenvolvimentu nasionál tenke nakfilak an sai prioridade ida no métodu servisu ida Administrasaun nian.

Dalan ida di’ak liu hosi Estadu atu sai efisiente iha nível lokál maka promove partisipasaun hosi populasaun interesadu sira, korresponsabilza komunidade sira, ba iha implementasaun projetu no prioridade lokál sira.

Sira hatene di’ak liu duké ema seluk kona-ba buat ne’ebé sira presiza.

Exelénsia sira.

Maun-alin no inan-feton sira.

Ohin halo tinan 3 kona-ba data ba ha’u-nia pose hanesan Prezidente Repúblika. Nasaun la paradu durante tempu ne’e. Kondisaun sira moris nian iha suku balun mellora ona.

Maibé karénsia sira kontinua sai boot. Ita tenke serbisu ho determinadu atu hadi’a moris iha ita-nia rain nia aldeia no suku sira hotu.

Tinan hirak ne’e iha tiha ona pás no estabilidade.
Estabilidade sai posivel tanba povu hili pás no iha tiha ona komportamentu responsável ba prezente no futuru.

Ita iha governu foun ida no mós primeiru-ministru foun ida. Pasajen responsabilidade sira ne’ebé boot hosi jerasaun 75 ba jerasaun Santa Krús la’o ho forma hakmatek no kalma.

Realidade ida-ne’e pozitivu no tenke hetan saudasaun.

Eziste konsensu boot ida kona-ba nesesidade atu aumenta rigór no kualidade servisu públiku nian, hamenus gastu no gasta osan Estadu nian ho kuidadu no konxiénsia – enfin, eziste konsensu boot ida kona-ba nesesidade atu desentraliza no korriji departamentu sira-nia organizasaun bainhira departamentu sira-nia dezempeñu ne’e la aseitavel.

Membru governu sira iha dever atu, uluk nana’in, fó ezemplu. Maibé dever ida-ne’e la’ós de’it hosi membru governu sira. Ne’e nu’udar sidadaun sira hotu nia dever ba Nasaun, inklui Prezidente Repúblika. Rai Timor presiza ita hotu nia dedikasaun.

Traballadór sira, sidadun sira hotu, preokupa ho sira-nia situasaun no família sira-nia situasaun—buat ne’e normál, maibé labele buat hotu hanesan ne’e: ita tenke hanoin mós ba nasaun.

Atu dezenvolve no hadi’a ema hotu nia moris iha ita-nia rain doben, ita tenke hanoin kona-ba nasaun nia interese, la’ós de’it ba interese individuál. Hamutuk de’it, no ho dedikasaun ba Timor mak ita bele alkansa moris ida ne’ebé di’ak liután, iha nasaun ida ne’ebé di’ak liután.

Ita hotu hamutuk, bele halo di’ak liután.

Hodi nune’e Maromak tulun ita, no haraik bensaun mai ita hotu.