Parlamentu Nasionál, Loron 5  fulan-Juñu tinan 2015

Timor-Leste lakon ninia oan mane ilustre ida no nasaun tomak tama iha momentu lutu nia laran. Ha’u sente laran-susar tebes ho oan-mane Timor nian ida-ne’e nia mate ne’ebé derepente, mane aten-barani no moderadu, ne’ebé sempre serbisu ba estabilidade no pás.

Iha oras laran-dodok, lutu no laran-susar tebes iha ita-nia fuan-laran ida-ne’e, hodi ha’u-nia naran rasik no timoroan sira-nian naran, ha’u hakarak hato’o sentiment profundu no kondolénsia ba matebian nia família enlutadu sira hotu no mós belun sira barak. Ha’u –nia hanoin no orasaun no mós ha’u-nia família nia hanoin no orasaun hamutuk ho imi hotu ho memória maun-alin La Sama nian.

Fernando La Sama de Araújo, hahú kedas sei foin-sa’e, sai ema ida ho aten-barani.

Ninia aten-barani no nia matenek hanesan líder estudantil konkista admirasaun hosi ema sira hosi nia jerasaun, no mós hosi nasionalista timoroan sira tomak.

Aten-barani, dedikasaun no kapasidade atu halo sakrifísiu notabilza iha ita-nia maun-alin ida-ne’e—ne’ebé oras ne’e ba ona, ho sedu tebetebes.

Nia sai nu’udar ativista ne’ebé adversáriu sira tauk, sai nu’udar konstrutórunidade no organizasaun ba ita-nia kauza, sai nu’udar defaktu foin-sa’e ida la ho tauk, iha servisu RENETIL nian, nune’e tiha, iha dadur-fatin iha Cipinang.

Hafoin tiha Restaurasaun Independénsia, La Sama hatudu ninia kbiit boot hanesan ema no mós hanesan polítiku.

Bainhira sei nurak loos nia sai nu’udar fundadór no líder karismátiku Partidu Demokrátiku nian. Hafoin tiha ne’e, nia hatudu abnegasaun no espíritu konsilidadór no dialogante iha ezersísiu ba funsaun sira Estadu nian—iha governu, hanesan Prezidente Repúblika interinu, no espesialmente, iha Parlamentuida-ne’e, sai nu’udar prezidente, ne’ebé hetan apresiasaun no respeitu, entre tinan 2007 no 2012.

Nia haklaken kualidade moderasaun no matenek, no ninia esperiénsia pesoál no polítika ne’ebé barak, ba servisu prestíjiu Parlamentu nian no ba estabilidade nasaun nian.

Hanesan deputadu, Prezidente Parlamentu Nasionál, Vise-Primeiru Ministru no, foin lalais, hanesan Ministru Estadu Koordenadór ba Asuntu Sosiál no Ministru Edukasaun, ninia lian ema sempre rona hor espeitu no atensaun.

Ninia atuasaun hanesan Prezidente Repúblika interinu hetan elojiu hosi Prezidente Ramos-Horta rasik, bainhira Prezidente Ramos-Horta fila fali mai rai-laran, iha fulan-Abril tinan 2008.

Fernando La Sama de Araújo konkista timoroan sira-nia respeitu ba nia domin ba Nasaun, sentidu klean ba Estadu no defeza ba interese nasionál.

Ninia moris sai nu’udar ezemplu ne’ebé foin-sa’e sira bele realiza bainhira uza sira-nia kualidade sira hodi halo servisu ba interese nasaun nian.

Omenajen ne’ebé hato’o ba maun-alin La Sama ida-ne’e sai nu’udar jestu Parlamentu no Nasaun nian atu fó-onra ba timoroan ida-ne’ebé iha fuan boot.

Maibé, ita hotu nia maneira, iha Parlamentu, governu no iha sosiedade ita fó-onra ba memória Fernando La Sama de Araújo nian, ne’e katak la’o tuir ninia ezemplu no ita kontinua hala’o servisu ne’ebé nia dedika ninia moris ba:

  -Ita servisu hode dikasaun ba pás no estabilidade;

-Ita kontinua reforsa instituisaun sira ne’ebé Restaurasaun Independénsia lori tiha ona ba Nasaun;

-Ita reforsa konfiansa hosi ita-nia maun-alin no inan-feton sira, hosi timoroan sira hotu, ba iha ita-nia povu nia kapasidade sira atu halo ba nasaun nia futuru.

Bainhira La Sama sei foin-sa’e, RENETIL no nasaun husu ba foin-sa’e sira atu halo sakrifísiu ba luta atu hetan liberdade no independénsia.

Nasaun manan tiha ona. Ita konkista tiha ona liberdade no independénsia. No agora, saída maka nasaun presiza hosi foin-sa’e sira maka servisu no dedikasaun ba estudu.

Estuda sai batalla ida ba koñesimentu tékniku, ba siénsia no ba dezenvolvimentu nasionál.

Fernando La Sama de Araújo hala’o namanas hela servisu ida-ne’e iha Ministériu Edukasaun. Mai ita kontinua ninia servisu. No manan, hanesan nia manan.

Kondekorasaun ho títulu póstumu ho Orden Nicolau Lobato, hodi fó-rekoñesimentu ba servisu valiozu sira-ne’ebé hato’o ba Timor-Leste, espresa admirasaun no respeitu nasaun tomak nian ba Fernando La Sama de Araújo, ne’ebé sei lembra ba nafatin, ba jerasaun sira tuir mai, hanesan ema di’ak no ita-nia rain nia ema boot ida.

Husu boot nia deskansa iha pás rohan-laek.