Lizboa, 28 Outubru 2016 – S.E. Prezidente Repúblika, Taur Matan Ruak, kondekora “Grande Colar da Ordem Timor-Leste” ba Prezidente antigu portugés na’in-rua, Señór Mário Soares no Señór Jorge Sampaio, nu’udar sinál rekoñesimentu ne’ebé sinseru ba solidariedade no apoiu ativu iha luta ba Timor-Leste nia independénsia.

Iha biban ne’e, Xefe Estadu mós entrega “Medalla Ordem Timor-Leste” ba Majór-Jenerál Arnaldo José Ribeiro da Cruz, Sra. Pascoela Barreto dos Santos, Arnold S. Kohen, Carlos Eduardo de Medeiros Gaspar, no Amílcar Rodrigues. Fó mós kondekora títulu póstumu ho insígnia husi “Ordem Timor-Leste” ba Timoroan iha diáspora ne’ebé iha tempu okupasaun fó apoiu maka’as ba luta autodeterminasaun Timor-Leste nian.

Prezidente Repúblika, Taur Matan Ruak, iha ninia diskursu hato’o “rekoñesimentu sinseru husi sentimentu umanu ba espresaun solidariedade no apoiu ativu ne’ebé eis-Prezidente na’in-rua refere halo durante tinan barak nia laran atraves sira-nia esforsu determinadu hodi lori prosesu, luta ba Timor-Leste nia independénsia ba oin”.

“Sira na’in-rua halo kontribuisaun fundamentál ba ezisténsia Timor-Leste livre no ba amizade fraternál entre Timoroan no Portugés”, hatete Xefe Estadu. Hafoin entrega kondekorasaun “Grande Colar da Ordem Timor-Leste” ba antigu Prezidente Jorge Sampaio no mós ba Eis-Xefe Estadu, Mário Soares atraves nia oan-mane, João Soares. Prezidente Repúblika, Taur Matan Ruak, mós subliña sobre papél importante ne’ebé Portugés sira hala’o iha kauza ba independénsia Timor-Leste nian:

“Imi-nia solidariedade ne’e solidariedade ida mai husi imi-nia fuan ba povu Timór. Ema portugés barak fó sira-nia luta ba povu Timór hanesan sira-nia luta rasik. Sira partisipa ativa tebetebes iha rezisténsia, ajuda refujiadu timoroan sira, liuliu sira-ne’ebé eziladu. Iha kazu barak, hala’o papél importante iha divulgasaun no promosaun ba kauza Timor-Leste.”

Prezidente Repúblika mós hato’o ninia satisfasaun ba Señór António Guterres, ne’ebé maka eleitu ona nu’udar Sekretáriu-Jerál ba Organizasaun Nasoins Unidas. Nune’e Xefe Estadu hatutan nia diskursu hodi hatete:

“Ne’e nu’udar vitória ba ema hotu-hotu, Estadu-Membru ONU nian, no ba ita-nia membru sira, maibé liuliu ba povu portugés, ba Timoroan sira, no ba CPLP (Comunidade dos Países de Língua Portuguesa) no ema hotu-hotu ne’ebé mak funu buka ba pás no justisa.”

Ikusliu, Xefe Estadu agradese ba “Portugál no Portugés sira hotu, ba sira-nia sentimentu solidariedade iha tempu uluk no mós iha agora ida-ne’e”.

Serimónia refere hala’o iha Hotel Tivoli, Lizboa, Premiadu Nobel da Pás, Don Carlos Filipe Ximenes Belo mós partisipa, inklui eis Vigáriu Jerál Dioseze Díli, Padre Apolinário, Prezidente Asembleia Repúblika Portugal nian, Eduardo Ferro Rodrigues, Ministru Negósius Estranjeirus no Kooperasaun, Hernani Coelho, Embaixadora Timor-Leste iha Portugál, Maria Paixão, família kondekorados hamutuk ho Timoroan sira-ne’ebé hela iha Portugál. H O T U ~~~~~~~~