Dili, 06 Dezembru, 2016 – Hodi komemora Loron Internasionál Direitus Umanus nian ba dala 68, loron 10 fulan-Dezembru tinan ne’e, Prezidénsia Repúblika sei organiza atividade lubuk ida iha Palásiu Prezidente Nicolau Lobato hanesan tuirmai:

Sei entrega Prémiu Direitus Umanus “Sérgio Vieira de Mello” edisaun IX ba instituisaun hirak no ema sira-ne’ebé maka selesionadu tiha ona ba hala’o knaar hodi promove Direitus Umanus. Prémiu ne’e ninia montante osan hamutuk USD$10.000,00 (dolar amerikanu rihun sanulu), ho baze Dekretu-Lei nr. 15/2009, loron 18 fulan-Marsu.

Ema no instituisaun hirak ne’ebé sei simu Prémiu ne’e maka temi iha kraik ne’e:

Kategoria Direitu Sivíl no Polítiku

  1. Judicial System Monitoring Programme (JSMP)
  2. Graciana da Silva – Fundasaun Moris Foun Liquiçá” (FMF)

Kategoria Direitu Sosiál, Ekonómiku no Kulturál

  1. Orfanatu Mate La Mohu “Kiak Serve Kiak”
  2. Fundasaun An-Nur
  1. Padre Francesco Moser no Padre Pierluigi Fornasier – Padres “brazileiru” husi Ataúru
  1. Marciana da Graça – Profesora husi Eskola Filial Koileki

Hafoin serimónia entrega Prémiu Direitus Umanus husi Prezidente Repúblika, sei kontinua ho Programa Lansamentu Livru “A Presidência de Proximidade de Taur Matan Ruak” nomos Revista “Suku 1 Lia Meno 4”, hamutuk ho album no poezia husi vizita suku nian, ne’ebé sei lansa husi S.E. Prezidente Repúblika, Taur Matan Ruak, aleinde ne’e sei entrega mós simbolikamente plakas no sertifikadus agradesimentu ba reprezentante:

  1. Administrasaun Postu Administrativu Iliomar, Sr. Luis Fernandes
  2. Administrasaun Postu Administrativu Ataúru, Sr. Manecas Conceição Soares
  3. Xefe Suku Lepo, Postu Administrativu Zumalai, Sr. Aniceto Ferreira
  4. Xefe Suku Liaruka, Postu Administrativu Ossu, Sra. Rita da Costa Monteiro

ba sira-nia partisipasaun nu’udar konvidadus espesiál iha diálogu komunitáriu, no mós agradese ba ospitalidade ne’ebé sira hatudu ba S.E. Prezidente Repúblika wainhira hala’o vizita ba sira-nia suku.

Komemorasaun refere sei taka ho inaugurasaun kooperativa Hanai Malu iha eliportu, Palásiu Prezidente nia kotuk.Hotu