Brazília, 31 Outubru, 2016 – S.E. Prezidente Repúblika, Taur Matan Ruak, hala’o enkontru kortezia ho nia omólogu Prezidente Repúblika Portugál, Marcelo Rebelo de Sousa, iha segunda-feira, 31 Outubru, oras Brazíl nian, iha tersa-feira, 1 Novembru, oras Timor-Leste nian, iha marjen Simeira CPLP ba dala XI.

Iha enkontru refere, dahuluk Prezidente Portugal S.E. Marcelo Rebelo aproveita kongratula nia omólogu, Taur Matan Ruak, ba susesu ne’ebé Timor-Leste hetan durante asume pasta prezidénsia rotativa Komunidade País hirak-ne’ebé Ko’alia Lian Portugés (CPLP) durante tinan rua nia laran, 2014-2016.

Entretantu. iha enkontru kortezia refere, Xefe Estadu na’in-rua mós ko’alia sobre relasaun bilaterál nasaun rua nian, liuliu oinsá maka Portugál bele apoiu kooperasaun iha área judisiáriu. Relasiona ho kestaun ne’e, S.E. Prezidente Repúblika portugés, Marcelo Rebelo de Sousa, fó diretamente orientasaun ba Sekretáriu Estadu Kooperasaun Portugál ne’ebé trata asuntu kooperasaun entre rai rua ne’e, atu kria kontaktu entre Ministériu Justisa Timor-Leste ho Portugál nian. Hafoin, Xefe Estadu portugés mós husu ba Sekretáriu Estadu Kooperasaun Portugál nian atu haruka mós juis no peritu balun iha área ne’e hodi dezenvolve di’ak liután setór refere.

Xefe Estadu na’in-rua ne’e mós ko’alia sobre setór edukasaun nian, liuliu atu haruka dosente sira husi Portugál mai Timor-Leste atu bele ajuda hamoris no habelar di’ak liután lian portugés iha Timor-Leste.

Nune’e, hakarak mós atu informa katak, Timor-Leste kontinua halo pedidu ba Portugál atu forma profesór/a sira hamutuk na’in-rihun haat, ne’ebé sei bele haruka ba territóriu tomak nia laran atu fasilita prosesu aprendizajen iha Timor-Leste.HOTU