Díli, loron 5 fulan-Juñu tinan 2015

 Exelénsia sira

Komemorasaun aniversáriu ba kriasaun Ministériu Públiku Timor-Leste nian ba dala 15 fó sasukat ida mai ita kona-ba dezenvolvimentu no konsolidasaun Estadu.

Iha momentu laran-susar no komosaun nasionál ne’ebé klean, tanba señor Ministru Edukasaun, ministru-koordernadór, eis prezidene Parlamentu Nasionál, irmaun Fernando La Sama de Araújo nia mate, komemorasaun aniversáriu ne’e hatudu katak nasaun ne’e iha razaun atu sente konfiante ba nia an. Irmaun La Sama, líder destemidu iha luta Rezisténsia, mós sertamente sente orgullu ba rezultadu sira-ne’ebé hetan ona hosi nasaun no ita-nia povu.

Ita iha razaun atu iha laran-haksolok ho dalan ne’ebé la’o liu tiha ona hosi Ministériu Públiku, embora importante ba ita atu iha konxiénsia viva kona-ba dezafiu boot sira ne’ebé Ministériu Públiku, sistema Justisa no nasaun ne’e kontinua hasoru.

Foin ba dala uluk iha istória Timor nian, Restaurasaun Independénsia kria kondisaun atu ita harii Ministériu Públiku ida no sistema justisa ida ho majistradu timoroan sira.

Majistradu sira, instituisaun Ministériu Públiku no ita-nia lei sira tenke buka atu reflete, maka’as liután, ba sistema Justisa, valór no tradisaun nasionál sira, hodi nune’e sidadaun sira rekoñese nia an no identifika ho desizaun sira no asaun sira sistema Justisa nian.

Ita fó-pasu importante iha tinan 15 nia laran ne’e.

Iha tinan 2000, durante administrasaun tranzitória Nasoins Unidas nian, grupu majistradu ki’ikoan ida-ne’ebé ezerse funsaun Ministériu Públiku nian ne’e kuaze eskluzivamente konstitui hosi majistradu internasionál sira.

Sentru Formasaun Jurídika ba majistradu nasionál sira administra ninia kursu dahuluk tinan 2 nian, ne’ebé dezeñadu espesialmente ba ezersísiu funsaun judisionál nian, iha tinan 2005. Servisu Sentru ne’e nian merese hetan destaka. Maske iha krize, kuadru formadu sira dahuluk hosi Sentru ne’e hahú funsaun sira iha tinan 2006, ho títulu estájiu no iha tinan 2007, simu pose hanesan majistradu.

Entre majistradu dahuluk sira-ne’e konta ho prokuradór na’in 9. Ohin loron, Ministériu Públiku hala’o funsaun ho majistradu nasionál sira liu dezena rua, toma lideransa deskonsentrasaun ba servisu sira no iha tiha ona prokuradór rezidente sira iha munisípiu 7.

Prokuradoria Jerál Repúblika dezenvolve inisiativa sira rasik ba formasaun téknika no organizasaun interna iha área sensivel sira hanean brankeamentu kapitál, kombate korrupsaun, protesaun ba labarik sira no direitu família, no kontensiozu Estadu nian.

Ha’u nota ho laran-haksolok katak Ministériu Públiku mantein servisu inspesaun ida hodi funsiona ho maneira regulár, hodi permiti atu iha avaliasaun ba majistradu sira no ofisiál sira Justisa nian, buat ne’ebé permiti iha progresaun iha karreira respetiva sira. Parbens. Avaliasaun dezempeñu ne’e sai indespensável atu garante padraun sira-ne’ebé di’ak liuhotu ba efisiénsia no kontribui ba iha ambiente servisu nian ida-ne’ebé di’ak liután—no ba rigór—iha instituisaun sira Estadu nian.

Inisiativa sira formasaun nian ne’ebé ha’u refere han-malu ho prioridade nasionál no hasa’e preparasaun téknika ba Rekursu Umanu no konsolida instituisaun sira Estadu nian, ne’ebé sai nu’udar kondisaun ida atu halo reforsu ba soberania nasionál.

Asisténsia komunidade internasionál nian sai valioza tiha ona. Kooperasaun multilaterál no bilaterál kontribui tiha ona ba rezutadu importante sira-ne’ebé ita alkansa tiha ona, iha Prokuradoria Jerál Repúblika no Ministériu Públiku no, jeralmente, iha sistema Justisa. Ha’u agradese PNUD, ajénsia Nasoins Unidas nian sira ne’ebé halo parseria iha esforsu ida-ne’e, no mós rai belun sira ne’ebé apoia no kontinua apoia halo konsolidasaun ba ita-nia instituisaun sira. Mai ita kontinua serbisu hamutuk hodi halo reforsu ba Estadu Direitu no Justisa.

Exelénsia sira.

Maske iha servisu ne’ebé hala’o tiha ona no susesu sira-ne’ebé hetan ona, sistema Justisa sei hasoru dezafiu sira-ne’ebé boot. Aplikasaun Justisa—ho artikulasaun instituisaun, majistradu, funsionáriu no sidadaun sira—nu’udar servisu ida ekipa nian. Ekipa ne’e iha objetivu atu garante sidadaun sira-nia asesu ba Justisa; aplika lei ho rigór; no tulun reforsa sidadaun sira-nia konfiansa ba instituisaun sira no nasaun nia kapasidade sira.

Ita iha servisu barak iha ita-nia oin, atu hala’o tomak objetivu sira-ne’e. Feto no mane timoroan sira-nia asesu ba Justisa seidauk sufisiente no istituisaun sira Justisa nian kontinua hela hala’o dezenvolvimentu.

Ita iha Tribunál sira iha Dii, Baucau, Oecusse no Suai. Maibé, ita tenke asegura sidadaun sira-nia asesu ne’ebé di’ak liután ba Tribunál Primeira Instánsia sira iha munisípiu 13 nasaun nian.

Tribunál sira-nia sisteman, ne’ebé ita-nia Konstituisaun estabelese, ladauk kompleta. Hanesan ha’u refere, liután hosi okaziaun ida, konsolidasaun Justisa rekere pasu sira-ne’ebé foun, sein iha laran rua-rua.

Presiza atu habelar kuadru juís sira Tribunál Rekursu nian atu bele serbisu iha seksaun sira, no iha prosesu ne’e, hamosu kondisaun ba kriasaun Supremu Tribunál Justisa, ne’ebé previstu iha Konstituisaun.

Ita foin komemora pasajen aniversáriu ba dala 13 sobre Restaurasaun Independénsia. Nasaun ne’e tenke estabelese kalendáriu ida no planeamentu ne’ebé korrespondente, hodi kompleta estrutura sistema Justisa nian.

Hanesan Konstituisaun haruka, Ministériu Públiku kombate krime, defende legalidade demokrátika no promove komprimentu ba lei, ho objetividade, izensaun no iha obediénsia ba diretiva no orden sira-ne’ebé previstu iha lei.

Nasaun presiza Ministériu Públiku iha munisípiu sira hotu. Reforsa prezensa Ministériu Públiku nian la’ós de’it komfortu ida ba populasaun hanesan garante asaun lokál hosi polísia nasionál Timor-Leste. Ita tenke kontinua habelar Ministériu Públiku nia prezensa.

Hanesan ita haree, espande tribunál sira-nia rede tribunál no habelar Ministériu Públiku nia prezensa iha munisípiu sira hotu signifika intensifika formasaun ba majistradu sira no profisaun jurídika sira seluk.

Sentru Formasaun Jurídika iha fulan ida-ne’e halo atividade durante tinan 13 nia laran. Ne’e nu’udar momentu loloos atu halo avaliasaun sistemátika ida ba servisu ne’ebé hala’o tiha ona no planea dezenvolvimentu atividade sira iha instituisaun importante Justisa nian ida-ne’e. Espesialmente, ha’u apela señor Ministru Justisa no governu atu lansa avaliasaun objetiva ida ba Sentru Formasaun Jurídika nia rezultadu sira.

Konkluzaun sira avaliasaun nian tenke fó-roman ba planeamentu no tulun hodi renova atividade formasaun jurídika, iha tempu badak no médiu. Nasaun ne’e iha kuadru sira-ne’ebé kompetente no altamente kualifikadu atu hala’o avaliasaun ida-ne’e, hodi deteta pontu forte sira no hala’o korresaun ba pontu fraku sira.

Avaliasaun ida hanesan ida ne’ebé ha’u hato’o ne’e só bele lori vantajen—ba nasaun no ba instituisaun sira Justisa nian.

—X—

Ita hatene katak reforsu ba Justisa la rekere de’it instituisaun sira-ne’ebé di’ak liután. Rekere lei barak liután no lei sira-ne’ebé di’ak liután, no rekere servisu ekipa ida-ne’ebé dedikadu no onestu entre servisu sira hotu Estadu nian no instituisaun sira Justisa nian.

Komemorasaun ba tinan 15 Ministériu Públiku nian inklui semináriu internasionál ida, ne’ebé aborda tema sira-ne’ebé iha importánsia boot no atualidade: kombate brankeamentu kapitál, rekuperasaun riku-soi sira Estadu nian ne’ebé desvia hosi atividade kriminoza, artikulasaun ba asaun Justisa ho instituisaun sira seluk, hanesan Banku Sentrál, no seluk-seluk tan.

Urjente atu aprova Lei ida kontra korrupsaun no lejizlasaun ho prosedimentu sira-ne’ebé efisiente atu regula peñor no sosa sasan sira ema partikulár sira nian ne’ebé falta, no seluk-seluk tan. Lejizlasaun hanesan ida-ne’e sei permiti Estadu atu haruka sinál ida ba sosiedade katak krime ne’e la kompensa, bainhira Justisa bele rekupera riku-soi sira-ne’ebé desvia hosi atividade kriminoza.

Iha mundu globalizadu ne’ebé ita moris ba, korrupsaun, hanesan kriminalidade organizada ida, porezemplu, tau risku sériu ba seguransa Estadu, aleinde halo distorsaun ba prioridade sira dezenvolvimentu nasionál nian.

Krime trans-nasionál koloka ameasa ba estadu sira-nia soberania no ba seguransa no estabilidade pontu oioin sira mundu nian.

Indespensavel katak sistema Justisa hadi’a permanentemente instrumentu legal sira no formasaun nesesária atu prevene atividade kriminoza trans-nasionál sira, ho kooperasaun hamutuk ho nasaun viziñu sira iha parseria multilaterál rejionál no internasionál sira-ne’ebé nasaun ne’e halo parte.

Kombate korrupsaun no brankeamentu kapitál, hanesan mós ho transparénsia despeza sira Estadu nian, porezemplu, sai nu’udar ema hotu nia obrigasuan.

Tuir Konstituisaun, laiha ema ida mak aas liu lei. Ema hotu tenke hetan tratamentu ho maneira hanesan, tuir lei.

Ne’e nu’udar regra osan-mean ida ba konsolidasaun Estadu. Só igualdade iha lei nia okos maka inspira sosiedade nia konfiansa no respeitu internasionál nian ba Timor-Leste.

Naturalmente, Ministériu Públiku no Prokuradoria Jerál Repúblika la serbisu mesa-mesak. Aplikasaun Justisa la depende de’it hosi majistradu sira. Rezultadu sira-ne’ebé di’ak depende ba konstrusaun organizasaun sira-ne’ebé efisiente no depende ba servisu iha ekipa hosi profisaun jurídika sira, inklui Defensór Públiku sira no advogadu sira seluk—no sein haluha ofisiál Justisa sira, funsionáriu judisiál sira seluk no servisu apoiu sira.

Kolaborasaun, estreita no profisionál, entre Ministériu Públiku no polísia merese hetan destake espesiál no tenke kontina atu hetan reforsu.

Iha aniversáriu Ministériu Públiku nian ida-ne’e, ha’u agradese ba sira hotu ne’ebé kontribui diaramente atu hadi’a rezultadu sira no aumenta konfiansa iha Timor-Leste nia Justisa.

Administrasaun Públika nia servisu sira iha nível hotu-hotu Estadu nian tenke iha dever atu halo kolaborasaun ho Justisa, ne’ebé signifika serbisu iha ekipa ho Ministériu Públiku no servisu sira seluk Justisa nian, atu kumpri no halo kumpri lei, sein iha prezuizu ba kompeténsia sira-ne’ebé própria hosi servisu ida-idak.

Estadu tenke hamutuk no serbisu atu garante prinsípiu legalidade ne’ebé hakerek iha Konstituisaun.

—X—

Ministériu Públiku Timor-Leste nian hatudu tiha ona dedikasaun no determinasaun atu kumpri no halo kumpri lei.

Relatóriu anuál sira ne’ebé Prokuradór Jerál Repúblika susesivu sira aprezenta tiha ona ba Parlamentu Nasionál hatudu katak iha tiha ona espíritu kontinuidade ne’ebé tenke hetan louvasaun. Espíritu ida-ne’e kontribui ba dezenvolvimentu instituisaun ida-ne’ebé ativa liután no konfiante iha nia kapasidade, no iha ezersísiu ba reponsabilidade sira-ne’ebé Konstituisaun fó ba instituisaun ne’e.

Iha aniversáriu ida-ne’e, ha’u hato’o parabens laran-kmanek ba majistradu sira, ofisiál sira Justisa nian no funsionáriu sira hosi Prokuradoria Jerál Repúblika no Ministériu Públiku.

Ha’u hakarak hato’o ha’u-nia enkorajamentu no insentivu ba Ita-Boot sira atu kontinua serbisu—hanesan Konstituisaun haruka—hodi halo respeita ba Lei, defende ema vulnerável no kbiit-laek sira, no defende Estadu ho izensaun, no dedikasaun ba Justisa.

Hodi nasaun nia naran, ha’u agradese Ita-Boot sira-nia dedikasaun, Ita-Boot sira-nia rigór no Ita-Boot sira-nia esforsu. Ha’u hato’o votu servisu di’ak.